ށ. ފޯކައިދޫގައި އެމްޑީޕީ ސަޕޯޓަރުން ފިޔާތޮށި ކުލައިގެ ފޮތި އޮޅާފައި ހުރި ރުކެއް ކަނޑާލި ވީޑިއޯއެއް ސޯޝަލް މީޑިއާގައި ވައިރަލް ވެފައިވާއިރު އަދި އެވީޑިއޯ މައްސަލަ އެމްޑީޕީއިން ކުށްވެރިކޮށްފައިވާއިރު އެއީ ކުޅެލި ޑްރާމާއެއް ކަމަށް ބުނެ ކައުންސިލުން އެކަން ދިފާއުކޮށްފި އެވެ.
ސޯޝަލް މީޑިއާގައި މިއަދު ވައިރަލްވި ވީޑިއޯ އިން ފެންނަ ގޮތުގައި ރީނދޫ ކުލައިގެ ހެދުން ލައިގެން ތިބި ބަޔަކު އެ ރަށު އަތިރިމަތީ ހުރި ފިޔާތޮށި ފޮތި އޮޅާފައި ހުރި ރުކެއް ކަރަންޓު ކީހަކުން ބުރިކޮށްލައި ރުއް ކަނޑާ ވައްޓާލަ އެވެ. އަދި އެ ސަރަހައްދުގައި އެއްވެފައި ތިބި އެމްޑީޕީގެ ގިނަ ސަޕޯޓަރުން އަތް ޖަހައި، އެކަމާ އުފާ ފާޅު ކުރެ އެވެ. އަދި ރުށްކަނޑާލުމުގެ ކުރިން އެރުކުގައި ބައްދައިގެން (ފިޔާތޮށިކުލައިގެ އެއްޗެއްލައިގެން) އޮތް މީހަކުވެސް ގަދަކަމުން ހިފައިގަނެގެން ދުރައްޖައްސައެވެ.
އެކަމާ ގުޅިގެން އޮންލައިން ނޫސް “މިހާރު” އާ ވާހަކަ ދައްކަވަމުން ފޯކައިދޫ ކައުންސިލްގެ ރައީސް މުހައްމަދު ރާޝިދު ވިދާޅުވިކަމަށް އެނޫހުގައި ރިޕޯޓްކޮށްފައިވަނީ އެއީ ލޯކަލް ކައުންސިލް އިންތިހާބުން ކާމިޔާބުވުމާ ގުޅިގެން އެ ރަށުގެ އެމްޑީޕީ ސަޕޯޓަރުން ކުޅެލި ޑްރާމާއެއް ކަމަށެވެ.
ވީޑިއޯއިން ފެންނަ ރުކަކީ ކުރިން ބިންދައިގެން ގޮސް ބަނދަރު ސަރަހައްދަށް ވެއްޓިފައި އޮތް ރުކެއް ކަމަށާއި އެރުށް އަލުން އިންދައިގެން ފިޔާތޮށި ކުލައިގެ ފޮތި އޮޅި ކަމަށާއި އުފާ ފާޅު ކުރުމުގެ ގޮތުން ކަނޑާލީ ކަމަށް އޭނާ ވިދާޅުވި ކަމަށް މިހާރު ނޫހުގައި ވެއެވެ.
ކައުންސިލް އިންތިހާބުގައި ފޯކައިދޫ ކައުންސިލްގެ ހުރިހާ ގޮނޑިއެއް ކާމިޔާބު ކުރީ އެމްޑީޕީންއިން ކާމިޔާބު ކޮށްފައިވާއިރު އެރަށަކީ މިސަރުކާރުން ވަރަށްގިނަ މަޝްރޫޢުތައް މިހާރުވެސް ކުރިއަށް ގެންދަމުން އަންނަ ރަށެއްކަން ފާހަގަކޮށްލެވެއެވެ.
ކޮމެންޓް (0)
ލޯޑް ކުރަމުން...