ޣައްޒާގެ މަސްރަހާ ގުޅޭގޮތުން ސައުދީ އާއި ފަލަސްތީނުން މަޝްވަރާކުރައްވައިފި

ޣައްޒާގެ މަސްރަހާ ގުޅޭގޮތުން ސައުދީ ޚާރިޖީ ވަޒީރާއި ފަލަސްތީނުގެ ނައިބު ރައީސް މަޝްވަރާ ކުރައްވައިފިއެވެ.

ސައުދީ އަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރްހާން، ފަލަސްތީނުގެ ނައިބު ރައީސް ޙުސައިން އަލް-ޝައިޚާ ފޯނުން ގުޅުއްވައި، ޣައްޒާ އާއި ފަލަސްތީނުގެ އިސްތިއުމާރު ކުރެވިފައިވާ ބިންތަކުގެ މިހާރުގެ ހާލަތާ ގުޅޭގޮތުން މަޝްވަރާ ކުރައްވައިފިއެވެ.

ސައުދީ ޕްރެސް އެޖެންސީން ރިޕޯޓްކޮށްފައިވާ ގޮތުގައި، ހޯމަ ދުވަހު ބޭއްވި މި މަޝްވަރާތަކުގައި މައިގަނޑު ގޮތެއްގައި އަލިއަޅުވާލާފައިވަނީ ފަލަސްތީނުގެ ރައްޔިތުންގެ ހައްގުތައް ކަށަވަރުކުރުމަށްޓަކައި ގުޅިގެން ކުރާ މަސައްކަތްތައް ވަރުގަދަކުރުމުގެ މައްޗަށެވެ. މީގެ އިތުރުން ސަރަޙައްދީ ފެންވަރުގައި ހުރި މުހިންމު އެކި ކަންކަމާ ގުޅޭގޮތުން ވެސް ދެބޭފުޅުން ވާހަކަފުޅު ދެއްކެވިއެވެ.

ފަލަސްތީނުގެ ނިއުސް އެޖެންސީން މަޢުލޫމާތު ދޭ ގޮތުގައި، އަރަބި ގައުމުތަކުގެ ގައުމީ ސަލާމަތަށް ކުރިމަތިވާ ނުރައްކާތަކާ ދެކޮޅަށް ފަލަސްތީނުން އަރަބި ގައުމުތަކާއެކު ސާބިތުކަމާއެކު އޮތްކަން އަލް-ޝައިޚް ކަށަވަރުކޮށްދެއްވިއެވެ. އަދި އީރާނުން އަރަބި ގައުމުތަކަށް ކުރިމަތިކުރާ އުދުވާނީ އަމަލުތައް އޭނާ ކުށްވެރިކުރެއްވިއެވެ.

މީގެ އިތުރުން، އިސްރާއީލުން ހިންގަމުންދާ ލާއިންސާނީ އަމަލުތައް އިތުރުވަމުންދާ މައްސަލައާ ގުޅޭގޮތުން ވެސް ދެބޭފުޅުން މަޝްވަރާ ކުރެއްވިއެވެ. މީގެ ތެރޭގައި ހުޅަނގު އައްސޭރީގައި އަލަށް 34 އާބާދީއެއް ގާއިމުކުރަން ނިންމުމާއި، އެ އާބާދީތައް ގުޅުވައިދީ ފަލަސްތީނުގެ މުޖުތަމައުތައް އެކަހެރިކޮށް ބައިބައިކުރުމަށްޓަކައި ހަދަމުންދާ މަގުތަކުގެ ވިއުގައާ ބެހޭގޮތުން ދެބޭފުޅުން ކަންބޮޑުވުން ފާޅުކުރެއްވިއެވެ.