ކޮވިޑްގެ ރެކޯޑުތައް ފޮރުވަން އުޅުނު ކަމަށް ފައުޗީގެ ކުރީގެ މުޝީރު އެއްބަސްވެއްޖެ

އެމެރިކާގެ ގައިންގަޔަށް އަރާ ބަލިތަކާ ބެހޭ ކުރީގެ އިސް މާހިރު އެންތަނީ ފައުޗީގެ މުޝީރެއްގެ ގޮތުގައި މަސައްކަތް ކުރި ޑޭވިޑް މޯރެންސް، ކޮވިޑް-19 އާއި ދިރާސާތަކަށް ދިން ފައިސާއާ ގުޅޭ ސަރުކާރުގެ ލިޔެކިޔުންތައް ފޮރުވައި އާންމު ރެކޯޑުތަކާ ބެހޭ ގާނޫނުތަކާ ޚިލާފުވި ކަމަށް އެމެރިކާގެ ކޯޓެއްގައި އިއުތިރާފުވެއްޖެއެވެ.

މެރީލޭންޑްގެ ގްރީންބެލްޓް ފެޑެރަލް ކޯޓުގައި ބޭއްވި އަޑުއެހުމެއްގައި އުމުރުން 78 އަހަރުގެ މޯރެންސް ވަނީ ލިޔެކިޔުންތައް ފޮރުވުމަށް ރޭވިކަމުގެ ދައުވާއަށް އެއްބަސްވެފައެވެ. ކޮވިޑް ދިރާސާތަކުގެ ގްރާންޓުތަކާ ގުޅޭގޮތުން އޭޕްރީލް 2020 އިން ފެށިގެން އާންމުން ހޯދަން އެދުނު މައުލޫމާތުތައް ފޮރުވަން އޭނާ ރޭވި ކަމަށް ބުނެ މިދިޔަ އޭޕްރީލް މަހު އޭނާގެ މައްޗަށް ދައުވާ އުފުލާފައިވާއިރު، މި ކުށަށް އޭނާގެ މައްޗަށް ފަސް އަހަރުގެ ޖަލު ހުކުމެއް އައުން އެކަށީގެންވެއެވެ.

މޯރެންސްގެ ވަކީލު ޓިމޮތީ ބެލެވެޓްޒް ހާމަކުރި ގޮތުގައި، ކުށަށް އިއުތިރާފުވުމުން ދޭހަކޮށްދެނީ އޭނާ ކުރި ކަންތައްތަކުގެ ޒިންމާ އޭނާ އަމިއްލައަށް ނަގާފައިވާ ކަމެވެ. މި މައްސަލައިގެ ހުކުމް އިއްވުން އޮންނާނީ އަންނަ ނޮވެމްބަރު މަހުގެ 12 ވަނަ ދުވަހުއެވެ.

ޕްރޮސެކިއުޓަރުން ބުނެފައިވަނީ، ޗައިނާގެ ވޫހާން ލެބޯޓްރީން ވައިރަސް ލީކުވި ކަމަށް ބުނެ ވާހަކަތައް ފެތުރެން ފެށުމުން، ވާލުގެ ކޮރޯނާވައިރަހާ ގުޅޭ ދިރާސާތަކަށް ނޭޝަނަލް އިންސްޓިޓިއުޓްސް އޮފް ހެލްތު (އެންއައިއެޗް) އިން ދެމުންދިޔަ އެހީ ކެންޑަލައި ދިނުމުން، އެ އެހީ އަލުން ހޯދައިދިނުމަށް މޯރެންސް މަސައްކަތް ކުރި ކަމަށެވެ. އެގޮތުން ވޫހާން ލެބަށް ފައިސާ ލިބުނީ އެމެރިކާގެ އެހީ ލިބުނު ކުންފުންޏެއް މެދުވެރިކޮށެވެ.

މީގެ އިތުރުން ވައިރަސް ލީކުވި ކަމަށް ދެކެވޭ ވާހަކަތަކާ ދެކޮޅަށް މަސައްކަތް ކުރުމަށާއި، މި މުއާމަލާތްތައް މައުލޫމާތު ހޯދައި ލިބިގަތުމުގެ ގާނޫނުގެ ދަށުން އާންމުވިޔަ ނުދިނުމަށްޓަކައި، މޯރެންސް އާއި އިތުރު ބަޔަކު ސަރުކާރުގެ ރަސްމީ އީމެއިލްގެ ބަދަލުގައި އަމިއްލަ ޒާތީ އީމެއިލް ބޭނުންކުރަން އެއްބަސްވި ކަމަށް ޕްރޮސެކިއުޓަރުން ފާހަގަކުރިއެވެ.

ފައުޗީގެ ދަށުން މޯރެންސް ސީނިއާ އޮފިޝަލެއްގެ ގޮތުގައި މަސައްކަތް ކުރި ނޭޝަނަލް އިންސްޓިޓިއުޓް އޮފް އެލާޖީ އެންޑް އިންފެކްޝަސް ޑިޒީޒަސް (އެންއައިއޭއައިޑީ) 38 އަހަރު ވަންދެން ހިންގީ ފައުޗީއެވެ. ފައުޗީ ވަނީ މިދިޔަ މަހު ސެނެޓް ކޮމިޓީއަކަށް ހާޒިރުވެ، އޭނާއާ ދެކޮޅަށް ހެކިބަސް ނުދިނުމުގެ ހައްގުގެ ބޭނުން ހިފުމުގެ އިތުރުން، ކެންޓަކީގެ ސެނެޓަރު ރޭންޑް ޕޯލް އޭނާ ޖަލަށްލުމަށް މަސައްކަތް ކުރާ ކަމަށް ބުނެ ފާޑުކިޔައިފައެވެ.

ކޮވިޑް-19 ފެތުރެން މެދުވެރިވި ސަބަބާ މެދު އަދިވެސް އެއްބަސްވުމަކަށް އާދެވިފައެއް ނުވެއެވެ. އެފްބީއައި އިން 2023 ވަނަ އަހަރު ބުނެފައިވަނީ މި ބަލިމަޑުކަން ފެތުރުނީ ވޫހާންގެ ލެބޯޓްރީއަކުން ލީކުވެގެން ކަމަށް ބެލެވޭ ކަމަށެވެ. ނަމަވެސް ޗައިނާއިން އެ ތުހުމަތު ދޮގުކުރެއެވެ. ސީއައިއޭ އިން 2025 ގެ ޖެނުއަރީގައި ބުނެފައިވަނީ ލެބުން ލީކުވި ކަމަށް ބެލެވުނަސް އެއީ މާ ބޮޑު ޔަގީންކަމެއް އޮތް ކަމެއް ނޫން ކަމަށެވެ. މީގެ އިތުރުން އެމެރިކާގެ ޖާސޫސީ އެހެން ހަތަރު އިދާރާއަކުން ގަބޫލުކުރަނީ މި ވައިރަސް އުފެދިފައިވަނީ ޖަނަވާރުންގެ ޒަރީއާއިން ގުދުރަތީ ގޮތުން ކަމަށެވެ.