އިސްރާއީލުގެ ހަމަލާއެއްގައި ލުބުނާނުގެ ސިވިލް ޑިފެންސް މަރުކަޒެއް ހަލާކުކޮށްލައިފި
ލުބުނާނުގެ ދެކުނުގެ ސިޓީއެއް ކަމަށްވާ ނަބަޠިއްޔާގައި ހުންނަ އެ ގައުމުގެ ސިވިލް ޑިފެންސްގެ ސަރަހައްދީ މަރުކަޒެއް، އިސްރާއީލުން ދިން ހަމަލާއެއްގައި މުޅިން ހަލާކުވެފައިވާ ކަމަށް އެ އިދާރާއިން އާދީއްތަ ދުވަހުގެ ކުރީކޮޅު ހާމަކޮށްފިއެވެ.
ސިވިލް ޑިފެންސްގެ ޑައިރެކްޓްރޭޓް ޖެނެރަލުން ބުނި ގޮތުގައި، އިސްރާއީލުގެ އަނިޔާވެރި ހަމަލާއެއް ސީދާ އެ އިމާރާތަށް އެރުމުގެ ސަބަބުން މުޅި އިމާރާތް ވަނީ ބިމާ ހަމަވެފައެވެ. އަދި އެތަނުގައި ހުރި ގިނަ އަދަދެއްގެ އުޅަނދުފަހަރާއި މެޝިނަރީތަކަށް ބޮޑެތި ގެއްލުންތަކެއް ލިބިފައިވާ ކަމަށްވެސް އެ އިދާރާއިން ބުންޏެވެ.
މި ހާދިސާ ހިނގުމުގެ ކުރިން އެތަނުގެ މުވައްޒަފުން އެހެން ތަނަކަށް ބަދަލުކޮށްފައިވާތީ، އެއްވެސް މީހަކަށް އަނިޔާއެއް ލިބިފައިވާ ކަމުގެ ރިޕޯޓެއް ލިބިފައި ނުވާ ކަމަށް އެ ފަރާތުން އިތުރަށް މައުލޫމާތު ދިނެވެ.
އިންސާނީ އެހީތެރިކަމާއި މީހުން ސަލާމަތްކުރުމުގެ މަސައްކަތްތަކަށް ހާއްސަކޮށްފައިވާ މަރުކަޒަކަށް ދިން މި ހަމަލާ ސިވިލް ޑިފެންސް އެޖެންސީން ވަނީ ހަރުކަށި އިބާރާތުން ކުށްވެރިކޮށްފައެވެ. އަދި އެ އެޖެންސީގެ އިންސާނީ ހިދުމަތުގެ މަސައްކަތްތައް ކުރިއަށް ގެންދިއުމުގައި ނުރައްކާތަކާއި ގޮންޖެހުންތައް އިންތިހާއަށް އިތުރުވަމުންދާކަން އެ އިދާރާއިން ފާހަގަކުރިއެވެ.
އޭޕްރީލް 17 ވަނަ ދުވަހު ހަމަލާ ބަދަލުކުރުން ހުއްޓާލުމުގެ އެއްބަސްވުމަކަށް އައި ނަމަވެސް، އިސްރާއީލުން ލުބުނާނަށް ދެމުންދާ ހަމަލާތައް އަދިވެސް ދަނީ ކުރިއަށެވެ. އިސްރާއީލުން ބުނާ ގޮތުގައި އެ ގައުމުން އަމާޒު ކުރަނީ އީރާނުގެ ތާއީދު އޮންނަ ހިޒްބުﷲ ޖަމާއަތަށެވެ.
ލުބުނާނުގެ ސިއްހީ ވުޒާރާގެ ހިސާބުތަކުން ދައްކާ ގޮތުގައި، މާރިޗު 2 ވަނަ ދުވަހުން ފެށިގެން އިސްރާއީލުން ދެމުންދާ ހަމަލާތަކުގައި މިހާތަނަށް 123 މީހުން ސަލާމަތްކުރާ މީހުންނާއި ސިއްހީ ހިދުމަތްތެރިން ވަނީ މަރުވެފައެވެ. މި ހަމަނުޖެހުންތައް އިތުރަށް ވަރުގަދަވެގެން ދިޔައީ، އީރާނުގެ އެންމެ މަތީ ވެރިޔާ އަވަހާރަކޮށްލުމާ ގުޅިގެން ހިޒްބުﷲ އިން އިސްރާއީލަށް ރޮކެޓް ހަމަލާތަކެއް ދޭން ފެށި ހިސާބުންނެވެ.
