ރާއްޖޭގެ ރަސްމީ ރިޒާވުން ސެޕްޓެމްބަރު މަހު ބޮޑު ދަށްވުމެއް

ނިމިދިޔަ ސެޕްޓެމްބަރު މަސް ނިމުނުއިރު ދައުލަތުގެ ރަސްމީ ރިޒާވް 547 މިލިއަން ޑޮލަރަށް އަދި ބޭނުންކުރެވޭ ރިޒާވް 169.8 މިލިއަން ޑޮލަރަށް ވެއްޓިފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެންމެ ފަހުގެ ހިސާބުތަކުން ދައްކައިފިއެވެ.

މިއީ އޮގަސްޓު މަހު ރަސްމީ ރިޒާވުގައި ހުރި 643.9 މިލިއަން ޑޮލަރާ އަޅާބަލާއިރު 14.9 އިންސައްތައިގެ ދަށްވުމެކެވެ.

މަރުކަޒީ ބޭންކުން ހާމަކުރި ގޮތުގައި، މި މުއްދަތުގައި ރިޒާވް ދަށްވާން މެދުވެރިވި މައިގަނޑު ސަބަބަކީ އެމްއެމްއޭއަށް ބޭރު ފައިސާ ވަން މިންވަރަށްވުރެ ބާޒާރަށް ދޫކުރި އަދަދު %46.9 އަށް އިތުރުވުމެވެ. މީގެ ތެރޭގައި 2019 ވަނަ އަހަރު ދައުލަތުގެ ބަޖެޓަށް އެހީވުމުގެ ގޮތުން އެސްބީއައި މެދުވެރިކޮށް ނަގާފައިވާ ޓީ-ބިލަށް ދައްކަންޖެހޭ 50 މިލިއަން ޑޮލަރު އެއްކޮށް ދައްކައި ޚަލާޞްކުރުމަށް ސަރުކާރަށް ޑޮލަރު ވިއްކުން ހިމެނެއެވެ.

މީގެއިތުރުން، އެތެރޭގެ ބާޒާރުގައި ބޭރު ފައިސާގެ ދަތިކަން ކުޑަކުރުމަށާއި އާންމު ވިޔަފާރިތަކަށް ލުއިފަސޭހަކޮށްދިނުމުގެ ގޮތުން، ވިޔަފާރި ބޭންކުތަކަށް އެމްއެމްއޭ މެދުވެރިކޮށް ދޫކުރި ޑޮލަރުގެ އަދަދުވެސް ވަނީ އިތުރުކޮށްފައެވެ. ސަރުކާރުން މިހާރު މަސައްކަތް ކުރަމުން ދަނީ ބޭރު ފައިސާ ރާއްޖޭގެ ބޭންކިން ނިޒާމަށް ވެއްދުމުގެ އާ ޤަވާއިދުތަކާއެކު ރިޒާވް އަލުން ހަރުދަނާ ކުރުމަށެވެ.