ރާއްޖެއާއި އިންޑިއާއާ ދެމެދު އިތުރު ދެ ކޮންސިއުލޭޓެއް ޤާއިމުކުރަން އުޅޭ ކަމަށް ބުނެ ފަތުރަމުންދަނީ އެއްވެސް ޙަޤީޤަތެއް ނެތް ވާހަކަތަކެއް ކަމަށް ޚާރިޖީ ވުޒާރާއިން ހާމަކޮށްފިއެވެ.
އެ ވުޒާރާއިން ސާފުކޮށްދިން ގޮތުގައި، ވެރިރަށް މާލެ ފިޔަވައި ރާއްޖޭގެ އެހެން ރަށެއްގައި ބޭރު ޤައުމެއްގެ އެއްވެސް މިޝަނެއް ޤާއިމުކުރުމުގެ ވިސްނުމެއް އަދި ނިންމުމެއްވެސް ދިވެހި ދައުލަތުން މިހާތަނަށް ނިންމާފައެއް ނުވެއެވެ.
އަދި މާލޭގެ ބޭރުގައި އެފަދަ ކަމެއް ކުރެވޭނީ ކަމާގުޅޭ ހުރިހާ ދާއިރާތަކެއް ހިމަނައިގެން ކުރެވޭ ފުޅާ ދިރާސާތަކާއި މަޝްވަރާތަކަށް ފަހުގައި ކަމަށް ސަރުކާރުގެ ސިޔާސަތުގައި ކަނޑައަޅާފައިވާ ކަމަށްވެސް ފާހަގަކުރިއެވެ.
ހަމައެއާއެކު، އާންމުންގެ މެދުގައި ނުތަނަވަސްކަމާއި ކަންބޮޑުވުން އުފެދޭ ގޮތަށް ދޮގު މަޢުލޫމާތު ނުފެތުރުމަށާއި، ކޮންމެ ޚަބަރެއްވެސް ޒިންމާދާރުކަމާއެކު ޔަޤީންކޮށްގެން ހާމަކުރުމަށް ޚާރިޖީ ވުޒާރާއިން ވަނީ އިލްތިމާސްކޮށްފައެވެ.
ކޮމެންޓް (0)
ލޯޑް ކުރަމުން...