ކޫއްޑޫ ކައިރިން މިޔަރު ހަމަލާދިން ސްޕެއިން ފަތުރުވެރިޔާގެ އެއް ފައި ބުރިކޮށްލައިފި

ގއ. ކޫއްޑޫ ކައިރިއަށް ފީނަން ގޮސް އުޅެނިކޮށް މިޔަރެއް ހަމަލާދީ ބޮޑެތި ޒަހަމްތަކެއް ލިބުނު ސްޕެއިންގެ ފަތުރުވެރިޔާގެ ފުރާނަ ސަލާމަތްކުރުމަށްޓަކައި އޭނާގެ އެއް ފައި ބުރިކޮށްލައިފިއެވެ. އުމުރުން 30 އަހަރުގެ މި ފިރިހެން ފަތުރުވެރިޔާއަކީ ‘ދަ ރެޒިޑެންސް މޯލްޑިވްސް’ ރިސޯޓުގައި ޗުއްޓީ ހޭދަކުރަމުން ދިޔަ މީހެކެވެ.

މިދިޔަ ހޮނިހިރު ދުވަހު ހިނގި މި ހިތާމަވެރި ހާދިސާއާ ގުޅޭގޮތުން ފުލުހުން ރޭ އާންމުކުރި މައުލޫމާތުގައިވާ ގޮތުން، މިޔަރުގެ ހަމަލާގައި އެމީހާގެ ދެ ފަޔަށްވެސް ވަރަށް ބޮޑަށް އަނިޔާވެފައިވެއެވެ. ފުލުހުން ބުނީ، ލިބިފައިވާ ޒަހަމްތަކުގެ ފުންކަމާއި ސީރިއަސްކަމުގެ ސަބަބުން ފަތުރުވެރިޔާގެ އެއް ފައި މިހާރު ބުރިކޮށްލާފައިވާ ކަމަށެވެ.

މި ހާދިސާ ހިނގުމާއެކު އެންމެ ފުރަތަމަ އޭނާއަށް ފަރުވާ ދީފައިވަނީ ގއ. އަތޮޅު ހޮސްޕިޓަލުގައެވެ. ނަމަވެސް އިތުރު ފަރުވާ ދިނުމަށްޓަކައި ހަމަ އެ ދުވަހުގެ ރޭ އޭނާ ވަނީ މާލެ ގެނެސްފައެވެ.

ފުލުހުން ދަނީ މި މައްސަލައާ ގުޅިގެން ތަހުގީގުކުރަންޖެހޭ ކަންކަން އިތުރަށް ބަލަމުންނެވެ. އަދި ފަތުރުވެރިޔާއަށް ބޭނުންވާ އެހީތެރިކަން ފޯރުކޮށްދިނުމާއެކު، ކަމާގުޅޭ އިދާރާތަކުން ފުރިހަމަކުރަންޖެހޭ އިޖުރާއަތްތައް ފުރިހަމަކުރުމުގެ މަސައްކަތް ކުރިއަށްދާކަމަށްވެސް ފުލުހުން ވަނީ ބުނެފައެވެ.

ރާއްޖޭގެ ކަނޑުތަކަށް ފީނަންދާ ފަތުރުވެރިންނަށް މީގެ ކުރިންވެސް މިޔަރުގެ ހަމަލާތައް އަމާޒުވެ، އެކި ވަރުގެ އަނިޔާތައް ލިބިފައި އެބަހުއްޓެވެ. މިއަހަރުގެ ތެރޭގައި ހިނގި މިފަދަ ހިތާމަވެރި އެހެން ހާދިސާއެއްގައި، ސިފައިންގެ މޫދު ތަމްރީނެއްގެ ތެރެއިން މިޔަރެއް ހަމަލާދިނުމުގެ ސަބަބުން ދިވެހި ސިފައިންގެ މީހެއްގެ ފުރާނަ ވެސް ވަނީ ގެއްލިފައެވެ.