އެމެރިކާއިން އީރާނުގެ އަސްކަރީ މަރުކަޒުތަކަށް ހަމަލާދީފި

އެމެރިކާއިން އީރާނުގެ އަސްކަރީ މަރުކަޒުތަކަކަށް ހަމަލާދީފި ކަމަށާއި، އޭގެ ރައްދުގައި އީރާނުން އެމެރިކާގެ ވައިގެ ބޭހަކަށް ހަމަލާދީފި ކަމަށް ދެގައުމުން ހާމަކޮށްފިއެވެ.

ދުބާއީ: ތިން މަސްދުވަހަށް ދެމިގެންގޮސްފައިވާ ހަނގުރާމަ ހުއްޓާލުމުގެ މަޝްވަރާތައް ކުރިއަށްދަނިކޮށް، ނިމިދިޔަ ބަންދު ދުވަސްތަކުގައި އީރާނުގެ އަސްކަރީ މަރުކަޒުތަކަކަށް ހަމަލާދީފައިވާނެ ކަމަށް އެމެރިކާއިން ބުނެފިއެވެ. އަދި އޭގެ ރައްދުގައި އެމެރިކާގެ އަސްކަރީ މަރުކަޒަކަށް ހަމަލާދީފައިވާނެ ކަމަށް އީރާނުގެ ރިވޮލިއުޝަނަރީ ގާޑްސްއިން ހޯމަ ދުވަހު ވަނީ ބުނެފައެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އެކްސްގައި ކުރި ޕޯސްޓެއްގައި ބުނެފައިވަނީ، އީރާނުގެ ގަލްފް އައްސޭރިފަށަށް ދިން މި ހަމަލާތަކަކީ ބައިނަލްއަގުވާމީ ކަނޑުގެ ސަރަހައްދުގައި އޮޕަރޭޓް ކުރަމުންދިޔަ އެމެރިކާގެ އެމް.ކިއު-1 މަރުކާގެ ޑްރޯންއެއް ވައްޓާލުން ހިމެނޭހެން، އީރާނުން ހިންގަމުންދާ އިސްތިއުމާރީ އަމަލުތަކަށް ރައްދު ދިނުމުގެ ގޮތުން ދިން ހަމަލާތަކެއް ކަމަށެވެ.

ސެންޓްކޮމްއިން އިތުރަށް ހާމަކުރި ގޮތުގައި، އެމެރިކާގެ ހަނގުރާމަމަތީ މަތިންދާބޯޓުތަކުން ވަނީ އީރާނުގެ ވައިގެ ދިފާއީ ނިޒާމުތަކާއި، ބިމުން ކޮންޓްރޯލްކުރާ ސްޓޭޝަނަކާއި، ސަރަހައްދީ ކަނޑުތަކުން ދަތުރުކުރާ އުޅަނދުފަހަރަށް ނުރައްކާވާ ފަދަ ގޮތަކަށް އޮޕަރޭޓް ކުރަމުންދިޔަ ދެ ޑްރޯންއެއް ނައްތާލާފައެވެ. އަދި މިހާރު އިއުލާންކޮށްފައިވާ ހަމަލާބަދަލުކުރުން ހުއްޓާލުމުގެ މުއްދަތުގައިވެސް، އެމެރިކާގެ މަސްލަހަތުތައް ހިމާޔަތްކުރުމުގައި ދެމިތިބޭނެ ކަމަށް އެމެރިކާއިން ބުނެއެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސްއިން ބުނި ގޮތުގައި، އެމެރިކާއިން ދިން ހަމަލާތަކުގެ ރައްދުގައި، އެމެރިކާއިން ބޭނުންކުރާ ވައިގެ ބޭހަކަށް ހޯމަ ދުވަހު ވަނީ ހަމަލާދީފައެވެ. ނަމަވެސް އެއީ ކޮން ބޭހެއް ކަމެއް ހާމަކޮށްފައެއް ނުވެއެވެ.

ކުވެއިތުގެ ރަސްމީ ނޫސް އެޖެންސީ ‘ކޫނާ’ އިން ރިޕޯޓްކޮށްފައިވާ ގޮތުގައި، އެމެރިކާގެ ބޮޑު އަސްކަރީ މަރުކަޒެއް ހުންނަ ކުވެއިތުގެ އެކި ސަރަހައްދުތަކުގައި ނުރައްކަލުގެ ރަނގަބީލު ޖަހާފައިވާއިރު، އެ ގައުމުގެ ވައިގެ ދިފާއީ ނިޒާމުން ވަނީ މިސައިލާއި ޑްރޯން ހަމަލާތަކެއް ހޯމަ ދުވަހު ހުއްޓުވާފައެވެ.

އޭޕްރީލް މަހުގެ ކުރީކޮޅުން ފެށިގެން ހަމަލާބަދަލުކުރުން ހުއްޓާލުމަށް އެއްބަސްވެފައިވީ ނަމަވެސް، ދާއިމީ ހައްލެއް ހޯދުމަށް ކުރެވޭ މަޝްވަރާތައް ދިގުލައިގެން ދިއުމާ ގުޅިގެން، އެމެރިކާއާއި އީރާނާ ދެމެދު ދޭތެރެ ދޭތެރެއިން ހަމަލާތައް ބަދަލުކުރެވެއެވެ. މިދިޔަ ބުރާސްފަތި ދުވަހުވެސް މިފަދަ ހަމަލާތަކެއް ބަދަލުކުރެވިފައިވާކަން ދެގައުމުންވެސް ވަނީ ފާހަގަކޮށްފައެވެ.

ފެބްރުއަރީ 28 ވަނަ ދުވަހު އެމެރިކާއާއި އިޒްރޭލުން ފެށި މި ހަނގުރާމައިގައި، މައިގަނޑު ގޮތެއްގައި އީރާނާއި ލުބުނާނުން އެތައް ހާސް ބަޔަކު ވަނީ މަރުވެފައެވެ. މީގެ އިތުރުން، އީރާނުން ހޯމުޒް ކަނޑުއޮޅި ބަންދުކުރުމާ ގުޅިގެން ހަކަތައިގެ އަގުތައް އުފުލި، ދުނިޔޭގެ އިގްތިސާދަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ، މި ހަނގުރާމައިގެ މައިގަނޑު މަގްސަދަކީ އީރާނުން ނިއުކްލިއާ ހަތިޔާރު އުފެއްދުން ހުއްޓުވުން ކަމަށެވެ. ނަމަވެސް އީރާނުން މިކަން އަބަދުވެސް ދޮގުކުރެއެވެ.

ނޮވެމްބަރު މަހު އޮންނަ ކޮންގްރެސް އިންތިޚާބުގެ ކުރިން، ތެލުގެ އަގު ތިރިކުރުމަށާއި ހޯމުޒް ކަނޑުއޮޅި ހުޅުވުމަށް ޓްރަމްޕަށް ވަނީ ބޮޑު ޕްރެޝަރެއް ކުރިމަތިވެފައެވެ. ހަމައެއާއެކު، އީރާނަށް ދޫދިނުމާ މެދު އޭނާގެ އަމިއްލަ ޕާޓީގެ ހަރުކަށި ފިކުރުގެ މެންބަރުންގެ ނުރުހުން އަމާޒުވުމުގެ ބިރުވެސް އެބައޮތެވެ.

ދެގައުމުގެ ދެމެދުގައި އަދިވެސް ހައްލުނުވެ ހުރި ކަންތައްތަކުގެ ތެރޭގައި، އީރާނަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށާއި، ބޭރުގެ ބޭންކުތަކުގައި ހިފަހައްޓާފައިވާ އީރާނުގެ ބިލިއަނުން ގުނޭ ތެލުގެ އާމްދަނީ ދޫކޮށްލުމަށް އީރާނުން ކުރާ ޑިމާންޑްތައް ހިމެނެއެވެ.

މީގެ އިތުރުން، ލުބުނާނުގައި ހަރަކާތްތެރިވާ އީރާނުގެ މަދަދުލިބޭ ހިޒްބުالله ޖަމާއަތާއެކު އިޒްރޭލުން ކުރަމުންދާ ހަނގުރާމައަކީވެސް ސުލްހައިގެ މަގަށް އޮތް ބޮޑު ހުރަހެކެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާދިއްތަ ދުވަހު ވިދާޅުވީ، ހިޒްބުالله އާ ދެކޮޅަށް ކުރާ ހަނގުރާމައިގައި ލުބުނާނުގެ އެތެރެއަށް އިތުރަށް ވަނުމަށް ސިފައިންނަށް އަމުރުކޮށްފައިވާ ކަމަށެވެ.

އެމެރިކާގެ ޚާރިޖީ ވަޒީރު މާކޯ ރޫބިއޯ ވަނީ އިޒްރޭލާއި ލުބުނާނާ ދެމެދު ކުރިއަށްދާ ޑިޕްލޮމެޓިކް މަޝްވަރާތަކާ ގުޅޭގޮތުން ލުބުނާނުގެ ރައީސް ޖޯސެފް އައުން އާއި ނަތަންޔާހޫއާ ވާހަކަދައްކަވާފައެވެ. އަދި މަޑުމަޑުން ހަމަލާތައް މަދުކުރުމަށް އެމެރިކާއިން މިހާރު ވަނީ ޕްލޭނެއް ހުށަހަޅާފައެވެ.