އީރާނަށް ދެމުންދާ ހަމަލާތައް ވަރުގަދަވުމާ ގުޅިގެން ތެލުގެ އަގު އުފުލިއްޖެ
އީރާނުން ހޮރްމުޒް ކަނޑުއޮޅި ހުޅުވާލުމަށް ނުވަތަ އެ ގައުމުގެ އިންޖީނުގެތަކާއި އުމްރާނީ ވަސީލަތްތަކަށް ދޭ ހަމަލާތަކާ ކުރިމަތިލުމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި ސުންގަޑި ހަމަވުމުގެ ކުރިން، ބައިނަލްއަގުވާމީ ބާޒާރުގައި ތެލުގެ އަގު އަންގާރަ ދުވަހު އުފުލިއްޖެއެވެ.
ސައޫދީ ގަޑިން ހަވީރު 6:06 ހާއިރު، ބްރެންޓް ކްރޫޑް ފިއުޗާސްގެ އަގު 87 ސެންޓު (0.79 އިންސައްތަ) މަތިވެ، ފީފާއެއްގެ އަގު 110.60 ޑޮލަރަށް އަރާފައިވެއެވެ. ހަމައެއާއެކު، އެމެރިކާގެ ވެސްޓް ޓެކްސަސް އިންޓަމީޑިއަޓް (WTI) ކްރޫޑްގެ އަގު 3.49 ޑޮލަރު (3.1 އިންސައްތަ) އުފުލި، ފީފާއެއްގެ އަގު ވަނީ 116 ޑޮލަރަށް އަރާފައެވެ. މިއީ ފާއިތުވި ހަތަރު އަހަރު ދުވަހުގެ ތެރޭގައި އެމެރިކާގެ ތެލުގެ އަގު މިހާ މައްޗަށް ދިޔަ ފުރަތަމަ ފަހަރެވެ.
އާންމުގޮތެއްގައި ޑަބްލިޔު.ޓީ.އައި ތެލުގެ އަގު ބްރެންޓް ކްރޫޑަށްވުރެ ހެޔޮވި ނަމަވެސް، މިހާރު މާކެޓަށް އައިސްފައިވާ ބަދަލާއެކު މިވަނީ އެކަން އޮޅުންބޮޅުންވެފައެވެ. ސެކްސޯ ބޭންކުގެ އެނަލިސްޓް އޮލޭ ހޭންސަން ފާހަގަކުރެއްވި ގޮތުގައި، މި ބަދަލުން ދޭހަވަނީ މިވަގުތުން މިވަގުތަށް ތެޔޮ ހޯދުމަށް މާކެޓުގައި އޮތް ބޮޑު ވާދަވެރިކަމާއި ބޭނުންތެރިކަމެވެ.
ދުނިޔޭގެ ތެލުގެ ސަޕްލައިގެ ފަސްބައިކުޅަ އެއްބައި ދައުރުވާ ހޮރްމުޒް ކަނޑުއޮޅި ހުޅުވާލުމަށް ރައީސް ޓްރަމްޕް އީރާނަށް ދެއްވާފައިވަނީ ވޮޝިންގޓަން ގަޑިން ރޭގަނޑު 8 ޖެހުމާ ހަމައަށެވެ. އެއީ ސައޫދީ ގަޑިން ފަތިހު 3 ޖަހާއިރެވެ. ފެބްރުއަރީ 28 ގައި އެމެރިކާއާއި އިސްރާއީލުން ހަމަލާތައް ދޭން ފެށުމާ ގުޅިގެން އީރާނުން ވަނީ މި ކަނޑުއޮޅި ބަންދުކޮށްފައެވެ.
ޓްރަމްޕް އިންޒާރު ދެއްވާފައިވާ ގޮތުގައި، މި ސުންގަޑިއަށް އީރާނުން އިޖާބަ ނުދީފިނަމަ، ބުދަ ދުވަހުގެ ފަތިހު 7 ޖަހާއިރު (ސައޫދީ ގަޑިން) އީރާނުގެ ހުރިހާ ބްރިޖްތަކެއް ސުންނާފަތިކޮށްލާނެއެވެ. އަދި އެ ގައުމުގެ ހުރިހާ އިންޖީނުގެތަކެއް ގޮއްވާލައި، އަލުން ބޭނުން ނުކުރެވޭ ވަރަށް ހަލާކުކޮށްލާނެ ކަމަށްވެސް އޭނާ ވިދާޅުވިއެވެ.
އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި، އަންގާރަ ދުވަހު އެ ގައުމަށް ދެމުންދާ ހަމަލާތައް ވަނީ ވަރަށް ބޮޑަށް ވަރުގަދަވެފައެވެ. މީގެ ތެރޭގައި ރޭލު ދަތުރުކުރާ ބްރިޖްތަކާއި، މަގުތަކާއި، އެއާޕޯޓެއްގެ އިތުރުން ޕެޓްރޯކެމިކަލް ޕްލާންޓަކާއި ކަރަންޓު ފޯރުކޮށްދޭ ވިއުގަތަކަށް ދިން ހަމަލާތައް ހިމެނެއެވެ.
ޕާކިސްތާން މެދުވެރިކޮށް އެމެރިކާއިން ހުށަހެޅި ހަނގުރާމަ ހުއްޓާލުމުގެ ހުށަހެޅުމަށް އީރާނުން ވަނީ އިންކާރުކޮށްފައެވެ. އީރާނުން ބުނަމުންދަނީ ބޭނުންވަނީ ވަގުތީ ހުއްޓުމެއް ނޫން ކަމަށާއި، ހަނގުރާމަ ދާއިމީކޮށް ހުއްޓާލަން ޖެހޭނެ ކަމަށެވެ. މީގެ އިތުރުން، ކަނޑުއޮޅި ހުޅުވާލުމަށް ކުރިމަތިވަމުންދާ ފިއްތުންތަކަށްވެސް އީރާނުން ދަނީ ދެކޮޅު ހަދަމުންނެވެ.
އދ. ގެ ސަލާމަތީ މަޖިލީހުން ކަނޑުދަތުރުފަތުރުގެ ރައްކާތެރިކަމާ ގުޅޭގޮތުން ގަރާރެއް ފާސްކުރަން އަންގާރަ ދުވަހު މަސައްކަތް ކުރި ނަމަވެސް، ޗައިނާއިން ބާރުގެ ބޭނުންކުރުމާ ދެކޮޅު ހެދުމުގެ ސަބަބުން އެ ގަރާރު ވަނީ ވަރަށް ބޮޑަށް ބަލިކަށިވެފައިވާ ކަމަށް ޑިޕްލޮމެޓުން ވިދާޅުވެއެވެ.
މި ހަމަަނުޖެހުންތަކާ ގުޅިގެން، އޭޝިއާ އަދި ވިލާތުގެ ގައުމުތަކުން މެދުއިރުމަތީގެ ތެލުގެ ބަދަލުގައި އެހެން ގޮތްގޮތުން ތެޔޮ ހޯދުމަށް ކުރާ މަސައްކަތުގެ ސަބަބުން، ތެލުގެ އަގުތައް ރެކޯޑް މިންވަރަކަށް ވަނީ އުފުލިފައެވެ.
ކަޒަކިސްތާނުގެ އެނާޖީ މިނިސްޓްރީން ބުނި ގޮތުގައި، ކަޅު ކަނޑު (Black Sea) މެދުވެރިކޮށް އެ ގައުމުން ކުރާ ތެޔޮ އެކްސްޕޯޓަށް އަދި ބުރޫއެއް ނާރައެވެ. މިއީ ދުނިޔޭގެ ތެލުގެ ސަޕްލައިގެ 1.5 އިންސައްތަ ހިއްސާކުރާ ކެސްޕިއަން ޕައިޕްލައިން ކޮންސޯޓިއަމްގެ ޓާމިނަލަށް ޔޫކްރޭނުން ޑްރޯން ހަމަލާއެއް ދީފައިވާ ކަމަށް ރަޝިޔާއިން ބުނިތާ އެއްދުވަސް ފަހުންނެވެ.
އޯޕެކް ޕްލަސްގެ ގައުމުތަކުން މެއި މަހު ތެޔޮ އުފައްދާ މިންވަރު ދުވާލަކު 206،000 ފީފާއަށް އިތުރުކުރަން އެއްބަސްވި ނަމަވެސް، ހޮރްމުޒް ކަނޑުއޮޅި ބަންދުވެފައި އޮތުމުން މީގެ އަމަލީ ނަތީޖާއެއް ނުފެންނާނެ ކަމަށް ބެލެވެއެވެ. ސަބަބަކީ ބައެއް މުހިންމު ގައުމުތަކަށް ތެޔޮ އެކްސްޕޯޓް ކުރުމުގައި މިހާރުވެސް ބޮޑެތި ހުރަސްތަކެއް ހުރުމެވެ.
