ޑޮލަރުގެ ކަޅުބަޒާރު ސިއްރުކުރަން އުޅުމަކީ ޤާނޫނުއަސާސީއާ ހިލާފުކަމެއް، އެކަމަށް ތަބާނުވޭ!: ފައްޔާޒު

މާކެޓުގައި ބޭރު ފައިސާ ވިއްކާ މަތީ ރޭޓުތަކުގެ ވާހަކަ މީޑިއާތަކުގައި ރިޕޯޓުކުރުން މަނާކުރަން މަޖިލީހުގެ މާލިއްޔަތު ކޮމެޓީން އިސްލާހު ފާސްކުރުމާ ގުޅިގެން، ޤާނޫނުއަސާސީއާ ހިލާފަށް ހަދާ އެފަދަ ޤާނޫނުތަކަށް ތަބާނުވުމަށް އިދިކޮޅު އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް އިލްތިމާސް ކުރައްވައިފިއެވެ.

ކުރީގެ އިކޮންމިކް މިނިސްޓަރު ފައްޔާޒު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ޑޮކިއުމެންޓރީއަކާ ގުޅިގެން “ގެގް އޯޑަރެއް” ނެރުމަށްފަހު، ސަރުކާރުން މިހާރު މަސައްކަތް ކުރަނީ އިންތިހާއަށް އުފުލެމުންދާ ޑޮލަރުގެ ރޭޓުގެ ހަގީގަތް ރައްޔިތުންނަށް އޮޅުވާލައި ފޮރުވުމަށް ކަމަށެވެ. އަދި ޤައުމުގައި ބޭރު ފައިސާގެ ދަތިކަން ބޮޑުވެގެން އުޅެނީ ސަރުކާރުގެ އަނގަ ބަންދުކުރުމުގެ ސިޔާސަތާއި، ބޮޑެތި އިސްރާފުތަކުގެ ސަބަބުން ކަމަށް އޭނާ ތުހުމަތު ކުރެއްވިއެވެ.

ސަރުކާރުން ކެނޑިނޭޅި މަސައްކަތް ކުރަނީ ރައްޔިތުންގެ އަނގަ ބަންދުކޮށް ހަގީގަތް އޮއްބާލަން ކަމުގައި ވީނަމަވެސް، ދިވެހި ރައްޔިތުންނާއި ނޫސްވެރިން ޑޮލަރުގެ މައްސަލައިގައި އަޑުއުފައްދައި، އެ ވާހަކަތައް ލިޔުން ހުއްޓައިނުލާނެ ކަމަށްވެސް ފައްޔާޒު ވިދާޅުވިއެވެ.

މި ސަރުކާރުގެ އަމަލުތައް ހުރި ގޮތުން ދިވެހިރާއްޖެ މިހާރު ނޯތު ކޮރެއާފަދަ އުސޫލުތަކެއް ހިންގާ ޤައުމެއްގެ ހާލަތަށް ވައްޓާލާފައިވާ ކަމަށް ސިފަކުރައްވަމުން، ޤާނޫނުއަސާސީން ލިބިދޭ އަސާސީ ހައްގުތަކާ ހިލާފަށް ހަދާ އެއްވެސް ޤާނޫނަކަށް އަމަލުނުކުރުމަށް އޭނާ ވަނީ ރައްޔިތުންނަށް ގޮވާލައްވާފައެވެ.

މި އިސްލާހު އަނބުރާ ކޮމިޓީއަށް ފޮނުވުމުން، މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި ސަރުކާރު ހިންގާ ޕީއެންސީގެ އަޣުލަބިއްޔަތުން ވަނީ އެމްއެމްއޭއިން ކަނޑައަޅާފައިވާ ރޭޓަށްވުރެ މަތިން ކަޅުބަޒާރުގައި ކުރެވޭ ބޭރު ފައިސާގެ ވިޔަފާރިތައް އިޝްތިހާރުކުރުމާއި ޕްރޮމޯޓުކުރުން ކުށަކަށް ހަދާ އިސްލާހު ފާސްކޮށްފައެވެ.