ކިންގް ފައިސަލް ހޮސްޕިޓަލަށް ބައިނަލްއަގުވާމީ އިތުރު ޝަރަފުވެރި އެވޯޑެއް ލިބިއްޖެ

ރިޔާޒް: “ވޯލްޑް ސްޓްރޯކް އޯގަނައިޒޭޝަން އެވޯޑްސް” ގައި ކިންގް ފައިސަލް ސްޕެޝަލިސްޓް ހޮސްޕިޓަލް އެންޑް ރިސާޗް ސެންޓަރަށް (KFSH&RC) ވަނީ “ޑައިމަންޑް ސްޓޭޓަސް” ލިބިފައެވެ. މިއީ ދުނިޔޭގެ އެންމެ ކުރިއަރާފައިވާ މެޑިކަލް ސެންޓަރުތަކުގެ ތެރޭގައި އެ މުއައްސަސާ ހިމެނޭކަން ކަށަވަރުކޮށްދޭ ބައިނަލްއަގުވާމީ ގިނަ ކާމިޔާބީތަކުގެ ތެރެއަށް އިތުރުވި ބޮޑު ކުރިއެރުމެކެވެ.

މި ފަހުގެ ކާމިޔާބީއަކީ ސައުދީ އަރަބިއްޔާގެ “ވިޜަން 2030” ގެ ދަށުން، ސިއްހީ ފަރުވާއާއި، ސިއްހީ ދިރާސާ އަދި އައު އީޖާދުތަކުގެ ސަރަހައްދީ މަރުކަޒަކަށް އެ ގައުމު ހެދުމަށް ކުރާ މަސައްކަތަށް ލިބުނު ބޮޑު ކުރިއެރުމެކެވެ.

އެ ހޮސްޕިޓަލުގެ ވެބްސައިޓުގައި ޝާއިއުކޮށްފައިވާ ގޮތުން، މި އެވޯޑަކީ ސްޓްރޯކް ނުވަތަ ވާގިނެތޭ ބަލިތަކަށް ފަރުވާ ދިނުމުގައި ބައިނަލްއަގުވާމީ މަތީ މިންގަނޑުތަކަށް އެ ހޮސްޕިޓަލުގެ “ނިއުރޯސައިންސް ސެންޓަރު” އިން އަމަލުކުރާތީ ދެވުނު އެވޯޑެކެވެ.

ވޯލްޑް ސްޓްރޯކް އޯގަނައިޒޭޝަނުން ފާހަގަކޮށްފައިވާ ގޮތުގައި، އެ ހޮސްޕިޓަލަށް ގެންދެވޭ ސްޓްރޯކް ބަލިމީހުންގެ ތެރެއިން މަދުވެގެން 75 އިންސައްތަ މީހުންނަށް، 60 މިނެޓް ތެރޭގައި ލޭގަނޑުވުން ނައްތާލާ ފަރުވާ (clot-dissolving treatment) ފޯރުކޮށްދެއެވެ. “ޑައިމަންޑް” ދަރަޖަ ދެވެނީ ކުއްލި ފަރުވާއާއި، ރައްކާތެރިކަމާއި، އަދި ހާއްސަ ފަރުވާތަކުގައި އެންމެ ފާހަގަކޮށްލެވޭ މަތީ ފެންވަރުގެ ހިދުމަތް ދޭ މަރުކަޒުތަކަށެވެ.

މި އެވޯޑް ދިނުމުގައި ބަލާފައިވަނީ ފަރުވާ ދިނުމަށް ހޭދަވާ ވަގުތާއި، ކެތީޓަރ ބޭނުންކޮށްގެން ދޭ ފަރުވާގެ ނަތީޖާ ފަދަ، ކްލިނިކަލް އަދި އޮޕަރޭޝަނަލް މިނިވަން މިންގަނޑުތަކެއްގެ މައްޗަށެވެ.

ކިންގް ފައިސަލް ހޮސްޕިޓަލުން ބުނި ގޮތުގައި މި ކާމިޔާބީގެ މައިގަނޑު އެއް ސަބަބަކީ މެދުއިރުމަތީގައި އަލަށް ތައާރަފުކުރި “މޮބައިލް ސްޓްރޯކް ޔުނިޓް” އެވެ. މި ޔުނިޓަކީ ސީޓީ ސްކޭނަރަކާއި ނިއުރޮލޮޖީގެ ހާއްސަ ޓީމެއް ހިމެނޭ ގޮތަށް ފަރުމާކޮށްފައިވާ އުޅަނދެކެވެ.

މީގެ ސަބަބުން ބަލިމީހާ އޮތް ތަނުން ފެށިގެން ބަލި ދެނެގަނެ ފަރުވާ ފެށުމުގެ ފުރުސަތު ލިބެއެވެ. އަދި ހޮސްޕިޓަލަށް ގެންދާ ވަގުތުވެސް ފަރުވާ މެދުނުކެނޑި ކުރިއަށް ގެންދެވޭތީ، ލަސްވުމުގެ ސަބަބުން ދިމާވެދާނެ ސިއްހީ އިތުރު ނުރައްކާތަކުން ބަލިމީހާ ސަލާމަތްކޮށްދެއެވެ.

ހޮސްޕިޓަލުން ބުނި ގޮތުގައި މި އެވޯޑަކީ ކުއްލި ފަރުވާދޭ ބަޔާއި، ނިއުރޮލޮޖީ، އިންޓަވެންޝަނަލް ރޭޑިއޮލޮޖީ އަދި ސްޓްރޯކް ކެއާ ޓީމުތަކުގެ މެދުގައި އޮތް ބަދަހި ގުޅުމުގެ ނަތީޖާއެކެވެ. މި މަސައްކަތްތަކަށް އެހީތެރިވެދެނީ ބަލިމީހުންގެ ނަތީޖާ ރަނގަޅުކުރުމަށްޓަކައި އެކުލަވާލާފައިވާ ހަރުދަނާ ނިޒާމުތަކުންނެވެ.

މިއީ މިއަހަރުގެ ތެރޭގައި އެ ހޮސްޕިޓަލަށް ލިބުނު ބައިނަލްއަގުވާމީ ހަވަނަ ބޮޑު ކާމިޔާބީއެވެ. މީގެ ސަބަބުން ސިއްހީ ފަރުވާއާއި، ދިރާސާ އަދި އައު އީޖާދުތަކުގެ ދާއިރާއިން އެ ހޮސްޕިޓަލަށް ދުނިޔޭގެ ފެންވަރުގައި ލިބިފައިވާ މަގުބޫލުކަން އިތުރަށް ހާމަވެގެންދެއެވެ.

2024 ވަނަ އަހަރު އެ ހޮސްޕިޓަލަށް ލިބިފައިވާ އެހެނިހެން ޝަރަފުވެރި ކާމިޔާބީތަކުގެ ތެރޭގައި ހިމެނެނީ:

• “ނޭޗަރ އިންޑެކްސް 2024” ގައި ސިއްހީ ދިރާސާތަކާއި ސައިންޓިފިކް މަސައްކަތްތަކުގެ ދާއިރާއިން ސައުދީ އަރަބިއްޔާގެ އެއްވަނަ މުއައްސަސާގެ މަގާމު ލިބުން.
• “ބްރޭންޑް ފައިނޭންސް” އިން ހޮވާ ގޮތުގައި، ވިދިވިދިގެން ހަތަރުވަނަ އަހަރަށް ސައުދީ އަރަބިއްޔާ އަދި މެދުއިރުމަތީގެ އެންމެ އަގުހުރި ހެލްތުކެއާ ބްރޭންޑުގެ މަގާމު ލިބުން (ބްރޭންޑުގެ އަގު 1.7 ބިލިއަން ޑޮލަރަށްވުރެ މައްޗަށް އަރައެވެ).
• ސީ.ޕީ.އާރު (CPR) ތައުލީމާއި އާންމުން ހޭލުންތެރިކުރުމުގެ ޕްރޮގްރާމްތަކުގެ ފުރިހަމަކަމަށްޓަކައި “އެމެރިކަން ހާޓް އެސޯސިއޭޝަން” އިން ދޭ ހާއްސަ ޝަރަފު ލިބުން.
• ދުނިޔޭގެ ޖެނޮމިކްސް އަދި ޕްރިސިޝަން މެޑިސިންގެ އެންމެ ބޮޑު އެއް ވިއުގަ ކަމަށްވާ “ގްލޯބަލް އެލަޔަންސް ފޯ ޖެނޮމިކްސް އެންޑް ހެލްތު” ގެ މެންބަރަކަށްވުން.
• “ބްރޭންޑް ފައިނޭންސް” ގެ 2024 ވަނަ އަހަރުގެ ދުނިޔޭގެ އެންމެ މޮޅު 250 އެކަޑެމިކް މެޑިކަލް ސެންޓަރުތަކުގެ ތެރެއިން މެދުއިރުމައްޗާއި އުތުރު އެފްރިކާގެ އެއްވަނަ އަދި ދުނިޔޭގެ 12 ވަނަ މަގާމު ލިބުން.

މީގެ އިތުރުން، “ނިއުސްވީކް” މަޖައްލާއިން ހޮވާ ދުނިޔޭގެ އެންމެ މޮޅު ހޮސްޕިޓަލްތަކުގެ ލިސްޓާއި، އެންމެ “ސްމާޓް” ހޮސްޕިޓަލްތަކުގެ ލިސްޓުގައިވެސް ކިންގް ފައިސަލް ހޮސްޕިޓަލް ވަނީ ހިމެނިފައެވެ.