މަޝްވަރާ ކުރުމަށް އީރާނުން އެދެނު ނަމަވެސް ވަގުތު ފާއިތުވެއްޖެ – ޓްރަމްޕް
އީރާނާ ދެކޮޅަށް އެމެރިކާއިން ކުރިއަށްގެންދާ އަސްކަރީ ކެމްޕޭނާ ގުޅޭގޮތުން ރައީސް ޑޮނަލްޑް ޓްރަމްޕް ވިދާޅުވީ، މަޝްވަރާ ކުރުމަށް އީރާނުން އެދުނު ނަމަވެސް މިހާރު އެކަމަށް ވަގުތު ފާއިތުވެފައިވާ ކަމަށެވެ.
އަންގާރަ ދުވަހު ޓްރަމްޕްގެ “ޓްރުތް ސޯޝަލް” ޕްރޮފައިލްގައި ޝާއިޢުކުރެއްވި ލިޔުމެއްގައި ވިދާޅުވީ، އީރާނުގެ ވައިގެ ދިފާޢީ ނިޒާމާއި، ވައިގެ ސިފައިންނާއި، ކަނޑުގެ ސިފައިން އަދި އެ ޤައުމުގެ ލީޑަޝިޕް މިހާރު ނެތިގޮސްފައިވާ ކަމަށެވެ. “އެމީހުން ބޭނުންވަނީ ވާހަކަދައްކަން. އަހަރެން ބުނިން މާ ލަސްވެއްޖެއޭ!” ޓްރަމްޕް ލިޔުއްވާފައިވެއެވެ.
މީގެ އިތުރުން، ދިގުދެމިގެންދާ ހަނގުރާމަތަކެއްގައި ހިފަހައްޓާލެވޭވަރަށް އެމެރިކާގައި ހަތިޔާރު އެބަހުރި ކަމަށާއި، ހަތިޔާރުގެ ރަސްމީ ސަޕްލައިއަކީ ހުސްނުވާނެ އެއްޗެއްގެ ގޮތުގައި ޓްރަމްޕް ސިފަކުރެއްވިއެވެ. އޭނާ ވިދާޅުވި ގޮތުގައި، މިހާރު ހުރި ވަސީލަތްތަކާއެކު “އަބަދަށްޓަކައި” ވެސް ހަނގުރާމަ ކުރެވިދާނެ ކަމަށާއި، އެމެރިކާ އޮތީ ބޮޑު ކާމިޔާބީއެއް ހޯދުމަށް ފުރިހަމައަށް ތައްޔާރަށެވެ.
ޓްރަމްޕް މި މޭރުމުން ވާހަކަދައްކަވާފައިވަނީ، މިދިޔަ ހޮނިހިރު ދުވަހު އެމެރިކާ އާއި އިޒްރޭލުން ގުޅިގެން އީރާނަށް ދޭން ފެށި ވަރުގަދަ ވައިގެ ހަމަލާތަކަށް ހަތަރު ދުވަސް ވެފައިވަނިކޮށެވެ.
ވައިޓް ހައުސްގައި އޮތް ރަސްމިއްޔާތެއްގެ ތެރެއިން ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އީރާނާ ދެކޮޅަށް ހިންގާ އޮޕަރޭޝަންތައް ކުރިއަށްދާނެ ވަކި މުއްދަތެއް ކަނޑައަޅަން ބޭނުންފުޅު ނުވާ ކަމަށެވެ. ނަމަވެސް، ފުރަތަމަ އަންދާޒާކުރީ މިކަމަށް 4 ނުވަތަ 5 ހަފުތާ ނަގާނެ ކަމަށް ވިޔަސް، މިހާރު މަސައްކަތްތައް ކުރިއަށްދަނީ އަންދާޒާކުރި ވަގުތަށްވުރެ މާ ހަލުވިކޮށް ކަމަށް އޭނާ ފާހަގަކުރެއްވިއެވެ. “ކިތަންމެ ވަގުތެއް ނެގިޔަސް މައްސަލައެއް ނެތް. ކޮންމެފަދަ ޤުރުބާނީއެއް ވެގެންވެސް މިކަން ކާމިޔާބު ކުރާނަން،” ޓްރަމްޕް ވިދާޅުވިއެވެ.
އެހެންނަމަވެސް، މީޑިއާ ރިޕޯރޓުތައް ބުނާގޮތުގައި އީރާނުން މަޝްވަރާއަށް ނޭދޭ ކަމަށާއި، އީރާނުން ބުނަމުންދަނީ ދެން ކުރާނެ މަޝްވަރާއެއް ނޯންނާނެކަމަށެވެ.
