އަފްޣާނިސްތާނަށް ކުރި ވިއްސާރައިގައި ފެންބޮޑުވެ 24 މީހުން މަރުވެއްޖެ
ފާއިތުވި 48 ގަޑިއިރުގެ ތެރޭގައި އަފްޣާނިސްތާނުގެ އެކި ސަރަޙައްދުތަކަށް ބޯކޮށް ވާރޭވެހި، ފެންބޮޑުވުމުގެ ސަބަބުން މަދުވެގެން 24 މީހުން މަރުވެފައިވާ ކަމަށް އެ ޤައުމުގެ ކަމާބެހޭ އިދާރާތަކުން ހުކުރު ދުވަހު ހާމަކޮށްފިއެވެ.
ވޭތުވެދިޔަ 24 ގަޑިއިރުގެ ތެރޭގައި އެކަނިވެސް، އުތުރުގެ ބަޣްލާން ޕްރޮވިންސުން 15 މީހުން، އިރުއުތުރުގެ ބަދަޚްޝާން ޕްރޮވިންސުން ދެ މީހުން، އަދި މެދުތެރޭ ވަރްދާކް ޕްރޮވިންސުން އެކަކު ވަނީ ފެންބޮޑުވުމުގެ ހާދިސާތަކުގައި މަރުވެފައެވެ.
ބަޣްލާންގެ ގަވަރުނަރުގެ ތަރުޖަމާނު ފާރޫޤް އަޚްޕްލަވަކް ވިދާޅުވި ގޮތުގައި، ފެންބޮޑުވުމުގެ ސަބަބުން 15 މީހުން މަރުވުމުގެ އިތުރުން އެތައް ބަޔަކަށް ވަނީ އެކިވަރުގެ އަނިޔާތައް ލިބިފައެވެ.
ބަދަޚްޝާންގެ އޮފިޝަލަކު މަޢުލޫމާތު ދެއްވި ގޮތުގައި، އެ ސަރަޙައްދުން ދެ މީހަކު މަރުވެ، އިތުރު ދެ މީހަކު ވަނީ ގެއްލިފައެވެ. އަދި 100 އަށްވުރެ ގިނަ ގެދޮރަށް ވަނީ ބޮޑެތި ގެއްލުންތަކެއް ލިބިފައެވެ.
މިދިޔަ ބުދަ ދުވަހުން ފެށިގެން އަފްޣާނިސްތާނުގެ ބޮޑު ބަޔަކަށް ބޯކޮށް ވާރޭވެހެމުންދާއިރު، ގިނަ ޕްރޮވިންސްތަކެއްގައި ވަނީ ފެންބޮޑުވެފައެވެ. މީގެ އިތުރުން، ބުރާސްފަތި ދުވަހުވެސް އެކި ސަރަޙައްދުތަކުން ހަ މީހަކު ވަނީ މަރުވެފައެވެ.
އަފްޣާނިސްތާނުގެ ޑިޒާސްޓަރ މެނޭޖްމަންޓް އޮތޯރިޓީ (ANDMA) ގެ ތަރުޖަމާނު މުޙައްމަދު ޔޫސުފް ޙައްމާދު ބުރާސްފަތި ދުވަހު ވިދާޅުވީ، ވޭތުވެދިޔަ 24 ގަޑިއިރުގެ ތެރޭގައި ހަ މީހުން މަރުވެ، 11 މީހަކަށް އަނިޔާވެފައިވާ ކަމަށެވެ.
ނިމިދިޔަ މާރިޗު މަހުގެ ފަހުކޮޅުން ފެށިގެން އަފްޣާނިސްތާނަށް ކުރިމަތިވަމުންދާ ވިއްސާރައިގެ ސަބަބުން ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތައް ހިނގައި، ގެދޮރަށާއި ދަނޑުބިންތަކަށް ބޮޑެތި ގެއްލުންތަކެއް ވަނީ ލިބިފައެވެ. މީގެ ކުރިން މިދިޔަ އޭޕްރީލް މަހު ކުރި ވިއްސާރައިގައިވެސް އެ ޤައުމުގެ އެކި ކަންކޮޅުތަކުން މަދުވެގެން 148 މީހުން މަރުވެ، 137 މީހުންނަށް އަނިޔާވެފައިވެއެވެ.
އަފްޣާނިސްތާނަކީ އާންމުކޮށްވެސް ފެންބޮޑުވުމާއި ބިންގަނޑު ކަނޑައިގެން ދިއުން ފަދަ ޤުދުރަތީ ހާދިސާތައް ގިނައިން ހިނގާ ޤައުމެކެވެ. ޚާއްޞަކޮށް އުމްރާނީ ވަސީލަތްތައް ބަލިކަށި ދުރު ހިސާބުތަކުގައި މިފަދަ ހާދިސާތަކުގެ ނުރައްކާ ބޮޑެވެ.
