އިންވެސްޓަރުންނާ ނުލައި ރޯލެކްސް 9.2 ބިލިއަން ޑޮލަރުގެ ކުންފުންޏަކަށް
ދުނިޔޭގެ އެންމެ މަޝްހޫރު އަދި އެންމެ އަގުބޮޑު ގަޑި އުފައްދާ ބްރޭންޑް، ރޯލެކްސް އަކީ ބޭރުގެ އެއްވެސް އިންވެސްޓަރަކާ ނުލައި 9.2 ބިލިއަން ޑޮލަރުގެ އަގުހުރި ކުންފުންޏަކަށް ވެފައިވާކަން ހާމަވެއްޖެއެވެ. މި ބޮޑު ކާމިޔާބީގެ ފަހަތުގައި ވަނީ ދުނިޔޭގެ އެހެން ކުންފުނިތަކާ ތަފާތު، އާދަޔާޚިލާފު ވިޔަފާރީގެ މޮޑެލްއެކެވެ.
ކުންފުނީގެ ފެށުމާއި ތާރީޚް
ރޯލެކްސްގެ ބިންގާ އެޅުނީ 1905 ވަނަ އަހަރު އިނގިރޭސިވިލާތުގެ ލަންޑަނުގައެވެ. ހެންސް ވިލްސްޑޯފް އާއި އޭނާގެ ދަރިފުޅު އަލްފްރެޑް ޑޭވިސް ގުޅިގެން އުފެއްދި މި ކުންފުންޏަށް ފުރަތަމަ ކިޔާފައިވަނީ “ވިލްސްޑޯފް އެންޑް ޑޭވިސް” އެވެ. ނަމަވެސް 1908 ވަނަ އަހަރު ކުންފުނީގެ ނަން “ރޯލެކްސް” އަށް ބަދަލުކޮށް، 1919 ވަނަ އަހަރު ކުންފުނީގެ މައި އޮފީސް ސްވިޒަލެންޑްގެ ޖެނީވާ އަށް ބަދަލުކުރެވުނެވެ.
ޚާއްސަ ވިޔަފާރީގެ މޮޑެލް
ރޯލެކްސްގެ އެންމެ ތަފާތު ސިފައަކީ އެ ކުންފުނީގައި އެއްވެސް އިންވެސްޓަރަކު ނުވަތަ އާންމު ހިއްސާދާރަކު ނެތުމެވެ. 1945 ވަނަ އަހަރު ހެންސް ވިލްސްޑޯފްގެ އަނބިކަނބަލުން އަވަހާރަވުމާ ގުޅިގެން އޭނާ ވަނީ “ހެންސް ވިލްސްޑޯފް ފައުންޑޭޝަން” ގެ ނަމުގައި ޗެރިޓީ ޓްރަސްޓެއް އުފައްދަވާފައެވެ. އަދި 1960 ވަނަ އަހަރު އޭނާ އަވަހާރަވުމުން، ކުންފުނީގެ ހުރިހާ ހިއްސާއެއް މި ފައުންޑޭޝަނަށް ބަދަލުކުރެވުނެވެ. މިއާއެކު ރޯލެކްސް ވެގެން ގޮސްފައިވަނީ ނޮން-ޕްރޮފިޓް ފައުންޑޭޝަނެއްގެ ދަށުން ހިންގާ ކުންފުންޏަކަށެވެ.
ސްވިޒަލެންޑްގެ ގާނޫނުތަކުގެ ދަށުން މި ފައުންޑޭޝަނަކީ ކޯޕަރޭޓް ޓެކްސް ދައްކަން ނުޖެހޭ އިދާރާއެކެވެ. މިކަމުގެ ސަބަބުން ކުންފުންޏަށް ލިބޭ ހުރިހާ ފައިދާއެއް ބޭނުންކުރަނީ ކުންފުނީގެ އުފެއްދުންތެރިކަން އިތުރުކުރުމަށާއި، ދިރާސާކުރުމަށާއި، އަދި އިޖުތިމާއީ އެކި ހަރަކާތްތަކަށެވެ.
އިޖުތިމާއީ އެހީތެރިކަން
ރޯލެކްސް އިން ލިބޭ ފައިދާގެ ބޮޑު ބައެއް ހޭދަކުރަނީ ދުނިޔެއަށް ފައިދާހުރި ކަންކަމަށެވެ. 2024 ވަނަ އަހަރުގެ ހިސާބުތަކަށް ބަލާއިރު، މި ފައުންޑޭޝަނުން ކޮންމެ އަހަރަކު ގާތްގަނޑަކަށް 390 މިލިއަން ޑޮލަރު ޗެރިޓީ މަސައްކަތްތަކަށް ހޭދަކުރުމުގެ ގާބިލިއްޔަތު ލިބިފައިވެއެވެ. މީގެ ތެރޭގައި ތިމާވެށި ރައްކާތެރިކުރުމަށް ހިންގާ “ޕަރޕެޗުއަލް ޕްލެނެޓް އިނިޝިއޭޓިވް” އާއި ފަންނުވެރިކަން ކުރިއެރުވުމަށް ހިންގާ “ޕަރޕެޗުއަލް އާޓްސް އިނިޝިއޭޓިވް” ފާހަގަކޮށްލެވެއެވެ.
ރޯލެކްސްގެ މި ކާމިޔާބީއަކީ ދުނިޔޭގެ ވިޔަފާރީގެ މަސްރަހުގައި ނަމޫނާ މިސާލެކެވެ. އެއްވެސް އިންވެސްޓަރަކާ ނުލައި، ހަމައެކަނި ފެންވަރު ރަނގަޅު އުފެއްދުންތަކާއި ހަރުދަނާ މެނޭޖްމަންޓެއްގެ އެހީގައި 9.2 ބިލިއަން ޑޮލަރުގެ ކުންފުންޏަކަށް ވެވޭނެކަން އެ ބްރޭންޑުން ވަނީ ސާބިތުކޮށްދީފައެވެ. އަދި ވިޔަފާރީގެ ފައިދާއާއެކު އިންސާނިއްޔަތަށް އެހީވުމުގެ މުހިންމުކަން ވެސް ރޯލެކްސްގެ މޮޑެލްއިން ހާމަވެގެންދެއެވެ.
މައުލޫމާތު ނަގާފައިވަނީ: އެންޑީޓީވީ ލައިފްސްޓައިލް
