މެރިކަލްޗަރ ދާއިރާއިން މީހުން ތަމްރީނުކުރުމުގެ ޕްރޮގްރާމެއް ނިންމާލައިފި

ރާއްޖޭގައި މެރިކަލްޗަރ ސިނާއަތެއް ގާއިމުކޮށް ފުޅާކުރުމަށް ސަރުކާރުން ކުރައްވަމުންދާ މަސައްކަތްތަކުގެ ތެރެއިން، މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމްގެ ދަށުން ކުރިއަށްގެންދިޔަ މިއަހަރުގެ ދެވަނަ ބޭސިކް މެރިކަލްޗަރ ޓްރެއިނިންގ ކޯސް ނިންމާލައި ބައިވެރިންނަށް ސެޓްފިކެޓް ދީފިއެވެ.

ކ. މަނިޔަފުށީ ރިސާރޗް އެންޑް ޓްރެއިނިންގ ފެސިލިޓީގައި އޮގަސްޓް 8 އިން 19 އަށް ކުރިއަށްގެންދިޔަ މި ކޯހަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ “ހަފްތާ 14” މަގުޗާޓުގައި ހިމެނޭ، ފަރުމަސް އާލާކުރުމަށް ބޭނުންވާ ހެޗަރީތައް ގާއިމުކުރުމާއި އެކުއަކަލްޗަރގެ ހުނަރުތައް ޒުވާނުންނަށް ދަސްކޮށްދިނުމުގެ ސިޔާސަތުގެ ދަށުން ހިންގުނު ޕްރޮގްރާމެކެވެ.

މި ކޯސް ނިންމުމުގެ ހަފްލާ ޝަރަފުވެރިކޮށްދެއްވައި ވާހަކަދައްކަވަމުން މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، މެރިކަލްޗަރ ދާއިރާއިން މީހުން ބިނާކުރުމަށް ކުރިން އަހަރަކު ދެ ޕްރޮގްރާމް ހިންގި ނަމަވެސް، ރައީސުލްޖުމްހޫރިއްޔާގެ އިރުޝާދާއެކު މިއަހަރުން ފެށިގެން އަހަރަކު ހަތަރު ޕްރޮގްރާމް ކުރިއަށްގެންދެވޭނެ ކަމަށެވެ.

މިއީ މި ސިލްސިލާގެ ދަށުން ހިންގުނު 6 ވަނަ ތަމްރީނު ޕްރޮގްރާމަށްވާއިރު، މިހާތަނަށް ސަރުކާރުން ވަނީ މެރިކަލްޗަރ ދާއިރާއިން 76 މީހަކު ތަމްރީނުކޮށްފައެވެ. އަދި ރާއްޖޭގެ އަތޮޅުތަކުން 8 ބައިވެރިން ބައިވެރިވި މިފަހަރުގެ ކޯހުގައި އެކުއަކަލްޗަރ ނިޒާމުތަކާއި، ދިރޭ ކާނާ އާލާކުރުމާއި، ފާނައާއި ހުއިފިލަނޑާ އަދި މާގަނޑުމަސް ފަދަ ބާވަތްތައް އާލާކުރުމުގެ އަމަލީ ތަޖުރިބާއާއި ތިމާވެށްޓާ ރައްޓެހި ގޮތްތައް ވަނީ ދަސްކޮށްދީފައެވެ.

ވޯލްޑް ބޭންކުގެ އެހީގައި ހިންގާ ޓްރާންސްފޯމް ޕްރޮޖެކްޓުގެ އެހީތެރިކަމާއެކު މޯލްޑިވްސް މެރިން ރިސާރޗް އިންސްޓިޓިއުޝަނުން ކުރިއަށްގެންދާ މި ތަމްރީނުތަކުގެ ތިންވަނަ ކޯސް އާންމުންނަށް ހުޅުވާލައިގެން ކުރިއަށް އޮތް އޮކްޓޯބަރު މަހު ބޭއްވުމަށް ވަނީ ހަމަޖެހިފައެވެ.