އިނގިރޭސި ޕްރިމިއާ ލީގުގައި ރޭ މެންޗެސްޓާ ސިޓީގެ އަމިއްލަ ދަނޑުގައި އާސެނަލްއާ ވާދަކޮށް 2-1 އިން މޮޅުވެ، ލީގު ތަށި ހޯދުމުގެ އުއްމީދު ސިޓީން ބޮޑުކޮށްފިއެވެ.
މެޗުގެ 16 ވަނަ މިނިޓުގައި ރަޔާން ޗާކީ ޖެހި ލަނޑުން ސިޓީ ކުރި ހޯދާފައި ވަނިކޮށް، އާސެނަލްގެ ކައި ހަވާޓްޒް ވަނީ ސިޓީގެ ކީޕަރު ޑޮނަރުންމާއަށް ހެދުނު ގޯހެއްގެ ފައިދާނަގައި ނަތީޖާ އެއްވަރުކޮށްފައެވެ. ނަމަވެސް، މެޗުގެ 65 ވަނަ މިނިޓުގައި އާލިން ހާލަންޑް ކާމިޔާބުކުރި ލަނޑާއެކު ސިޓީން ވަނީ މުހިއްމު ތިން ޕޮއިންޓް ކަށަވަރުކޮށްފައެވެ.
މި މޮޅާއެކު ސިޓީ މިހާރު އޮތީ ތާވަލުގެ އެއްވަނައިގައި އޮތް އާސެނަލްއާ އެންމެ ތިން ޕޮއިންޓް ކައިރީގައެވެ. އާސެނަލް 33 މެޗުން 70 ޕޮއިންޓް ހޯދާފައިވާއިރު، ސިޓީން 32 މެޗުން ވަނީ 67 ޕޮއިންޓް ހޯދާފައެވެ. އެހެންކަމުން އަންނަ ބުދަ ދުވަހުގެ ރޭ ބާންލީ އަތުން ސިޓީ މޮޅުވެއްޖެ ނަމަ، އާސެނަލްއާ ޕޮއިންޓުގެ ގޮތުން އެއްވަރުވެ، އެއް މެޗު އިތުރަށް އޮތުމުން ލީގު ކާމިޔާބު ކުރުމުގެ ފުރުސަތު ސިޓީއަށް ބޮޑުވާނެއެވެ.
ޕެޕް ގާޑިއޯލާގެ އިރުޝާދުގެ ދަށުން ސިޓީން ހޯދި މި ކާމިޔާބީއަކީ މިކޭލް އާޓެޓާގެ އާސެނަލް އަތުން އެންމެ ފަހުން ކުޅުނު ފަސް މެޗުން މޮޅެއް ނުލިބި އޮތް އޮތުމަށް ނިމުމެއް ގެނައި މުހިއްމު މޮޅެކެވެ. ލީގުގެ އެހެން މެޗުތަކަށް ބަލާއިރު، ލިވަޕޫލުން ވަނީ ފަހު ވަގުތު ވެން ޑައިކް ޖެހި ލަނޑުން އެވަޓަން ބަލިކޮށްފައެވެ. އަދި އެސްޓަން ވިލާ އިން ސަންޑަލެންޑް ބަލިކުރިއިރު، ނޮޓިންހަމް ފޮރެސްޓުން ވަނީ ބާންލީގެ މައްޗަށް ކުރިހޯދާފައެވެ.
