ވެނެޒުއޭލާގެ ރައީސް މަޑޫރޯ އާއި އަނބިކަނބަލުން ނިއުޔޯކްގެ ކޯޓަށް ހާޒިރުކޮށްފި
ވެނެޒުއޭލާގެ ރައީސް ނިކޮލަސް މަޑޫރޯ އާއި އެމަނިކުފާނުގެ އަނބިކަނބަލުން ސިލިއާ ފްލޮރޭޒް އެމެރިކާގެ ބެލުމުގެ ދަށަށް ގެނައުމަށްފަހު ނިއުޔޯކްގެ ފެޑަރަލް ކޯޓަށް މިއަދު ހާޒިރުކޮށްފިއެވެ.
މިއީ އެމެރިކާގެ ސިއްރު އޮޕަރޭޝަނެއްގެ ތެރެއިން މަޑޫރޯ ހައްޔަރުކޮށްގެން ނިއުޔޯކަށް ގެންދިއުމަށްފަހު، އެމަނިކުފާނުގެ މައްޗަށް އުފުލާފައިވާ ސީރިއަސް ދަޢުވާތަކަށް ޖަވާބުދާރީ ކުރުވުމަށް ފެށި ރަސްމީ މަރުޙަލާއެކެވެ.
ނިއުޔޯކްގެ ސަދަން ޑިސްޓްރިކްޓް ކޯޓުގައި މަޑޫރޯގެ މައްޗަށް އުފުލާފައިވާ ދަޢުވާތަކުގެ ތެރޭގައި ނާކޯ-ޓެރަރިޒަމްގެ ތުހުމަތާއި، ބޮޑެތި ކޮރަޕްޝަނާއި، އަދި އެމެރިކާއަށް ގިނަ އަދަދެއްގެ މަސްތުވާތަކެތި އެތެރެކުރުމަށް ރޭވުމުގެ ދަޢުވާ ހިމެނެއެވެ. އެމެރިކާގެ ޖަސްޓިސް ޑިޕާޓްމަންޓުން ތުހުމަތުކުރާ ގޮތުގައި މަޑޫރޯ ވަނީ ވެނެޒުއޭލާގެ ދައުލަތުގެ ވަސީލަތްތައް ބޭނުންކޮށްގެން ބައިނަލްއަގުވާމީ މަސްތުވާތަކެތީގެ ވިޔަފާރި ހިންގާފައެވެ.
މި ޝަރީޢަތާ ދިމާކޮށް ނިއުޔޯކްގެ މެންހަޓަން ސަރަހައްދުގައި ސަލާމަތީ ފިޔަވަޅުތައް އިންތިހާއަށް ވަރުގަދަކޮށްފައިވާއިރު، ފެޑަރަލް އެޖެންޓުންނާއި ފުލުހުން ވަނީ ކޯޓު ހިމެނޭ ސަރަހައްދުގައި ހަތިޔާރާއެކު ފޯރިމަރާފައެވެ. މަޑޫރޯ ކޯޓަށް ހާޒިރުކުރި ވަގުތު އެ ސަރަހައްދުގެ ބައެއް މަގުތައް ބަންދުކޮށް، ސަލާމަތީ ކަންކަން ވަނީ އެންމެ މަތީ ދަރަޖައަށް މަތިކޮށްފައެވެ.
މަޑޫރޯ ހައްޔަރުކުރުމަށް ބޭނުންވާ މަޢުލޫމާތު ފޯރުކޮށްދޭ ފަރާތަކަށް އެމެރިކާ ސަރުކާރުން މީގެ ކުރިން ވަނީ 15 މިލިއަން ޑޮލަރުގެ އިނާމެއް ހުށަހަޅާފައެވެ. އަދި އޭނާގެ އަނބިކަނބަލުންނާއި އަރިސް އެހެން ބޭފުޅުން ހައްޔަރުކުރުމަށް މަގުފަހިވާ މަޢުލޫމާތު ދޭ ފަރާތްތަކަށް ވެސް އެތައް މިލިއަން ޑޮލަރެއްގެ އިނާމު ދޭނެ ކަމަށް އެމެރިކާއިން އޮތީ އިޢުލާނުކޮށްފައެވެ.
ވެނެޒުއޭލާގެ ސަރުކާރުން ވަނީ މި އަމަލު ވަރަށް ބޮޑަށް ކުށްވެރިކޮށް، މިއީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފަށް އެމެރިކާއިން ހިންގި “ވަގަށް ނެގުމުގެ” އަމަލެއް ކަމަށް ބުނެފައެވެ. މަޑޫރޯއަށް ތާއީދުކުރާ ފަރާތްތަކުން ބުނަމުންދަނީ މިއީ ވެނެޒުއޭލާގެ އިސްތިގުލާލަށް އެމެރިކާއިން އަރައިގަތުން ކަމަށާއި، މިކަމުގެ ސަބަބުން ސަރަހައްދީ ހަމަޖެހުން ގެއްލޭނެ ކަމަށެވެ.
ބައިނަލްއަގުވާމީ މަސްރަހު ދިރާސާކުރާ ފަރާތްތަކުން ލަފާކުރާ ގޮތުގައި މަޑޫރޯ ހައްޔަރުކޮށް ކޯޓަށް ހާޒިރުކުރުމަކީ ދުނިޔޭގެ ސިޔާސީ މަސްރަހަށް އަންނާނެ ވަރަށް ބޮޑު ލޮޅުމެކެވެ. ޚާއްޞަކޮށް ރަޝިޔާ އާއި ޗައިނާ ފަދަ ވެނެޒުއޭލާގެ ގާތް ގައުމުތަކުން މިކަމާ މެދު ނުރުހުން ފާޅުކުރަމުންދާއިރު، މިއީ އެމެރިކާ އާއި އެ ގައުމުތަކާ ދެމެދު އޮންނަ ނުތަނަވަސްކަން އިތުރަށް ބޮޑުވެގެންދާނެ ކަމެއް ކަމަށް ބެލެވެއެވެ.
