ޔުނައިޓެޑް އަރަބް އެމިރޭޓްސް އާއި އިޒްރޭލުން ދެ ގައުމުގެ ސިއްހީ އިދާރާތަކުން ދޫކުރާ ވެކްސިން ސެޓްފިކެޓް ތައް ދެ ގައުމުން ބަލައިގަތުމާ ބެހޭ އެމްއޯޔޫއެއްގައި ސޮއިކޮށްފި އެވެ.
މި އެމްއޯޔޫއަކީ ކޮވިޑުގެ ބަލިމަޑުކަމުން އަރައިގަނެ، އިތުރަށް ކަންކަން ހަރުދަނާކުރުމަށް ދެ ގައުމުގެ ދެމެދުގައި މިހާރު ކުރިއަށްދާ އެއްބާރުލުމާއި ކޯޑިނޭޝަންގެ ދަށުން ސޮއިކުރެވުނު އެމްއޯޔޫއެކެވެ.
ދެޤައުމުގެ އޮފިޝަލުން ހާމަކުރައްވާ ގޮތުގައި މި ތަރައްޤީއަކީ، މުޖުތަމަޢުގެ އެކި ގިންތިތަކަށް އަމާޒުކޮށްގެން ހިންގާ ވެކްސިން ކެމްޕޭންތަކުގެ މަޤްޞަދު ޙާޞިލްކުރުމަށް، މިނިވަންކަމާއެކު މީހުން އެއްތަނުން އަނެއްތަނަށް ދަތުރުކުރެވޭނެ މަގު ތަނަވަސްކޮށްދީ، ބޭނުންވާ ލަނޑުދަނޑިތައް ޙާޞިލުކުރުމަށް ދެ ފަރާތުގެ ޝައުޤުވެރިކަން ހުރި މިންވަރުގެ ތެރޭގައި ހިމެނޭ ތަރައްޤީއެކެވެ. މި ރޮނގުން ދެ ފަރާތުން ކުރި މަސައްކަތްތަކުގެ ސަބަބުން، ކޮވިޑް-19 ގެ ވެކްސިން ބޮލަކަށް ޖެހޭ މިންވަރު އެންމެ މަތީ ރޭޓުގައި ދެ ގައުމަށް ވެސް ވަނީ ހޯދައިދިނުމުގައި ބޮޑު ހިއްސާއެއް އަދާކޮށްފަ އެވެ.
މި އެމްއޯޔޫގައި ވާޗުއަލްކޮށް ސޮއިކުރެއްވީ މިނިސްޓަރ އޮފް ހެލްތު އެންޑް ޕްރިވެންޝަން ޢަބްދުއްރަޙްމާން ބިން މުޙައްމަދު ބިން ނާސިރު އަލް އޮވޭސްއާއި، އިސްރާއީލުގެ ޞިއްޙަތާބެހޭ ވަޒީރު ނިޓްޒާން ހޫރޯވިޓްޒްއެވެ.
މި މެމޮރެންޑަމްގެ މައްޗަށް ބިނާކޮށް، ކޮވިޑް-19 ގެ ބަލިމަޑުކަމުގެ ހާލަތުގައި ދަތުރުވެރިން ރައްކާތެރިކަމާއެކު ދަތުރުކުރެވޭނެ މަގު ފަހިކޮށްދިނުމަށް ދެ ގައުމުގެ ސަރުކާރުން ކުރަމުންދާ މަސައްކަތްތަކުގެ ދަށުން، ވެކްސިން ދީފައިވާ މީހުން އެއްވެސް ހުރަހެއްނެތި އެއްތަނުން އަނެއްތަނަށް ދަތުރުކުރެވޭނެ ކަން ކަށަވަރުކުރުމަށްޓަކައި، ދެ ގައުމުގެ ކަމާބެހޭ އިދާރާތަކަށް ވަކި އިޖުރާއަތުތަކެއް އެކުލަވާލުމުގެ ފުރުސަތު ލިބިގެންދާނެއެވެ.
މި އެމްއޯޔޫގެ ސަބަބުން މި ބަލިމަޑުކަމުން އަރައިގަތުމަށާއި ހަނގުރާމަކުރުމަށް ދެ ޤައުމުން ކުރަމުންދާ މަސައްކަތްތަކަށްވެސް އެއްބާރުލުން ދެއެވެ.
އަލް އޮވޭސް ވިދާޅުވީ މި އެމްއޯޔޫއަކީ ބައިނަލްއަގްވާމީ އެންމެ ރަނގަޅު އުސޫލުތަކާ އެއްގޮތްވާ ގޮތުގެ މަތިން ސިއްހީ ހިދުމަތް ކުރިއެރުވުމަށް ޑިޖިޓަލް ހެލްތު، އޭއައި، އިނޮވޭޝަން އަދި ޕާސަނަލައިޒްޑް މެޑިސިންގެ ދާއިރާއިން ފާހަގަކޮށްލެވޭ ލަނޑުދަނޑިތައް ބޭނުންކޮށްގެން ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާ ބަލިމަޑުކަމާ ކުރިމަތިލުމަށް ކުރަމުންދާ މަސައްކަތްތައް އެއްބައިވަންތަކޮށް، ތަޖުރިބާ އާއި މައުލޫމާތު ބަދަލުކުރުމަށް ދެ ގައުމުން ވެފައިވާ އެއްބާރުލުން އިތުރުކުރުމުގެ އެއްބަސްވުމުގެ ދަށުން ވެވުނު އެމްއޯޔޫއެއް ކަމަށެވެ.
ކޮމެންޓް (0)
ލޯޑް ކުރަމުން...