މަސައްކަތްތެރިންގެ ޙައްޤުގައި އެމްޑީޕީ އަބަދުވެސް ވަކާލާތު ކުރާނެ ކަމަށް ރައީސް ނަޝީދު ވިދާޅުވެއްޖެއެވެ.
މަސްކަތްތެރިންގެ ދުވަހުގެ ތަހުނިޔާ އަދާކުރައްވަމުން މިއަދު އެމަނިކުފާނު ކުރެއްވި ޓްވީޓެއްގައި ވިދާޅުވީ މަސައްކަތްތެރިންގެ ޙައްޤުގައި އެމްޑީޕީ އަބަދުވެސް ވަކާލާތު ކުރާނެ ކަމަށެވެ. އެގޮތުން ފަތުރުވެރިކަމުންލިބިދޭން ޖެހޭ ސަރވިސްޗާޖް އެވަނީ ކަށަވަރު ވެފައިކަމަށް އެމަނިކުފާނު ވިދާޅުވިއެވެ. އަދި އެންމެ ކުޑައުޖޫރަ ކަނޑައެޅުމުގެ މަސައްކަތް އެމްޑީޕީން ހުއްޓައިނުލާނެކަމަށް ވެސް އެމަނިކުފާނު މިއަދު ކުރެއްވި ޓްވިޓްގައި ވިދާޅުވެފައިވެއެވެ.
ރައީސް ނަޝީދު މިމޭރުމުން ވާހަކަފުޅު ދެއްކެވިއިރު އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވީ އިކޮނޮމިކް މިނިސްޓްރީގެ އަމާޒަކީ ވަޒީފާގެ ގާނޫނަށް ގެނެސްފައިވާ އިސްލާހުތަކުގައި ވެސް އޮތް ގޮތުގެ މަތިން މި އަހަރުގެ ފަހުކޮޅު މަސައްކަތްތެރިންނަށް ދޭން ޖެހޭނެ އެންމެ ކުޑަ އުޖޫރަ ނުވަތަ މިނިމަމް ވޭޖް ކަނޑައެޅުން ކަމަށެވެ.
މަސައްކަތްތެރިންގެ ދުވަހުގެ މުނާސަބަތާ ގުޅިގެން މިނިސްޓަރު ފައްޔާޒު ކުރެއްވި ޓްވީޓެއްގައި ވިދާޅުވީ މިދިޔަ އަހަރު މުޅި ދުނިޔެއަށް ކުރިމަތިވި ކޮވިޑް-19 ގެ ބަލިމަޑުކަމާ ގުޅިގެން އައިސްފައިވާ އިގްތިސާދީ ތަދުމަޑުކަމުގެ ސަބަބުން މަސައްކަތްތެރިންނަށް ނިމިގެން ދިޔަ އަހަރު ވެފައިވަނީ ވަރަށް ބުރަ ބޮޑު އަހަރަކަށް ކަމަށެވެ.
“އެހެން ވިޔަސް 2021 ވަނަ އަހަރު ފެންނަނީ ވަރަށް އުއްމީދީކޮށް، ވަރަށް އުޖާލާކޮށް، އަޅުގަނޑުމެން އަމާޒު މި ކުރަނީ މަސައްކަތްތެރިންނަށް ހައްގުވާ ވަރުގެ މިނިމަމް ވޭޖެއް މި އަހަރުގެ ފަހުކޮޅުގައި ކަނޑައަޅައި ތަންފީޒު ކުރުމަށް،” ފައްޔާޒު ކުރެއްވި ޓްވީޓްގައިވެއެވެ.
އޭގެ އިތުރުން އިންޑަސްޓްރިއަލް ރިލޭޝަންސް އެކްޓް ނުވަތަ ސިނާއަތްތަކާ ގުޅޭ ގާނޫނީ އޮނގަނޑަކާ އޮކިއުޕޭޝަނަލް ހެލްތް އެންޑް ސޭފްޓީ އެކްޓްއެއް ފާސްކުރުމަކީ ވެސް މި އަހަރުގެ އަމާޒެއް ކަމަށް ފައްޔާޒު ވިދާޅުވިއެވެ. އަދި މިއީ ވަރަށް އުއްމީދީ ކުރިއެރުންތަކެއް ކަމަށް ވެސް އޭނާ ވިދާޅުވިއެވެ.
މަސައްކަތްތެރިންނަށް މިނިމަމް ވޭޖެއް ކަނޑައެޅުމާއި، ވަޒީފާ ނުލިބޭ ފަރާތްތަކަށް އިނާޔަތެއް ކަނޑައެޅުމަކީ ރައީސް އިބްރާޙިމް މުޙައްމަދު ޞާލިޙްގެ ރިޔާސީ ވައުދުފުޅެކެވެ. އަދި އެއީ ރައްޔިތުންގެ މަޖިލީހުގެ އިންތިޚާބުގައި އެމްޑީޕީއިން ހުށަހެޅި “އެޖެންޑާ 19” ގެ ކަރުދާހުގައި ވެސް ހިމެނޭ ގާނޫނީ އޮނިގަނޑެކެވެ.
ކޮމެންޓް (0)
ލޯޑް ކުރަމުން...