‏އިސްލާމިކް ފައިނޭންސިން ސްކީމް އާއި، އާދައިގެ ލޯން ސްކީމްގެ ހުރި ތަފާތަކީކޮބާ؟

‏ވިސްނާލައްވާ، ތިބާ ބޭނުންވަނީ 200,000 ރުފިޔާގެ ކާރެއް ގަންނަން. އެކަމަކު އަތުގައި ފައިސާއެއް ނެތް‏‎.‎

‏1.‏ ‏އާދައިގެ ލޯނު (ކޮންވެންޝަނަލް ލޯން)‏
‏މިއީ ތިބާ “ފައިސާ ކުއްޔަށް ހިފުން” ކަހަލަ ކަމެއް‏‎.‎
• ‏ކަން ހިނގާގޮތް‏‎:‎
‏1.‏ ‏ތިބާ އާދައިގެ ބޭންކަކަށް ގޮސް، ކާރު ގަންނަން 200,000 ރުފިޔާގެ ލޯނަކަށް އެދެން‏‎.‎
‏2.‏ ‏ބޭންކުން އެޕްރޫވް ކޮށްފައި، ތިބާގެ އެކައުންޓަށް ‏‎200,000 ‎‏ރުފިޔާ ޖަމާކޮށްދެނީ‏‎.‎
‏3.‏ ‏ތިބާ އެ ފައިސާ ހިފައިގެން ގޮސް ކާރު ވިއްކާ ފަރާތަށް ފައިސާ ދައްކާފައި ކާރު ގަނެގެން ގެންނަނީ‏‎.‎
‏4.‏ ‏އޭގެ ފަހުން، ތިބާ ބޭންކަށް ފައިސާ ދައްކަން ފަށަނީ. އެކަމަކު ދައްކަން ޖެހެނީ 200,000 ރުފިޔާއަށް ‏‏ވުރެ އިތުރު އަދަދެއް. މިސާލަކަށް، 5 އަހަރު ތެރޭގައި ޖުމްލަ ‏‎250,000 ‎‏ރުފިޔާ‏‎.‎
‏5.‏ ‏އެ އިތުރުވާ ‏‎50,000 ‎‏ރުފިޔާ އަކީ ބޭންކުން ތިބާއަށް ފައިސާ ދަރަންޏަށް ދިނުމުގެ އަގު. މިއީ ‏‏”އިންޓްރެސްޓް” ނުވަތަ “ރިބާ‏‎”.‎
• ‏މައިގަނޑު ނުކުތާ‏‎:‎
o ‏ބޭންކުގެ ވިޔަފާރިއަކީ ފައިސާ‏‎. ‎‏އެމީހުން ތިބާއަށް ފައިސާ ވިއްކީ‏‎.‎
o ‏ބޭންކަކަށް ކާރާ އެއްވެސް ގުޅުމެއް ނެތް. އެމީހުން ދިނީ ފައިސާ. ތިބާ އެއިން ކޮންމެ ކަމެއް ‏‏ކުރިޔަސް، ބޭންކަށް ފައިސާ ދައްކަން ޖެހޭނެ‏‎.‎

‏2.‏ ‏އިސްލާމިކް ފައިނޭންސިން ސްކީމް‏
‏މިއީ “ފައިސާ ކުއްޔަށް ހިފުމެއް” ނޫން. މިއީ ބޭންކާއި ތިބާއާ ދެމެދު ހިނގާ ‏‎”‎‏ވިޔަފާރި މުޢާމަލާތެއް‏‎”.‎
• ‏ކަން ހިނގާގޮތް‏‎:‎
‏1.‏ ‏ތިބާ އިސްލާމިކް ބޭންކަކަށް ގޮސް، ވަކި މޮޑެލްއެއްގެ ކާރެއް ގަންނަން ބޭނުންވާ ވާހަކަ ބުނަނީ‏‎.‎
‏2.‏ ‏ބޭންކުން ތިބާ ބޭނުންވާ ކާރު، ކާރު ވިއްކާ ފަރާތުން ‏‎190,000 ‎‏ރުފިޔާއަށް ގަނޭ‏‎. ‎‏(ބޭންކަށް ‏‏އަގުހެޔޮކޮށް ލިބިދާނެ). މި ހިސާބުން ކާރުގެ ވެރިފަރާތަކީ ބޭންކް‏‎.‎
‏3.‏ ‏އޭގެ ފަހުން، ބޭންކުން އެ ކާރު ތިބާއަށް ވިއްކާލަނީ އިތުރު ފައިދާއެއް ލައިގެން. މިސާލަކަށް ‏‎240,000 ‎‏ރުފިޔާއަށް‏‎.‎
‏4.‏ ‏ތިބާ އެއްބަސްވެ، ބޭންކަށް މަހުން މަހަށް ފައިސާ ދައްކައިގެން 5 އަހަރު ތެރޭގައި އެ 240,000 ‏‏ރުފިޔާ އަގު އަދާކުރަނީ‏‎.‎
‏5.‏ ‏އިތުރަށް އެ ދެއްކި ‏‎50,000 ‎‏ރުފިޔާ އަކީ “ރިބާ” އެއް ނޫން. އެއީ ބޭންކުން ކާރު ގަނެ، ތިބާއަށް ‏‏ވިއްކާލައިގެން ހޯދި ވިޔަފާރީގެ ފައިދާ‏‎.‎
• ‏މައިގަނޑު ނުކުތާ‏‎:‎
o ‏ބޭންކުގެ ވިޔަފާރިއަކީ މުދާ (އެސެޓް)‏‎. ‎‏މި މިސާލުގައި، އެއީ ކާރު‏‎.‎
o ‏ބޭންކުން ތިބާއަށް ފައިސާ ދަރަންޏަކަށް ނުދޭ. ބޭންކުން ކުރީ އަސްލު ވިޔަފާރިއެއް. އެއީ ކާރެއް ‏‏ގަނެފައި، ތިބާއަށް ވިއްކާލުން‏‎.‎
o ‏މި މުޢާމަލާތް ބިނާވެފައިވަނީ އަސްލު އެއްޗެއްގެ މައްޗަށް‏‎.‎

‏ޚުލާސާކޮށް ތަފާތުތައް‏
‏އެހެންވީމާ، އެންމެ ބޮޑު ތަފާތަކީ، އާދައިގެ ލޯނަކީ ފައިސާގެ ވިޔަފާރިއެއް‏‎. ‎‏އިސްލާމިކް ފައިނޭންސަކީ އަސްލު މުދަލެއް ‏‏ނުވަތަ ޚިދުމަތެއްގެ ވިޔަފާރިއެއް‏‎.‎
‏އުއްމީދުކުރަން މިހާހިސާބުން ތަފާތު ސާފުވެވަޑައިގެންނެވި ކަމަށް‏‎.‎