ކްރިމިނަލް ކޯޓްގެ ޤާޟީ ސަމީރަށް ޖޭއެސްސީން ފިޔަވަޅު އަޅައިފި
ކްރިމިނަލް ކޯޓުގެ ގާޟީ މުޙައްމަދު ސަމީރުއަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ފިޔަވަޅު އަޅައިފިއެވެ.
ޖުޑިޝަލް ސާވިސް ކޮމިޝަނަށް ހުށަހެޅި މައްސަލައެއް ބެލުމަށްފަހު އެކޮމިޝަނުން ނިންމާފައިވަނީ ސަމީރަށް ފިޔަވަޅު އެޅުމަށެވެ.
ސަމީރަށް ފިޔަވަޅު އަޅާފައިވަނީ ކްރިމިނަލް ކޯޓަށް ހުށަހެޅުނު ޖިންސީ ފުރައްސާރައިގެ މައްސަލައެއްގެ މުއްދަތު މަޖިލީހުގައި، މައްސަލަ ރައްދުވާ ފަރާތުގެ އެ ޢަމަލަކީ ވަރަށް އާދައިގެ ކަމެއްކަމަށް ދޭހަވާގޮތަށް ވާހަކަ ދައްކަވާފައިކަމަށާއި ބަންދުގައި ބަހައްޓަން ނިންމެވީ ބަންދުން ދޫކޮށްލައިފިނަމަ ނޫސްތަކުގައި އެ ވާހަކަ ޖަހާނެތީކަމާއި އަބަދުވެސް ގޯސްވެފައި އޮންނަނީ ކޯޓު ކަމަށް ބުނެ ވާހަކަ ދައްކާފައިވާކަން ތަޙުޤީޤަށް ސާބިތުވެފައިވާތީ އެވެ.
ޤާޟީ މުޙައްމަދު ސަމީރުގެ މި ޢަމަލަކީ، ދިވެހިރާއްޖޭގެ ފަނޑިޔާރުންގެ ޤާނޫނާއި ފަނޑިޔާރުންގެ ސުލޫކީ މިންގަނޑާއި ޚިލާފަށް ކޮށްފައިވާ ޢަމަލަކަށްވާތީ، ޖުޑީޝަލް ސަރވިސް ކޮމިޝަންގެ ޤާނޫނުގެ ދަށުން، ނަޞޭޙަތް ދިނުމާއެކު ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަ ކުރުމަށް ޤާޟީ މުޙައްމަދު ސަމީރު އަށް އެންގުމަށް ޖޭއެސްސީން ވަނީ ނިންމާފައެވެ.
ކުރެވިފައިވާ ތުހުމަތާ ގުޅޭ ހެކިތައް ވަޒަންކުރުމުގައި އެ މައްސަލައިގެ ވަށައިގެންވާ ކަންތައްތަކަށް ބަލައި ކުޑަ ބޮޑުމިން ކަނޑައެޅުމުގެ އިޚްތިޔާރު ފަނޑިޔާރަށް ލިބިގެންވޭ. ވަކިގޮތަކަށް ފަނޑިޔާރުން ދުއްވާލަން ރާވައިގެން ހިންގާ ޖަރީމާއެއްގެތެރެއިން ކުރާ މިފަދަ ނޭއްގާނީ ޢަމަލުތައް ހަރުކަށި ޢިބާރާތުން ކުށްވެރި ކުރަން.