ކަނޑުގަދަވެގެން ތޮއްޑޫ ލޯންޗެއް އަޑިއަށްދަނިކޮށް، ފުލުހުން ނިކުމެ 25 މީހަކު ސަލާމަތްކޮށްފި
މޫސުން ގޯސްވެ ކަނޑުގަދަވުމުގެ ސަބަބުން، މާލެއިން ފުރައިގެން އއ. ތޮއްޑޫއަށް ދަތުރުކުރި “ރިލެކްސް އައިޝާ” ލޯންޗު ދިޔަވެ، ކަނޑުމަތީގައި ބިރުވެރި ހާދިސާއެއް ހިނގަމުންދަނިކޮށް އޭގެއިން ދަތުރުކުރި 25 މީހުން ފުލުހުންގެ އެހީތެރިކަމާއެކު ސަލާމަތްކޮށްފިއެވެ.
މެރިން ޕޮލިސްއިން ބުނި ގޮތުގައި މި ހާދިސާގެ ރިޕޯޓު ލިބިފައިވަނީ ހޯމަ ދުވަހުގެ ހަވީރު 17:30 ހާއިރުއެވެ.
ލޯންޗު ދިޔަވަމުންދާ ކަމުގެ މަޢުލޫމާތު ލިބުމާއެކު ފުލުހުންގެ ޓީމެއް ވަނީ ލަސްނުކޮށް އެ ސަރަހައްދަށް ގޮސްފައެވެ. އަދި އުޅަނދު އަޑިއަށްދިއުމުގެ ކުރިން، އޭގައި ތިބި ހުރިހާ މީހުން ރައްކާތެރިކަމާއެކު ފުލުހުންގެ ކަނޑުގެ އުޅަނދަށް ނަގައި، މިހާރު ވަނީ މާލެއަށް ބާލާފައެވެ.
މި ހާދިސާއާ ގުޅިގެން ކަމާބެހޭ އިދާރާތަކުން ބުނީ، މިދުވަސްވަރަކީ ރާއްޖޭގެ ބޮޑު ސަރަހައްދަކަށް މޫސުން ގޯސް ދުވަސްވަރަކަށް ވުމުން ކަނޑުދަތުރުފަތުރު ކުރުމުގައި ހާއްސަ ސަމާލުކަމެއް ދޭންޖެހޭ ކަމަށެވެ. އެގޮތުން ދަތުރަށް ފުރުމުގެ ކުރިން މޫސުމީ އެންމެ ފަހުގެ މަޢުލޫމާތު އޮޅުންފިލުވުމަށާއި، އުޅަނދުގައި ހުންނަންޖެހޭ ސަލާމަތީ ވަސީލަތްތައް ހަމައަށް ހުރިތޯ ޔަގީންކުރުމަށް ފުލުހުން ވަނީ ހުރިހާ ފަރާތްތަކަކަށް އިލްތިމާސްކޮށްފައެވެ.
