އޯޓިޒަމް ހުންނަ ފަރާތްތައް ބާރުވެރިކުރުވުމަށް ރައީސް ގޮވާލައްވައިފި
އޯޓިޒަމް ހުންނަ ފަރާތްތަކުގެ ހުނަރުތައް ތަރައްޤީކޮށް، އެފަރާތްތަކަށް އަމިއްލަ ފައިމައްޗަށް ތެދުވުމުގެ ފުރުޞަތު ފަހިކޮށްދިނުމަކީ ޤައުމުގެ އިޖުތިމާޢީ އޮނިގަނޑު ވަރުގަދަވާނެ ކަމެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދުނިޔޭގެ އޯޓިޒަމް ހޭލުންތެރިކަމުގެ ދުވަހާ ގުޅިގެން ރައީސް މިއަދު ވިދާޅުވީ، ކޮންމެ މީހަކަށްމެ އިޙްތިރާމާއި އޯގާތެރިކަމާއެކު އުނގެނުމުގެ ހަމަހަމަ ފުރުޞަތުތައް ލިބެންޖެހޭ ކަމަށެވެ. އަދި އޯޓިޒަމް ހުންނަ ކުދިންނަށް ކުރީބައިގައި އެހީތެރިކަން ފޯރުކޮށްދިނުމުގެ މުހިންމުކަން ފާހަގަކުރައްވައި، ސަރުކާރުން ތަޢުލީމީ އޮނިގަނޑު ހަރުދަނާކޮށް މަސައްކަތްތެރިކަމުގެ ތަމްރީނުތައް ފުޅާކުރަމުންދާކަން އެމަނިކުފާނު ހާމަކުރެއްވިއެވެ.
އޯޓިޒަމްއަކީ މުޢާމަލާތް ކުރުމާއި އިޖުތިމާޢީ ގުޅުންތަކަށް އަސަރުކުރާ ސިކުނޑީގެ އުނިކަމެކެވެ. ނަމަވެސް، އެކަށީގެންވާ އެހީތެރިކަމާއި ފުރުޞަތުތައް ދީފިނަމަ، އޯޓިޒަމް ހުންނަ ފަރާތްތަކަކީވެސް މުޖުތަމަޢަށް ނުހަނު ފައިދާހުރި، ތަފާތު ހުނަރުތަކެއް ލިބިފައިވާ ބައެކެވެ.
