އިންސާނީ އެހީތެރިކަން ފޯރުކޮށްދޭ ފަރާތްތަކަށް އަމާޒުކޮށް މުޅި ދުނިޔޭގައި ހިންގަމުންދާ އަނިޔާވެރި އަމަލުތައް ކުށްވެރިކުރައްވައި، އެފަދަ ފަރާތްތަކުގެ ރައްކާތެރިކަން ކަށަވަރުކޮށްދިނުމުގައި ބައިނަލްއަގުވާމީ މުޖުތަމައު ނުކުޅެދިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ދުނިޔޭގެ އިންސާނީ އެހީތެރިކަމުގެ ދުވަހާ ގުޅުވައިގެން އެކްސްގައި ހިއްސާކުރެއްވި މެސެޖެއްގައި ރައީސް މުއިއްޒު ވަނީ، އަމިއްލަ ފުރާނަ ނުރައްކަލުގެ ތެރެއަށް ހުށަހަޅައިގެން ނަމަވެސް އެހެން މީހުންނަށް އެހީތެރިކަން ފޯރުކޮށްދެމުންދާ މުވައްޒަފުންނާއެކު ދިވެހިރާއްޖެ ސާބިތުކަމާއެކު އޮތްކަން ހާމަކުރައްވާފައެވެ.
އިންސާނީ އެހީތެރިކަމަށް އެދޭ މިންވަރު މުޅި ދުނިޔޭގައި އިންތިހާއަށް އިތުރުވަމުންދާ މި ދަނޑިވަޅުގައި، އާންމު ރައްޔިތުންނާއި އެހީދޭ ފަރާތްތަކަށް ރައްކާތެރިކަން ހޯދައިދިނުމުގައި ބައިނަލްއަގުވާމީ މުޖުތަމައު ނުކުޅެދިފައިވާކަން އެންމެ ސާފުކޮށް ފެންނަނީ ޣައްޒާއިން ކަމަށްވެސް އެމަނިކުފާނު ފާހަގަކުރެއްވިއެވެ.
އެހީ ފޯރުކޮށްދިނުމަށް ހުރަސްއެޅުމާއި، އިންސާނީ ޚިދުމަތުގައި ހަރަކާތްތެރިވާ މުވައްޒަފުންނަށް އަމާޒުކޮށް ހަމަލާތައް ދިނުން ކުށްވެރިކުރައްވަމުން، މިހާރުން މިހާރަށް ދާއިމީ ގޮތެއްގައި ހަމަލާތައް ހުއްޓާލުމަށް ކުރައްވާ ގޮވާލެއްވުން ރައީސް ވަނީ އަނެއްކާވެސް ތަކުރާރުކުރައްވާފައެވެ.
އެހެން މީހުންގެ ފުރާނަ ސަލާމަތްކުރުމަށްޓަކައި އަމިއްލަ ފުރާނައިން ގުރުބާންވި ފަރާތްތަކުގެ އަގުވަޒަންކުރައްވަމުން، ބައިނަލްއަގުވާމީ އިންސާނީ ގާނޫނުތައް ނެގެހެއްޓުމަށާއި، ހުރިހާ އެހީތެރިންގެ ރައްކާތެރިކަން ކަށަވަރުކުރުމަށް އެންމެން ގުޅިގެން މަސައްކަތްކުރުމަކީ ކޮންމެހެން ބޭނުންތެރި ކަމެއްކަމަށް އެމަނިކުފާނު ވިދާޅުވިއެވެ.
ކޮންމެ އަހަރެއްގެ އޮގަސްޓް މަހުގެ 19 ވަނަ ދުވަހު ފާހަގަކުރާ ދުނިޔޭގެ އިންސާނީ އެހީތެރިކަމުގެ ދުވަހަކީ، އިންސާނީ ޚިދުމަތުގައި އުޅެނިކޮށް ފުރާނަ ގެއްލުނު ނުވަތަ އަނިޔާވި ފަރާތްތަކުގެ ޒިކުރާ އާކުރުމުގެ އިތުރުން، ކާރިސާތަކުގައި ގެއްލުން ލިބޭ އާންމުންނާއި އެހީދޭ މީހުންގެ ހިމާޔަތް ކަށަވަރުކުރުމަށް ދުނިޔޭގެ ސަމާލުކަން ހޯދުމަށް ފާހަގަކުރާ ދުވަހެކެވެ.
ކޮމެންޓް (0)
ލޯޑް ކުރަމުން...