ނަތަންޔާހޫ ޓްރަމްޕަށް؛ އީރާނާ އެކު އެއްބަސްވުމެއް ނެހެދޭނެ، އޮތީ ތިން ގޮތެއް

އީރާނުގެ މިހާރުގެ ލީޑަޝިޕާ އެކު އެއްވެސް ކަހަލަ ޑިޕްލޮމެޓިކް އެއްބަސްވުމެއް ގާއިމުކުރުމަކީ ކުރެވޭނެ ކަމެއް ނޫން ކަމަށް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެމެރިކާގެ ރައީސް ޑޮނަލްޑް ޓްރަމްޕްގެ އަރިހުގައި ބުނެފިއެވެ. ދާދިފަހުން ދެބޭފުޅުން ބޭއްވި މި ބައްދަލުވުމުގައި، އީރާނުގެ މައްސަލައިގައި އަމަލުކުރެވިދާނެ މައިގަނޑު ތިން ގޮތަކާ ގުޅޭގޮތުން ނަތަންޔާހޫ ވަނީ ޓްރަމްޕާ މަޝްވަރާކޮށްފައެވެ.

މި ބައްދަލުވުމުގައި ވާހަކަދައްކަމުން ނަތަންޔާހޫ ބުނީ، އީރާނާއެކު “ރަނގަޅު އެއްބަސްވުމެއް” ހެދުމަކަށް އިސްރާއީލުން ދެކޮޅެއް ނުހަދާނެ ކަމަށެވެ. އެހެންނަމަވެސް، ތެހެރާންގައި މިހާރު ވެރިކަންކުރާ ފަރާތްތަކާއެކު އެފަދަ ހެޔޮ ނަތީޖާއެއް ނެރެވޭނެ އެއްބަސްވުމަކަށް ދެވިދާނެ ކަމަށް އޭނާ ގަބޫލުނުކުރާ ކަމަށް ސީދާ ޓްރަމްޕަށް ވަނީ ސާފުކޮށްދީފައެވެ.

އީރާނާ ދެކޮޅަށް އަމަލުކުރެވިދާނެ ދެވަނަ ގޮތެއްގެ ގޮތުގައި ނަތަންޔާހޫ ފާހަގަކުރީ އަސްކަރީ ހަމަލާއެއް ދިނުމެވެ. އަދި އިސްރާއީލަށް އަމާޒުކޮށް އީރާނުން އެއްވެސް ހަމަލާއެއް ދީފިނަމަ، އެކަމުގެ ބަދަލު ކުރިއަށްވުރެ މާ ވަރުގަދަ އަދި ނުރައްކާތެރި ގޮތަކަށް ލިބޭނެ ކަމުގެ އިންޒާރުވެސް އޭނާ ވަނީ ދީފައެވެ.

މީގެ އިތުރުން ތިންވަނަ ގޮތެއްގެ ގޮތުގައި ނަތަންޔާހޫ ހުށަހެޅީ އީރާނަށް އިގްތިސާދީ ގޮތުންނާއި އެހެނިހެން ގޮތްގޮތުން ކުރިމަތިކޮށްފައިވާ ދަތިކުރުމުގެ ފިޔަވަޅުތައް އިތުރަށް ވަރުގަދަކޮށް، ހިސާރުކުރުން ހަރުކަށި ކުރުމަށެވެ. މިއީ އެމެރިކާއިން އީރާނާ ދެކޮޅަށް ފިޔަވަޅުތައް ފުޅާކުރުމަށް ނިންމާފައިވާ ނިންމުމާ އެއްގޮތަށް ހުށަހެޅި ކަމެކެވެ.

އުސޫލެއްގެ ގޮތުން ސުލްހަވެރި އެއްބަސްވުމަކާ ދެކޮޅު ނޫން ކަމަށް ބުނި ނަމަވެސް، ނަތަންޔާހޫގެ ވާހަކަތަކުން ދޭހަވަނީ ޑިޕްލޮމެޓިކް ހައްލަކަށް އޭނާ އިތުބާރު ނުކުރާ ކަމެވެ. އަދި އީރާނާ ދެކޮޅަށް އަސްކަރީ ބާރުގެ ބޭނުންކުރުމުގެ ފުރުސަތު އިސްރާއީލުން އަބަދުވެސް ހުޅުވާލާފައި ބާއްވަން ބޭނުންވާކަން މި މަޝްވަރާތަކުން ވަނީ ހާމަވެފައެވެ.