އަގުބޮޑުކޮށް ޑޮލަރު ވިއްކުމާއި އިޝްތިހާރުކުރުން ހުއްޓުވުމަށް ބޮޑެތި ޖޫރިމަނާތަކެއް ކަނޑައަޅައިފި

ކަޅުބާޒާރުގައި ބޭރު ފައިސާ ގަނެވިއްކުމާއި، ރަސްމީ ރޭޓަށް ވުރެ އަގުބޮޑުކޮށް ޑޮލަރު ވިއްކަން އިޝްތިހާރުކުރާ ފަރާތްތައް މިއިން ދުވަހަކު ނުކުރާހާ ބޮޑެތި އަދަދުތަކުން ޖޫރިމަނާ ކުރެވޭ ގޮތަށް ބޭރު ފައިސާއާ ބެހޭ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފިއެވެ.

މާލިއްޔަތު ކޮމިޓީގެ މިއަދުގެ ބައްދަލުވުމުގައި ފުނަދޫ ދާއިރާގެ މެންބަރު މުހައްމަދު މަމްދޫހު ހުށަހެޅުއްވި މި އިސްލާހުގައިވާ ގޮތުން، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާފައިވާ ރަސްމީ ރޭޓަށް ވުރެ މަތީ ރޭޓެއްގައި ބޭރު ފައިސާ ވިއްކުމަކީ ނުވަތަ ވިއްކަން މަސައްކަތް ކުރުމަކީ މަނާކަމެކެވެ. އަދި އެފަދަ ކުށެއް ކުރާ ފަރުދުން ކުށުގެ ކުޑަބޮޑުމިނަށް ބަލައި 25,000 ރުފިޔާއާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.

މީގެއިތުރުން، ރަސްމީ ރޭޓަށް ވުރެ އަގުބޮޑުކޮށް ޑޮލަރު ގަނެވިއްކުމަށްޓަކައި ޑިޖިޓަލް ވަސީލަތްތަކާއި އެކި ޕްލެޓްފޯމްތައް ބޭނުންކޮށްގެން އިޝްތިހާރު ކުރުމާއި އެކަމަށް ހިތްވަރުދޭ ލިޔުންތައް އާންމުކުރުމަކީވެސް ގާނޫނީ ކުށެއްގެ ގޮތުގައި ވަނީ ކަނޑައަޅައިފައެވެ. އެފަދައިން އިޝްތިހާރު ކުރާ ފަރުދުން 25,000 ރުފިޔާއާއި 500,000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބިލުގައި ބަޔާންކޮށްފައިވެއެވެ.

މި ކުށްތަކުގައި ކުންފުނިތަކާއި ރަޖިސްޓްރީކޮށްފައިވާ ވިޔަފާރިތައް ނުވަތަ ގާނޫނީ ޝަހުސުތައް ޝާމިލުވާ ނަމަ އަދަބު މާ ބޮޑެވެ. އެގޮތުން އެފަދަ ފަރާތްތަކަށް ކަނޑައެޅޭނެ އަދަބަކީ 100,000 ރުފިޔާއާއި ފަސް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.

ކަޅު ބާޒާރުގައި ޑޮލަރުގެ ވިޔަފާރި ކުރުމަކީ މިހާރުވެސް މަނާ ކަމެއް ނަމަވެސް، ގާނޫނަށް މިއަދު ގެނެވުނު އިސްލާހުތަކާއެކު މިފަދަ އަމަލުތައް ހުއްޓުވައި ތަންފީޒު ކުރުމަށް ކަމާބެހޭ އިދާރާތަކަށް އިތުރު ގާނޫނީ ބާރާއި ފުރިހަމަކަން ލިބިގެންދާނެއެވެ.