ހެޔޮޢަމަލުތައް ގިނަކުރުމަށް ބާރުއަޅަމާ ހިނގާށެވެ! (ތިންވަނަބައި)
މިއަދަކީ ޓެކްނޮލޮޖީގެ ރަންޒަމާނަށް ވާއިރު، އަޅުގަނޑުމެންގެ ތެރެއިން ގިނަބައެއްގެ އަތުގައި އެންމެ ފަހުގެ ޒަމާނީ ފޯނުތަކާއި ޓެބްލެޓް ފަދަ ވަސީލަތްތައް އެބަހުއްޓެވެ. ނަމަވެސް ހިތާމައަކީ، މިފަދަ ވަސީލަތްތަކުގެ ބޭނުން އެންމެ އެދެވޭ ގޮތުގައި ނުހިފޭކަމެވެ. މިފަދަ ކޮންމެ އާލާތަކަށް ކީރިތި ޤުރުއާނުގެ މުޞްޙަފެއް ޑައުންލޯޑްކޮށްލުމަކީ ދަތިކަމެއް ނޫނެވެ. އޭރުން ކޮންމެ ވަގުތަކުވެސް ފަސޭހަކަމާއެކު ޤުރުއާން ކިޔަވައިލެވޭނެއެވެ. ޢިލްމުވެރިން ވިދާޅުވާ ގޮތުގައި، ފޯނުން ޤުރުއާން ކިޔަވާއިރު ވުޟޫއާ ނުލައި ކިޔެވުމަކީ ހުއްދަ ކަމެކެވެ. އެއީ ފޯނަކީ ސީދާ މުޞްޙަފަކަށް ނުވާތީ އާއި، އޭގައި ޤުރުއާނުގެ އިތުރުން އެހެނިހެން އެތައް މަޢުލޫމާތެއް ހިމެނޭތީއެވެ. ހެޔޮކަންކަން ކުރެވޭނެ މަގުތައް ވަރަށްވެސް ގިނައެވެ. އެހެނަސް އެފަދަ ހެޔޮ ޢަމަލެއް ކުރެވޭނީ، އެކަމަށް އަޅުގަނޑުމެން އަމިއްލައަށް އިސްނަގައި މަސައްކަތް ކޮށްގެންނެވެ.
ދެން އޮތީ އަޅުގަނޑުމެންގެ ތެރެއިން ގިނަބަޔަކު ޣާފިލުވެފައިވާ އެހެން މުހިންމު ކަމެކެވެ. ކޮންމެ ހެޔޮ ޢަމަލަކީވެސް އިންސާނާގެ ދުނިޔެއާއި އާޚިރަތަށް ނުހަނު ފައިދާހުރި ކަމެކެވެ. މާތް ﷲ ހެޔޮ ޢަމަލުތައް ޝަރުޢުކުރައްވާފައިވަނީ، އެކަލާނގެ މަތިން ގިނަގިނައިން ހަނދުމަކުރުމުގެ ފުރުޞަތެއްގެ ގޮތުގައެވެ. އަދި އެއީ އިންސާނާ ފާފަތަކުން ޠާހިރުވުމަށް އޮތް މަގެއްވެސް މެއެވެ. އެހެނީ ކޮންމެ އިންސާނަކީވެސް އެނގުމުގައްޔާއި ނޭނގުމުގައި ކުދިބޮޑު ފާފަތަކަށް އަރައިގަނެވޭނެ މީހަކަށް ވާތީއެވެ.
ވިތުރި ނަމާދަކީ އެ ނަމާދެއް ކުރުމުން ގިނަގުނަ ޘަވާބާއި ދަރުމަ ލިބިގެންދާ މަތިވެރި އަޅުކަމެކެވެ. ރޭގަނޑުގެ ވަގުތެއްގައި މި ނަމާދު ކުރުމަށް ސުންނަތުގައި ބާރުއަޅުއްވާފައިވެއެވެ. މި ނަމާދު ކުރުމަށް އެންމެ މާތް ވަގުތަކީ ރޭގަނޑުގެ ފަހުބައެވެ. ނަމަވެސް، މެންދަމުން އަލިވާއިރު ހޭލެވިދާނެކަމުގެ ޔަޤީންކަން ނެތް ނަމަ، ނިދުމުގެ ކުރިން ނުވަތަ ޢިޝާ ނަމާދަށްފަހު ވިތުރި ކުރުމަކީ ޙަދީޘްތަކުން ސާބިތުވާ ފަދައިން ހުއްދަ ކަމެކެވެ. ވިތުރި ނަމާދަކީ އޮނަހިރި ރަކްޢަތްތަކަކުން ކުރާ ނަމާދެކެވެ. އެމީހަކަށް ކުޅަދާނަވީ މިންވަރަކުން ރަކްޢަތްތަކުގެ ޢަދަދު ހަމަކުރެވިދާނެއެވެ. ޢާންމުކޮށް ކޮށްއުޅެނީ ތިން ރަކްޢަތް ނަމަވެސް، އެވަރުވެސް ނުކުރެވޭ މީހަކަށް އެންމެ ރަކްޢަތަކުން ވިތުރި ކުރުމުންވެސް ފުދޭނެއެވެ.
ވީއިރު، ރޭގަނޑުގެ ވަގުތުތަކުން ކުޑަ ހިނދުކޮޅެއް މި މަތިވެރި ސުންނަތް އަދާކުރުމަށް އަޅުގަނޑުމެންނަށް ހުސްނުކުރެވެނީ ކީއްވެގެންތޯއެވެ؟ ޚަބަރުތަކާއި ސޯޝަލް މީޑިއާ ބެލުމުގައި ނުވަތަ ތަފާތު ޑްރާމާތަކަށް ހުސްވެފައި ތިބޭއިރު، މި މުހިންމު އަޅުކަމާމެދު ފަރުވާކުޑަކޮށްލެވެނީއެވެ. މިއީ ހަގީގަތުގައިވެސް ހިތާމަހުރި ކަމެކެވެ. ﷲ ތަޢާލާ އަޅުގަނޑުމެންނަށް މިފަދަ މަތިވެރި ފުރުޞަތުތައް ދެއްވާފައިވާއިރު، ދުނިޔޭގެ ވަގުތީ އުފަލާއި މަޖަލުގައި ގެއްލި އާޚިރަތް ހަނދާން ނައްތައިލުމަކީ މާދަމާ ހިތާމަކުރަންޖެހޭނެ ކަމެކެވެ.
އަޅުގަނޑުމެންގެ ވަގުތުތައް ބޭކާރު ކަންކަމުގައި ހޭދަވެގެންދާއިރު، އަންނާން އޮތް ދާއިމީ ޙަޔާތާމެދު ފުންކޮށް ވިސްނައިލަން އެބަޖެހެއެވެ. މުސްލިމުންގެ މައްޗަށް އޮތް އެންމެ މުހިންމު ވާޖިބަކީ އަޅުކަންތައްތަކަށް އިސްކަންދިނުމެވެ.
ވީމާ، އަޅުގަނޑުމެންނަކީ މިފަދަ މަތިވެރި ހެޔޮ ޢަމަލުތަކަށް ސަމާލުކަންދޭ ބަޔަކަށް ވަމާ ހިނގާށެވެ. އެހެން މީހުން ކަންކުރާ ގޮތަށް ބެލުމުގެ ބަދަލުގައި، އަމިއްލައަށް އިސްނަގައިގެން މިފަދަ ހެޔޮކަންކަން ކުރަމުން، އެހެން މީހުންނަށްވެސް އެކަމަށް ނަޞޭޙަތްތެރިވާ ބަޔަކަށް ވަމާ ހިނގާށެވެ. އޭރުން، މާތް ﷲ ގެ އޯގާވަންތަކަމާއި ދީލަތިވަންތަކަމުން އަޅުގަނޑުމެންގެ ފާފަތައް ފުއްސަވައި، ނަޖާކުރައްވައިފާނެއެވެ. އަޅުގަނޑުމެންނަކީ ހެޔޮ ވިސްނޭ، އަދި ހެޔޮ ބަސް އަހައި އެއަށް ޢަމަލުކުރާ ބަޔަކު ކަމުގައި ލައްވާށިއެވެ. އާމީން.
