ކުދި ޖަޒީރާ ގައުމުތަކަކީ ހަމައެކަނި ތިމާވެށީގެ ނާޒުކުކަން ބޮޑު ތަންތަނުގެ ގޮތުގައި ދެކޭ ދެކުން ބަދަލުކޮށް، އެއީ އީޖާދީ އުފެއްދުންތަކާއި ވިޔަފާރީގެ މުހިންމު ފުރުސަތުތަކެއް އެކުލެވޭ ގައުމުތަކެއްގެ ގޮތުގައި ބަލައިގަތުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގޮވާލައްވައިފިއެވެ.
ރާއްޖޭގައި ކުރިއަށްދާ ސިޑްސް ގްލޯބަލް ބިޒްނަސް ނެޓްވަރކް ފޯރަމް އިފުތިތާހުކޮށްދެއްވަމުން ރައީސް ވިދާޅުވީ ޖަޒީރާ ގައުމުތަކަށް ކުރިމަތިވާ ގޮންޖެހުންތަކަކީ އުފެއްދުންތެރި އަދި އީޖާދީ ހައްލުތަކަށް ބަދަލުކުރެވިދާނެ ކަންކަން ކަމަށެވެ. އަދި އެ ގައުމުތަކުގެ ހިންމަތްތެރިކަން އެންމެ ބޮޑަށް ފެންނަނީ ޕްރައިވެޓް ސެކްޓަރުންކަން ފާހަގަކުރައްވައި، ޖަޒީރާ ގައުމުތަކަކީ އައު ފަންނިއްޔާތުތަކާއި ޚިޔާލުތައް ތަޖުރިބާކުރާ ލެބޯޓަރީތަކަކަށް ހެދިދާނެކަމަށް ވިދާޅުވިއެވެ.
އިގުތިސާދީ ގޮންޖެހުންތަކުން އަރައިގަތުމަށް ރާއްޖޭގައި ސުމޭކު ފަންނިއްޔާތު ބޭނުންކުރަމުންދާކަން ފާހަގަކުރައްވައި، މޯލްޑިވްސް 2.0 އެޖެންޑާގެ ދަށުން ކުރެވޭ މަސައްކަތްތަކަށް ރައީސް އަލިއަޅުއްވާލެއްވިއެވެ. ޚާއްސަކޮށް ޒުވާން ވިޔަފާރިވެރިންނާއި އަންހެނުން އިސްވެ ކުރިއަށްގެންދާ ސްޓާޓްއަޕްތަކަށް މާލީ އެހީތެރިކަން ފޯރުކޮށްދިނުމަށް އިސްކަންދެއްވާކަން އެމަނިކުފާނު ފާހަގަކުރެއްވިއެވެ.
މީގެއިތުރުން ޒަމާނީ ފޮރިން އިންވެސްޓްމަންޓް ގާނޫނާއި 2027 ގައި ގާއިމުކުރުމަށް ހަމަޖެހިފައިވާ ޓްރޭޑް އެކްސެލެރޭޝަން ޒޯނާއެކު، ލޮޖިސްޓިކްސް އަދި ފްލޯޓިންގ ސޯލާގެ ދާއިރާއިން އިންވެސްޓްމަންޓްތައް އިތުރުކުރުމަށް ކުރެވޭ މަސައްކަތްތައް ހިއްސާކުރެއްވިއެވެ. އަދި ޖަޒީރާ ގައުމުތަކުގެ އުންމީދީ ޚިޔާލުތައް عالمީ ބާޒާރުތަކާއި ގުޅުވައިދޭ މަރުކަޒީ މަންސައެއްގެ ގޮތުގައި ގްލޯބަލް ބިޒްނަސް ނެޓްވަރކް ތަރައްގީކުރުމަށް އދ. ގެ ކުދި ޖަޒީރާ ގައުމުތަކާބެހޭ އޮފީހަށް އެމަނިކުފާނު އެދިވަޑައިގެންނެވިއެވެ.
ކޮމެންޓް (0)
ލޯޑް ކުރަމުން...