ޓްރަމްޕް މަރާލަން ރޭވި މައްސަލައިގައި ޕާކިސްތާނު މީހަކު ކުށްވެރިވެއްޖެ

އެމެރިކާގެ ރައީސް ޑޮނަލްޑް ޓްރަމްޕް އަދި އެމެރިކާގެ އެހެނިހެން ސިޔާސީ ބޭފުޅުން މަރަން ރޭވި މައްސަލައެއްގައި، ޕާކިސްތާނުގެ މީހެއް ކުށްވެރިވެއްޖެ ކަމަށް އެމެރިކާގެ ހާރިޖީ ވުޒާރާއިން ހުކުރު ދުވަހު ބުނެފިއެވެ. މި ރޭވުން ރާވާފައިވަނީ އީރާނުގެ އެދުމަށް ކަމަށް ވެސް ހާރިޖީ ވުޒާރާއިން ބުނެއެވެ.

އާސިފް މަރޗަންޓް ކުށްވެރިކޮށްފައިވަނީ 2020 ވަނަ އަހަރު އީރާނުގެ އަސްކަރީ ކޮމާންޑަރު ގާސިމް ސުލައިމާނީ އެމެރިކާއިން އަވަހާރަކޮށްލުމުގެ ބަދަލު ހިފުމުގެ ގޮތުން، ޓްރަމްޕް އާއި އެހެނިހެން ބޭފުޅުންނަށް އަމާޒުކޮށް ހިންގުމަށް ހަމަޖެހިފައިވާ ރޭވުމެއްގައި އެމެރިކާގައި މީހުން ރެކްރޫޓް ކުރަން މަސައްކަތް ކުރުމުގެ ތުހުމަތުގައެވެ.

2024 ވަނަ އަހަރު ރާވާފައިވާ މި ރޭވުމުގެ އަމާޒުތަކުގެ ތެރޭގައި އެމެރިކާގެ އޭރުގެ ރައީސް ޖޯ ބައިޑަން އާއި ޑޮނަލްޑް ޓްރަމްޕާ ދެކޮޅަށް ރިޕަބްލިކަން ޕާޓީގެ ރިޔާސީ ޕްރައިމަރީގައި ވާދަކުރެއްވި ނިކީ ހޭލީ ވެސް ހިމެނޭ ކަމަށް ފެޑެރަލް ޕްރޮސެކިއުޓަރުން ބުނެއެވެ.
މަރޗަންޓް ކުށްވެރިކުރެވުނީ “ކުލި ދީގެން މީހުން މެރުމަށް ރޭވުން” އަދި “ގައުމީ ސަރަހައްދުތަކުން ބޭރުން ޓެރަރިޒަމްގެ އަމަލެއް ހިންގަން މަސައްކަތް ކުރުން” މި ދެ ކުށުގައެވެ. މިކަންކަން ހިންގާފައިވަނީ އީރާނުގެ ކަމާބެހޭ ފަރާތްތަކުގެ އިރުޝާދުގެ ދަށުން ކަމަށް ޑިޕާޓްމަންޓް އޮފް ޖަސްޓިސް (ޑީ.އޯ.ޖޭ) އިން ނެރުނު ބަޔާނެއްގައި ބުނެފައިވެއެވެ.
ނިއުޔޯކް ސިޓީގެ ބްރޫކްލިންގައި މި މައްސަލައިގެ ޝަރީއަތް ފެށިފައިވަނީ މިދިޔަ ހަފްތާގައެވެ. މިކަން ހިނގާފައިވަނީ ޓްރަމްޕް އީރާނަށް ދެމިގެންދިޔަ ހަމަލާއެއް ދިނުމަށް އަމުރުކުރިތާ ދުވަސްކޮޅެއް ކުރިންނެވެ. މި ހަމަލާގައި އިސްރާއީލް ވެސް ބައިވެރިވެފައިވާއިރު، މިއީ ސަރަހައްދީ ހަނގުރާމައެއްގެ ގޮތަށް ފުޅާވެފައިވާ ހަމަލާއެކެވެ.

މަރޗަންޓް ވަނީ އީރާނުގެ އިލައިޓް އިސްލާމިކް ރިވޮލިއުޝަނަރީ ގާޑްސް ކޯޕްސް (އައި.އާރު.ޖީ.ސީ) އާއެކު މި ރޭވުމުގައި ބައިވެރިވިކަމަށް އެއްބަސްވެފައެވެ. ނަމަވެސް އޭނާ ހެކިބަސް ދެމުން ބުނެފައިވަނީ އޭނާގެ އާއިލާ ތެހެރާނުގައި ރައްކާތެރިކުރުމުގެ ގޮތުން މަޖުބޫރުވެގެން މި ރޭވުމުގައި ބައިވެރިވީ ކަމަށެވެ.

މަރޗަންޓް ބުނެފައިވަނީ އެއްވެސް ވަކި މީހަކު މެރުމަށް އޭނާއަށް އަމުރެއް ލިބިފައިނުވާ ކަމަށާއި، ނަމަވެސް އީރާނުގެ ވެރިރަށުގައި އޭނާގެ އީރާނު ހޭންޑްލަރ އާއި ކުރެވުނު ވާހަކަތަކުގައި ތިން މީހެއްގެ ނަން ބުނެފައިވާ ކަމަށެވެ.
މި ހަމަލާއެއް ހިންގުމުގެ ކުރިން ގާނޫނު ތަންފީޒުކުރާ އިދާރާތަކުން ވަނީ މި ރޭވުން ހުއްޓުވާފައެވެ. މަރޗަންޓް 2024 ވަނަ އަހަރު މި ރޭވުމަށް އެހީތެރިވުމަށް ގުޅި މީހަކު ވަނީ އޭނާގެ ހަރަކާތްތައް ރިޕޯޓްކޮށް، ސިއްރު މައުލޫމާތުދޭ މީހަކަށް ވެފައެވެ. ޑީ.އޯ.ޖޭ ބުނި ގޮތުގައި މަރޗަންޓް ހައްޔަރުކުރެވުނުއިރު އޭނާ ވަނީ ކުށަށް އިންކާރުކޮށްފައެވެ.
ރިވޮލިއުޝަނަރީ ގާޑްސް އަކީ އީރާނުގައި މަރުކަޒީ ދައުރެއް އަދާކުރާ ބައެކެވެ. އެމީހުންނަކީ އަސްކަރީ އަދި އިގްތިސާދީ ބާރާއި އިންޓެލިޖެންސް ނެޓްވޯކެއް އެކުލެވޭ ބައެކެވެ. ޓްރަމްޕް ނުވަތަ އެހެނިހެން އެމެރިކާގެ ބޭފުޅުންނަށް އަމާޒުކުރި ކަމުގެ ތުހުމަތުތައް ތެހެރާނުން ދޮގުކުރެއެވެ.
ހޮނިހިރު ދުވަހުން ފެށިގެން އެމެރިކާ އާއި އިސްރާއީލުން ދިން ހަމަލާތަކުގައި މަދުވެގެން 1,332 އީރާނުގެ އާންމު ރައްޔިތުން މަރުވެ، ހާހެއްހާ މީހުން ޒަހަމްވެފައިވާ ކަމަށް އީރާނުގެ އ.ދ. އެމްބަސަޑަރު ބުނެއެވެ. އީރާނުގެ އެތައް އިސް ބޭފުޅުންނެއް، އޭގެ ތެރޭގައި ސުޕްރީމް ލީޑަރު އާޔަތުﷲ އަލީ ޚާމަނާއީ ވެސް ހިމެނޭހެން، މަރުވެފައިވެއެވެ.

އެމެރިކާގެ އަސްކަރިއްޔާއިން ބުނެފައިވަނީ ކުވައިތުގައި ހުރި އެމެރިކާގެ ބޭސްއަކަށް ދިން ހަމަލާއެއްގައި އެމެރިކާގެ ހަ ސިފައިން މަރުވެފައިވާ ކަމަށެވެ. އަދި އިސްރާއީލުން ބުނެފައިވާ ގޮތުގައި އިސްރާއީލްގެ އެކި ހިސާބުތަކުން މަދުވެގެން 10 އާންމު ރައްޔިތުން މަރުވެފައިވެއެވެ.