އިސްރާއީލުން ދެމުންދާ ހަމަލާތަކާ ގުޅިގެން ލުބުނާނުން އެއްލައްކައަށްވުރެ ގިނަ މީހުން ޙިޖުރަކޮށްފި

މާރިޗު މަހުގެ ކުރީކޮޅުން ފެށިގެން މިހާތަނަށް ލުބުނާނުން 130,000 އަށްވުރެ ގިނަ މީހުން ސީރިއާއަށް ހިޖުރަކޮށްފައިވަނީ، ސަރަހައްދީ ހަމަނުޖެހުންތަކުގެ ތެރެއިން އިސްރާއީލާއި އީރާނާ ދެމެދު ހިނގަމުންދާ ކުރިމަތިލުންތަކުގެ ތެރެއަށް ލުބުނާނު ވަދެފައިވާ ދަނޑިވަޅެއްގައެވެ.

އދ. އާ ގުޅިފައިވާ އިންޓަނޭޝަނަލް އޮގަނައިޒޭޝަން ފޯ މައިގްރޭޝަން (އައި.އޯ.އެމް) އިން ހާމަކުރި ގޮތުގައި، މިހާ ގިނަ އަދަދެއްގެ ބަޔަކު ކުރު މުއްދަތެއްގެ ތެރޭގައި ހިޖުރަކުރުމުން ދޭހަވަނީ، ހަނގުރާމައިގެ ސަބަބުން މީހުން ދިރިއުޅޭ ތަންތަން ބަދަލުވާ މިންވަރު އަވަސްކަމެވެ.

މާރިޗު 2 އާއި 18 އާ ދެމެދު ސީރިއާއަށް އެތެރެވި މީހުންގެ ތެރޭގައި ގިނައީ ސީރިއާގެ ރައްޔިތުންނެވެ. އައި.އޯ.އެމް އިން ބުނި ގޮތުގައި މީގެ ތެރެއިން ގިނަ ބަޔަކު މިހާރު ތިބީ އެމީހުންގެ ތިމާގެ މީހުންގެ ގޭގައާއި ވަގުތީ ހިޔާތަކުގައެވެ. އަދި އެމީހުންނަށް ނަގުދު ފައިސާގެ އެހީތެރިކަމާއި، ކާބޯތަކެއްޗާއި ބޯހިޔާވަހިކަން ނުހަނު ބޭނުންވެފައިވާ ކަމަށްވެސް އެ އިދާރާއިން ފާހަގަކުރެއެވެ.

ސީރިއާއަށް އެތެރެވި މީހުންގެ ތެރޭގައި ލުބުނާނުގެ ރައްޔިތުންވެސް ހިމެނެއެވެ. ނަމަވެސް ލުބުނާނު މީހުން ސީރިއާއަށް އެތެރެވުމަށްޓަކައި ހާއްސަ ހުއްދައެއް އޮތުން، ނުވަތަ ސީރިއާގެ އާއިލާއެއް އޮތުން، ނުވަތަ އެ ގައުމުގައި މުދަލެއް ހުރުން ނުވަތަ ދައުވަތެއް ލިބިފައި އޮތުން ލާޒިމްކުރެއެވެ.

އދ. ގެ ހިއުމަން ރައިޓްސް ކައުންސިލްގައި ރަޖިސްޓްރީވެފައިވާ ސީރިއާގެ 532,357 ރެފިއުޖީން މިހާރުވެސް ތިބިއިރު، ލުބުނާނު ސަރުކާރުގެ އަންދާޒާއަކީ 2011 ގައި ފެށި ސީރިއާގެ ދާހިލީ ހަނގުރާމައާ ގުޅިގެން އެ ގައުމަށް ހިޖުރަކުރި މީހުންގެ އަދަދު 1.12 މިލިއަނަށް އަރާނެ ކަމަށެވެ. ސީރިއާގެ ހަނގުރާމަ ނިމުމަކަށް އައީ 2024 ވަނަ އަހަރުގެ ޑިސެމްބަރު މަހު އަސަދު ސަރުކާރު ވެއްޓުމާ ގުޅިގެންނެވެ.

މި މަހުގެ ކުރީކޮޅު އިސްރާއީލާއި ހިޒްބުﷲ އާ ދެމެދު ކުރިމަތިލުންތައް ފެށުނު ފަހުން، ލުބުނާނުގެ އެތެރޭގައި އެކެއް މިލިއަނަށްވުރެ ގިނަ މީހުން ގެދޮރު ދޫކޮށް ގޮސްފައިވާ ކަމަށް ރެކޯޑު ކުރެވިފައިވެއެވެ. މީގެ ތެރެއިން ގިނަ މީހުންނަކީ އިސްރާއީލުން ބޮޑެތި ހަމަލާތަކެއް ދެމުންދާ ވެރިރަށް ބެއިރޫތާއި ދެކުނު ލުބުނާނުގެ އަވަށްތަކުގެ މީހުންނެވެ.

އައި.އޯ.އެމް އިން އިތުރަށް ބުނީ، މުޅި ސަރަހައްދުގެ ހާލަތަށް ބަލާއިރު، ގިނަ ބަޔަކު ހިޖުރަކުރަނީ ރައްކާތެރިކަން ހޯދުމުގެ ގޮތުންނާއި މަސްލަހަތު ބަދަލުވަމުންދާ ގޮތް ބަލައި ވަގުތީ ފިޔަވަޅެއްގެ ގޮތުން ކަމަށެވެ. މީގެ ތެރޭގައި އީރާނުގެ ހާލަތަށް ބަލައިގެން ހިޖުރަކުރާ މީހުންވެސް ހިމެނޭ ކަމަށް އެ އިދާރާއިން ބުނެފައިވެއެވެ.