އެއްދުވަހެއްގެ ހެނދުނު، އައިޝާ ސްކޫލަށް ދިޔައީ އޭނާ އެންމެ ކާހިތްވާ ސޭންޑްވިޗާއި، ކަދުރު އަދި ކުޑަ ކޭކު ފޮށްޗެއް ހިފައިގެންނެވެ. ކޮންމެ ދުވަހަކުވެސް އިންޓަވަލް ވަގުތުގައި އެކުއްޖަކު ގެނައި ކާއެއްޗެއް ކާން ފުރުސަތުލިބެއެވެ.
އިންޓަވަލް ވަގުތު ޖެހުމާއިއެކު، އައިޝާ އޭނާގެ ރައްޓެހިންނާއެކު ކާން އިށީނެވެ. ކެއުމަށް ތައްޔާރުވި ވަގުތު، އޭނާގެ ރަހުމަތްތެރިޔާ މަރިޔަމް އެއްވެސް އެއްޗެއް ނުކައި މަޑުމަޑުން އިންތަން އައިޝާއަށް ފެނުނެވެ.
“މަރިޔަމް، ކީއްވެ އެއްޗެއް ނުކައި ތި އިނީ؟” އައިޝާ އެހިއެވެ. “މިއަދު ކެއުން ގެންނަން ހަނދާން ނެތުނީ،” މަރިޔަމް ދެރަވެފައި ޖަވާބުދިނެވެ.
އައިޝާ އޭނާގެ ކާއެއްޗިއްސައް ބަލާލިއެވެ. އޭނާ އެ ކޭކު ދެކެ ވަރަށް ލޯބިވެއެވެ. އަދި އެއީ އޭނާ އަމިއްލައަށް ކާން ބޭއްވި އެއްޗެކެވެ. ނަމަވެސް، އެ ވަގުތު އޭނާގެ މަންމަ އަބަދުވެސް ބުނާ ބަހެއް ހަނދާންވިއެވެ: “އޯގާތެރި އަދި ދީލަތި މީހުންދެކެ ﷲ ލޯބިވެވޮޑިގަންނަވައެވެ. މީހުންނަށް އެހީތެރިވެ ހިއްސާކުރުމުން، ﷲ އެކަމުގެ ހެޔޮ ދަރުމަ ދެއްވާނެއެވެ.”
އައިޝާ ހިނިތުންވުމާއެކު ބުންޏެވެ، “މަރިޔަމް، ދެރަނުވޭ. އަހަރެމެން ދެމީހުންނަށް މި ކެއުން ބަހާލައިގެން ކެވިދާނެ.”
އޭނާ މަރިޔަމަށް ސޭންޑްވިޗުން ބައެއްގެ އިތުރުން، ބައެއް ކަދުރާއި ކޭކު ފޮތިން ބައެއް ދިނެވެ. އެއާއެކު މަރިޔަމްގެ މޫނުމަތިން އުފާވެރިކަން ފެނިގެންދިޔައެވެ.
“ޝުކުރިއްޔާ އައިޝާ! ތިއީ ވަރަށް އޯގާތެރި އަމަލެއް،” މަރިޔަމް ބުންޏެވެ. އައިޝާގެ ހިތަށްވެސް ވަރަށް ބޮޑު އުފާވެރިކަމެއް ލިބުނެވެ. އެހެން މީހުންނާ ތަކެތި ހިއްސާކުރުމުން ރަހުމަތްތެރިޔާއަށް އުފާވެރިކަން ލިބުމުގެ އިތުރުން، އަމިއްލަ ނަފްސަށްވެސް ހިތްހަމަޖެހުން ލިބޭކަން އޭނާއަށް އިހުސާސް ކުރެވުނެވެ.
އައިޝާ ގެއަށް ގޮސް، ހިނގި ކަންތައްތަކުގެ ވާހަކަ މަންމައަށް ކިޔައިދިނެވެ. މަންމަ އައިޝާގެ ގައިގައި ބައްދާލުމަށްފަހު ބުންޏެވެ، “މާޝާﷲ ދަރިފުޅާ، އަބަދުވެސް ހަނދާންކުރާތި، ﷲގެ ހަޟްރަތުގައި ކިތަންމެ ކުޑަ ހެޔޮ އަމަލަކީވެސް ވަރަށް މަތިވެރިވެގެންވާ ކަމެއް.”
އައިޝާ ހިނިތުންވުމާއެކު ޖަވާބުދިނެވެ، “އިންޝާﷲ، އަބަދުވެސް އެހެން މީހުންނާ ތަކެތި ހިއްސާކުރަން އަހަރެން މަސައްކަތް ކުރާނަން.”
ވާހަކައިން ލިބޭ އިބުރަތް:
އަޅުގަނޑުމެންގެ އަތުގައި ހުރި އެއްޗެއް ކިތަންމެ ކުޑަ ނަމަވެސް، އެހެން މީހުންނާ އެ އެއްޗެއް ހިއްސާކުރަންވާނެއެވެ. އެހެން މީހުންނާ ތަކެތި ހިއްސާކުރުމަކީ އޯގާތެރިކަމާއި ދީލަތިކަން ރަމްޒުކޮށްދޭ ކަމެކެވެ. އަދި އެއީ ދެފަރާތަށްވެސް އުފާވެރިކަން ގެނެސްދޭ ކަމެކެވެ.
ކޮމެންޓް (0)
ލޯޑް ކުރަމުން...