ޤާސިމް އިބްރާހީމުގެ މާމިނގިލީގައި 800 މީހުންގެ ޖާގައިގެ އާ މިސްކިތެއް ހުޅުވައިފި
ވިޔަފާރިވެރިޔާ އަދި މާމިނގިލީ ދާއިރާގެ މެންބަރު ޤާސިމް އިބްރާހީމް، އެމަނިކުފާނުގެ ބައްޕާފުޅުގެ ހަނދާނުގައި ބިނާކުރެއްވި “މަސްޖިދު އިބްރާހިމް” މިއަދު އދ. މާމިނގިލީގައި ހުޅުވައިފިއެވެ.
މި މިސްކިތް ރަސްމީކޮށް ހުޅުވައިދެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދާއި ޤާސިމް އިބްރާހީމެވެ. މިސްކިތް ހުޅުވުމަށްފަހު މިއަދުގެ ހުކުރު ނަމާދު އިމާމުވެ ކުރެއްވީ ވަޒީރު ޑރ. ޝަހީމެވެ.
މި މިސްކިތަކީ އެއްފަހަރާ 800 މީހުންނަށް ނަމާދުކުރެވޭނެ ޖާގަ އޮތް، އަންހެނުންނާއި ފިރިހެނުންނަށް ވަކިން ނަމާދުކުރެވޭ ގޮތަށް ފަރުމާކޮށްފައިވާ އޭސީ ކުރި މިސްކިތެކެވެ. މިއީ މާމިނގިލީގެ ރައްޔިތުންނަށް ލިބުނު ވަރަށް ބޮޑު ލުޔެކެވެ.
ސަރުކާރާއި އަމިއްލަ ފަރާތްތައް ގުޅިގެން މި އަހަރުގެ ރަމަޟާން މަހަށް އަމާޒުކޮށް ރާއްޖޭގެ އެކި ސަރަޙައްދުތަކުގައި ޖުމްލަ 15 މިސްކިތެއް މިހާތަނަށް ވަނީ ހުޅުވާފައެވެ. މީގެ ތެރޭގައި ސަރުކާރުގެ ޚަރަދުގައި ބިނާކުރި މިސްކިތްތަކާއި އަމިއްލަ ފަރާތްތަކުގެ އެހީގައި ބިނާކުރި މިސްކިތްތައް ހިމެނޭކަމަށް އިސްލާމިކް މިނިސްޓްރީން ވިދާޅުވެއެވެ.
