މިއާމީގައި ކުޅެވުނު ފޯރިގަދަ ކުއާޓާ ފައިނަލް މެޗުގައި ނޯވޭގެ މައްޗަށް 2-1 ގެ ނަތީޖާއަކުން ކުރިހޯދައި، އިނގިރޭސި ގައުމީ ޓީމުން ފީފާ ވޯލްޑް ކަޕް ފުޓްބޯޅަ މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.
އިތުރު ވަގުތުގެ ދެ ހާފަށް ދެމިގެންދިޔަ މި ކުރިމަތިލުމުގައި އިންގްލެންޑުން މޮޅުވި ލަނޑު ޖަހައިދިނީ އެ ޓީމުގެ ތަރި ޖޫޑް ބެލިންހަމް އެވެ. މިއީ 2018 ވަނަ އަހަރުގެ ފަހުން އިންގްލެންޑުން ދުނިޔޭގެ އެންމެ ޝަރަފްވެރި މުބާރާތުގެ ސެމީ ފައިނަލަށް ދަތުރުކުރި ފުރަތަމަ ފަހަރެވެ.
މުޅި މެޗަށް ބަލާއިރު ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ކުރިހޯދީ ނޯވޭ އިންނެވެ. މެޗުގެ 36 ވަނަ މިނިޓުގައި ނޯވޭގެ އަންޑްރެސް ޝެލްޑްރަޕް އަރިމަތިން ފޮނުވާލި ހުރަހެއް، އިންގްލެންޑްގެ ކީޕަރު ޖޯޑަން ޕިކްފޯޑްގެ ބޯމަތިން ގޮސް ގޯލުގެ ދަނޑީގައި ޖެހިފައި ވަނީ އެތެރެއަށެވެ.
މި ލަނޑަށްފަހު ނޯވޭއަށް ލީޑު ފުޅާކުރުމަށް ރަނގަޅު ރެޑީމޭޑް ފުރުސަތެއް ލިބުނު ނަމަވެސް، ކައުންޓަ އެޓޭކެއްގައި އަލެކްސަންޑަ ސޯލޯތު ފޮނުވާލި ހަމަލާ އިންގްލެންޑްގެ ޑިފެންޑަރުން ވަނީ ބްލޮކްކޮށްފައެވެ. މި ފުރުސަތުގައި މުޅިން ހުސްކޮށް ހުރި އެ ޓީމުގެ އިތުބާރު ފޯވާޑް އާލިން ބްރައުޓް ހާލަންޑަށް ބޯޅަ ތަނަވަސްކޮށްދިނުމުގެ ބަދަލުގައި ސޯލޯތު އަމިއްލައަށް ހަމަލާ އުފައްދަން އުޅުމުގެ ނަތީޖާއަކަށްވީ ނޯވޭއަށް ލިބުނު ރަން ފުރުސަތު ގެއްލުމެވެ.
ނޯވޭ އިން ލީޑުގައި އޮވެ ފުރަތަމަ ހާފު ނިންމާލަން ތައްޔާރުވަމުން ދަނިކޮށް، އިންގްލެންޑުން ވަނީ ހާފުގެ އިތުރު ވަގުތުގެ ތެރޭގައި ނަތީޖާ އެއްވަރުކޮށްފައެވެ. އެންތަނީ ގޯޑަން ތަނަވަސްކޮށްދިން ފުރުސަތަކުން، އޭރިއާ ތެރޭގައި ހަމަޖެހިލާފައި ބެލިންހަމް ފޮނުވާލި ހަމަލާ އަމާޒުވީ ގޯލުގެ ދުރު ކަނަށެވެ.
ދެވަނަ ހާފު ފެށިގެން ގިނައިރެއް ނުވަނީސް ނޯވޭގެ ޓޯބްޖޯން ލައިސަކާ ހެގެމް ގޯލެއް ޖެހި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) ބެލުމަށްފަހު ނިންމީ އެއީ ގޯލެއް ނޫން ކަމަށެވެ. އެއީ އެ ބޯޅަ ހޯދުމުގެ ތެރޭގައި ހާލަންޑް ފައުލްކޮށްފައިވާތީއެވެ.
މެޗުގެ ފުރިހަމަ ވަގުތު ހަމަވިއިރު 1-1 އިން ދެ ޓީމު އެއްވަރުވެފައި އޮތުމުން، ނަތީޖާ ނެރުމަށް ކުޅުނު އިތުރު ވަގުތުގެ ފުރަތަމަ ހާފުގެ ކުރީކޮޅު އިންގްލެންޑުން ވަނީ މެޗުގެ ލީޑު ނަގާފައެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި މޯގަން ރޮޖާސް ފޮނުވާލި ހަމަލާ ނޯވޭގެ ކީޕަރު އަތުގައި ޖެހިފައި ނުކުތް ވަގުތު، ބެލިންހަމް ވަނީ ހުޝިޔާރުކަމާއެކު އެ ބޯޅަ ގޯލުގެ ތެރެއަށް ފޮނުވާލައި އިންގްލެންޑަށް މޮޅުކޮށްދީފައެވެ.
މި މެޗުން ބަލިވި ނަމަވެސް، މިއީ ނޯވޭގެ ފުޓްބޯޅަ ތާރީޚުގައި އެ ޓީމުން ވޯލްޑް ކަޕެއްގެ ކުއާޓާ ފައިނަލުގައި ވާދަކުރި ފުރަތަމަ ފަހަރެވެ. ސެމީ ފައިނަލުގައި އިންގްލެންޑް ބައްދަލުކުރަން ޖެހޭނީ އާޖެންޓީނާ އާއި ސްވިޒަލެންޑް ބައްދަލުކުރާ މެޗުން މޮޅުވާ ޓީމަކާއެވެ.
