ވޯލްޑް ކަޕް 2026: އިތުރު ވަގުތުގެ ލަނޑުން ޖަރުމަނުން އައިވަރީ ކޯސްޓް ބަލިކޮށްފި
2026 ގެ ފީފާ ވޯލްޑް ކަޕްގެ ގްރޫޕް އީގައި ޖަރުމަނާއި އައިވަރީ ކޯސްޓް ބައްދަލުކުރި ފޯރިގަދަ މެޗު، ފަހަތުން އަރައި 2-1 ގެ ނަތީޖާއަކުން ޖަރުމަނުން ކާމިޔާބުކޮށްފިއެވެ.
ޓޮރޮންޓޯ ސްޓޭޑިއަމްގައި ކުޅުނު މި މެޗުގައި ފުރަތަމަ ލަނޑު ޖަހައި ކުރިހޯދީ އައިވަރީ ކޯސްޓުންނެވެ. މެޗުގެ 30 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ފްރޭންކް ކެސިއޭއެވެ.
އައިވަރީ ކޯސްޓުން ލީޑުގައި އޮވެ މެޗުގެ ބޮޑުބައި ފުރިހަމަކުރި ނަމަވެސް، ޖަރުމަނުން ވަނީ ދެވަނަ ހާފުގައި ކުޅުން ރަނގަޅުކޮށް މެޗުގެ އޮއިވަރު ބަދަލުކޮށްލާފައެވެ. ޖަރުމަނަށް މެޗުގެ ނަތީޖާ ހަމަހަމަކޮށްދިނީ 68 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ޑެނިޒް އުންޑާވްއެވެ.
މެޗުން ޖަރުމަނު މޮޅުވި ލަނޑު ވެސް ފެނިގެންދިޔައީ އުންޑާވްގެ ފަރާތުންނެވެ. މި ލަނޑު އޭނާ ކާމިޔާބުކުރީ މެޗުގެ ފުރިހަމަވަގުތު ހަމަވެގެން ދެއްކި އިތުރުވަގުތުގެ ތެރޭގައި، 94 ވަނަ މިނެޓުގައެވެ. މި ލަނޑާއެކު އުންޑާވް ވަނީ މިފަހަރުގެ ވޯލްޑް ކަޕްގައި ބަދަލު ކުޅުންތެރިއެއްގެ ގޮތުގައި ކުޅެން ނިކުމެ 3 ލަނޑާއި 2 އެސިސްޓް ހަމަކޮށްފައެވެ.
މި މޮޅާއެކު ޖަރުމަނަށް ވަނީ ގްރޫޕް ސްޓޭޖުގައި ކުޅުނު ދެ މެޗުން 6 ޕޮއިންޓް ލިބި، ގްރޫޕްގެ އެއްވަނަ މަގާމާއެކު ނޮކްއައުޓް ބުރުގެ ޖާގައެއް ކަށަވަރުވެފައެވެ. ބަލިވި އައިވަރީ ކޯސްޓް 3 ޕޮއިންޓާއެކު ގްރޫޕްގެ ދެވަނައިގައި އޮތްއިރު، އެ ޓީމަށް ދެން އޮންނަ މެޗުން މޮޅުވެގެން މުބާރާތުގެ އަނެއް ބުރަށް ދިއުމުގެ ފުރުސަތު އަދިވެސް އެބައޮތެވެ.
މި މެޗުގެ މޭން އޮފް ދަ މެޗަކަށް ހޮވުނީ ޖަރުމަނު ޓީމު މޮޅުކޮށްދިނުމުގައި އެންމެ މުހިންމު ދައުރެއް އަދާކުރި ޑެނިޒް އުންޑާވްއެވެ. ދެވަނަ ހާފުގައި ކުޅެން ނިކުމެ، ދެ ލަނޑު ޖަހައި މެޗުގެ ނަތީޖާ އަނބުރާލުމުން އޭނާ ވެގެންގޮސްފައިވަނީ ޖަރުމަނު ޓީމުގެ ބަތަލަށެވެ.
