ޕާކިސްތާނުން ހިންގި އޮޕަރޭޝަނެއްގައި 22 ހަނގުރާމަވެރިން މަރާލައިފި
އަފްޣާނިސްތާނުގެ ބޯޑަރު ކައިރީގައި އޮންނަ ޕާކިސްތާނުގެ ސަރަހައްދެއްގައި ހިންގި އަސްކަރީ އޮޕަރޭޝަނެއްގައި 22 ހަނގުރާމަވެރިން މަރާލައިފި ކަމަށް ޕާކިސްތާނުން ބުނެފިއެވެ.
ޕާކިސްތާނުގެ ހުޅަނގު އުތުރުގައި އޮންނަ ޚައިބަރު ޕަޚްތޫންޚުވާ (ކޭޕީ) ޕްރޮވިންސްގައި، ޖާސޫސީ މައުލޫމާތަށް ބިނާކޮށް ސަލާމަތީ ބާރުތަކުން ހިންގި ގުޅިފައިވާ އޮޕަރޭޝަނެއްގައި ޕާކިސްތާނު ތާލިބާނުންގެ މަދުވެގެން 22 ހަނގުރާމަވެރިން މަރާލާފައިވާ ކަމަށް އެ ގައުމުގެ އަސްކަރިއްޔާއިން ހުކުރު ދުވަހު ވަނީ ހާމަކޮށްފައެވެ. މިއީ އަފްޣާނިސްތާނާ ބޯޑަރު ހިއްސާކުރާ އެ ސަރަހައްދުގައި ހިނގި އެންމެ ފަހުގެ ކުރިމަތިލުމެވެ.
2021 ވަނަ އަހަރު އަފްޣާން ތާލިބާނުން އަލުން ވެރިކަމަށް އައި ފަހުން، ޕާކިސްތާނު ތާލިބާނުން ދެމުންދާ ހަމަލާތައް އިތުރުވެފައިވާއިރު، އެކަން ކޮންޓްރޯލް ކުރުމަށް ޕާކިސްތާނު ސަރުކާރަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ.
ޕާކިސްތާނު އަސްކަރިއްޔާގެ މީޑިއާ ވިންގް ކަމަށްވާ އިންޓަރ-ސާވިސަސް ޕަބްލިކް ރިލޭޝަންސް (އައި.އެސް.ޕީ.އާރު) އިން ބުނި ގޮތުގައި، ސަލާމަތީ ބާރުތަކާއި ފުލުހުން ގުޅިގެން މި އޮޕަރޭޝަން ހިންގާފައިވަނީ ޚައިބަރު ޑިސްޓްރިކްޓްގައި ޕާކިސްތާނު ތާލިބާނުން ހަރަކާތްތެރިވާ ކަމަށް ލިބުނު މައުލޫމާތަކާ ގުޅިގެންނެވެ.
މި އޮޕަރޭޝަންގައި މަރާލި ހަނގުރާމަވެރިންގެ އަތުން ގިނަ އަދަދެއްގެ ހަތިޔާރާއި ވަޒަން އަތުލައިގަނެވިފައިވާ ކަމަށް އަސްކަރިއްޔާއިން ބުނެއެވެ. ޕާކިސްތާނުން ތުހުމަތު ކުރާ ގޮތުގައި މިއީ އިންޑިއާގެ އެހީތެރިކަމާއެކު އެ ސަރަހައްދުގައި ޓެރަރިސްޓް ހަރަކާތްތައް ހިންގާ ބަޔެކެވެ. ނަމަވެސް، މި ތުހުމަތުތަކާ ގުޅިގެން އިންޑިއާގެ ނިއު ދިއްލީން އަދި ވަކި އެއްޗެއް ބުނެފައެއް ނުވެއެވެ.
އައި.އެސް.ޕީ.އާރުގެ ބަޔާނުގައި ބުނެފައިވާ ގޮތުގައި، އެ ސަރަހައްދުގައި އިތުރު ހަނގުރާމަވެރިން ތިބިތޯ ބަލައި، އެމީހުން ނައްތާލުމަށް “ސެނިޓައިޒޭޝަން” އޮޕަރޭޝަނެއް މިހާރު ދަނީ ކުރިއަށް ގެންދަމުންނެވެ. މީގެ އިތުރުން، ހަނގުރާމަވެރިން ދިން ބަދަލު ހަމަލާތަކުގެ ތެރޭގައި 10 އަހަރުގެ ކުޑަކުއްޖަކު މަރުވެފައިވާ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
ޕާކިސްތާނުން އަފްޣާނިސްތާނަށް ތުހުމަތު ކުރަނީ އެ ގައުމުގެ ބިން ބޭނުންކޮށްގެން ޕާކިސްތާނަށް ހަމަލާދިނުމުގެ ފުރުސަތު ދޭ ކަމަށެވެ. އަދި އިންޑިއާއިން ހަނގުރާމަވެރި ޖަމާއަތްތަކަށް އެހީތެރިކަން ފޯރުކޮށްދޭ ކަމަށްވެސް ޕާކިސްތާނުން ބުނެއެވެ. ނަމަވެސް އަފްޣާނިސްތާނާއި އިންޑިއާއިން ވަނީ މި ތުހުމަތުތައް ތަކުރާރުކޮށް ދޮގުކޮށްފައެވެ. އަފްޣާނިސްތާނާ ބޯޑަރު ހިއްސާކުރާ ޕާކިސްތާނުގެ ހުޅަނގު ސަރަހައްދުގައި ހަނގުރާމަވެރި ހަރަކާތްތައް އިތުރުވުމާ ގުޅިގެން، ދެ ގައުމުގެ ދެމެދުގައި އޮތް ގުޅުން ވަނީ ފާއިތުވި މަސްތަކުގައި ވަރަށް ބޮޑަށް ގޯސްވެފައެވެ.
މި ހަފުތާގެ ކުރީކޮޅުވެސް ކޭޕީގެ ބައްނޫ ޑިސްޓްރިކްޓްގައި ސަލާމަތީ ބާރުތަކުން ހިންގި އޮޕަރޭޝަނެއްގައި، އަމިއްލައަށް މަރުވެގެން ހަމަލާދޭން އުޅުނު މީހަކާއެކު ދެ ހަނގުރާމަވެރިން މަރާލާފައިވާ ކަމަށް އަސްކަރިއްޔާއިން ކުރިން ވަނީ ބުނެފައެވެ.
