އެމްޑީޕީގެ އެޑްވައިޒަރުންގެ ގޮތުގައި ނަޝީދާއި ސޯލިހު ހަމަޖައްސައި
އެމްޑީޕީގެ ތެރޭގައި އުފެދުނު ސިޔާސީ ނުތަނަވަސްކަން ހައްލުކޮށް، ޕާޓީ އެކަތިގަނޑެއްގެ ގޮތުގައި ކުރިއަށް ގެންދިއުމަށްޓަކައި ރޭ ބޭއްވި ގައުމީ މަޖިލީހުގެ ސިއްރު ބައްދަލުވުމެއްގައި، ޕާޓީގެ އެޑްވައިޒަރުންގެ ގޮތުގައި ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހު ހަމަޖައްސާފިއެވެ.
މި ބައްދަލުވުމުގައި ޕާޓީގެ ޗެއާޕާސަނަށް ލަފާދޭ ހާއްސަ ކޮމިޓީއެއް އެކުލަވާލާފައިވާއިރު، އޭގެ ތެރޭގައި ދެ ރައީސުންގެ އިތުރުން އަބްދުﷲ ޝާހިދާއި، ފައްޔާޒު އިސްމާއީލާއި، މުހައްމަދު އަސްލަމް އަދި އިބްރާހީމް ނާޒިލް ހިމެނެއެވެ.
މި ކޮމިޓީގެ މައިގަނޑު މަގްސަދަކީ ޕާޓީގެ މުހިއްމު ނިންމުންތަކުގައި ޗެއާޕާސަނަށް ލަފާދިނުން ކަމަށްވާއިރު، ދާއިމީ ޗެއާޕާސަނަކު އިންތިހާބު ކުރެވެންދެން މި ކޮމިޓީ ދެމިއޮންނާނެއެވެ. މީގެ އިތުރުން، ޕާޓީގެ ފަރާތުން ރައީސުލްޖުމްހޫރިއްޔާކަން ކުރައްވާފައިވާ ބޭފުޅުން ޕާޓީގައި ދެމިތިބޭހާ ހިނދަކު، އެ ބޭފުޅުންނަކީ ގައުމީ މަޖިލީހުގެ މެމްބަރުން ކަމުގައި ބަލާ ގޮތަށް އަސާސީ ގަވައިދު އިސްލާހުކޮށް، ކުރިއަށް އޮތް ކޮންގްރެސްއިން އެ ބަދަލަށް ރުހުން ހޯދުމަށް ވެސް ރޭގެ ބައްދަލުވުމުގައި ވަނީ ފާސްކޮށްފައެވެ.
ޕާޓީގެ އެތެރޭގެ މަސްލަހަތު ގޯސްވެ، ވަގުތީ ޗެއާޕާސަން އަބްދުލްޣަފޫރު މޫސާގެ އިތުބާރު ނެތްކަމުގެ މައްސަލައެއް ހުށަހެޅި ނަމަވެސް، މިހާރު އެ މައްސަލަ ވަނީ އަނބުރާ ގެންގޮސްފައެވެ. ހަމައެއާއެކު، ކުރިން މަގާމުން ވަކިކުރި ޑެޕިއުޓީ ޗެއާޕާސަން އިބްރާހިމް ވަހީދާއި ލީގަލް ޑިރެކްޓަރު އަހްމަދު މައުރޫފްގެ މަގާމުތައް ވެސް ވަނީ އަލުން އިއާދަކޮށްފައެވެ. މި ނިންމުންތަކަކީ ލޯކަލް ކައުންސިލް އިންތިހާބަށްފަހު އުފެދުނު ހިޔާލުތަފާތުންތައް ނައްތާލައި، ކުރިއަށް އޮތް ސިޔާސީ މަސައްކަތްތަކަށް ޕާޓީ ވަރުގަދަ ކުރުމަށް އެޅި ފިޔަވަޅުތަކެކެވެ.
