މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އުވާލުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ދެންނެވުމަށް ޕެޓިޝަނެއް ހެދުމުގެ މަސައްކަތް ފަށައިފިއެވެ.
މިހާރު ގިނަބަޔަކު ސޮއިކުރަމުންދާ އެ ޕެޓިޝަނަކީ މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) ނެރުނު ރިޕޯޓެއްގައި ކީރިތި ރަސޫލާ ޞައްލަﷲ ޢަލައިހި ވަސައްލަމް އާއި އިސްލާމްދީނަށް ފުރައްސާރަ ކޮށްފައިވާތީ އެޖަމިއްޔާ އުވާލުމަށް ޖެހޭކަމަށް ބުނެ ތައްޔާރުކުރަމުންދާ ޕެޓިޝަނެކެވެ.
ބޭންއެމްޑީއެންގެ ނަމުގައި ހަދާފައިވާ އޮންލައިން ޕެޓިޝަންގައި ވަނީ، އެމްޑީއެން ވަނީ ޤާނޫނު އަސާސީ އާއި ދީނީ އެއްބައިވަންތަކަން ހިމާޔަތްކުރުމާ ބެހޭ ޤާނޫނާއި، ޤާނޫނުލް އުޤޫބާތާއި، ޖަމިއްޔާތަކާ ބެހޭ ޤާނޫނާއި ޚިލާފުވެފައި ކަމަށެވެ. އެހެންކަމުން އެ ޖަމިއްޔާ އުވާނުލެވޭނަމަ އެއީ ޣައިރު ޤާނޫނީ އެހެން ޖަމާޢަތްތަކަށްވެސް ދެވޭ ފުރުސަތެއްކަމަށް ޕެޓިޝަންގައި ބުނެފައި ވެއެވެ.
“ޕްރިލިމިނަރީ އެސްސެމެންޓް އޮން ރެޑިކަލައިޒެޝަން އިން ދަ މޯލްޑިވްސް” ގެ ނަމުގައި އެމްޑީއެން އިން ނެރުނު ރިޕޯޓުގައި، އިސްލާމްދީނާ ދެކޮޅު ވާހަކަތަކެއް ލިޔެފައިވެއެވެ. އެގޮތުން، ރާއްޖޭގެ ތައުލީމީ ނިޒާމުގައި ކިޔަވައިދޭ ފޮތްތަކުގައި ހަރުކަށި ވިސްނުމަށް ބާރުއަޅާ ވާހަކަ ހުރި ކަމަށް ބުނެ، ކީރިތި ޤުރުއާނުގެ ނައްސުން އައިސްފައިވާ ބައެެއް ކަންތައްތަކާއި ހަދީސްތަކުގައިވާ ބައެއް ކަންކަން ރިޕޯޓުގައި ފާހަގަކޮށްފައި ވެއެވެ.
އެގޮތުން އެރިޕޯޓްގައި ދީނާ ޚިލާފަށް ފާހަގަކޮށްފައިވާ އެއްކަމެއްގައި ބުނެފައިވަނީ، މުޙަންމަދު ރަސޫލުﷲ ޞައްލަﷲ ޢަލައިހި ވަސައްލަމްގެ އިސްރާ އާއި މިއުރާޖްގެ ދަތުރުފުޅު ސައިންޓިފިކް ގޮތުން ގަބޫލު ނުކުރެވޭ ކަމަށެވެ. މި ވާހަކަތަކާ ގުޅިގެން ގިނަ ބަޔަކު އަންނަނީ ސޯޝަލް މީޑިޔާގައި ނުރުހުން ފާޅުކުރަމުންނެވެ.
މިރިޕޯޓްގެ މައްސަލަ ތަހުގީގު ކޮށްދިނުމަށް އެދި އިސްލާމިކް އެފެއާޒް މިނިސްޓްރީން ފުލުހުންނަށް ވަނީ ހުށަހަޅާފައެވެ. މައްސަލަ ހޫނުވުމުން އެމްޑީއެންއިން ވަނީ އެ ޖަމިއްޔާގެ ވެބްސައިޓުން ރިޕޯޓް ނަގައި، މައާފަށް އެދިފައެވެ.
މިރިޕޯޓާ ގުޅިގެން ގިނަ ބަޔަކު އަންނަނީ ސޯޝަލް މީޑިޔާގައި މިކަން ކުށްވެރިކޮށް މިމައްސަލަ ބެލުމަށް ގޮވާލަމުންނެވެ. އެގޮތުން ހޭޝްޓެގް ބޭންއެމްޑީއެން ބޭނުންކޮށްގެން ގިނަ ބަޔަކު އަންނަނީ އެމީހުންގެ ޝުޢޫރު ފާޅުކުރަމުންނެވެ. އޭގެތެރޭގައި އާންމު ރައްޔިތުންނާއި ދީނީ ޢިލްމުވެރިންނާއި ސިޔާސީ ބޭފުޅުންވެސް ހިމެނެއެވެ.
އެގޮތުން ކުރީގެ ރައީސް އަދި ދީނީ ޢިލްމުވެރިޔާ މައުމޫން އަބްދުލްޤައްޔޫމް އިސްލާމިކް މިނިސްޓްރީ އާއި ޕޮލިސް ޓެގްކުރައްވާ ކުރެއްވި ޓްވީޓެއްގައި ވިދާޅުވެފައިވަނީ، އިސްލާމް ދީނަށް ނުވަތަ ކީރިތި ރަސޫލާއަށް ފުރައްސާރަކުރުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށެވެ. އަދި ކޮންމެ ބަޔަކު ކުރިނަމަވެސް އެއީ ހުއްޓުވަންޖެހޭ ކަމެއްކަމަށް މައުމޫން ވިދާޅުވެފައި ވެއެވެ.
ޖަމްއިއްޔާތަކާބެހޭ ގާނޫނުގެ 19 ވަނަ މާއްދާގައި ބުނެފައިވަނީ އިސްލާމްދީނަށް އިހާނެތިކޮށް ހިތުމަށް ނުވަތަ ދިވެހި ރައްޔިތުންގެ ދީނީ އެއްބައިވަންތަކަން ނަގައިލުމަށް ނުވަތަ އެކަމަށް އުނިކަމެއް ގެނައުމަށް ދިވެހިރާއްޖޭގައި ޖަމްއިއްޔާތައް ރަޖިސްޓްރީކޮށް ހިންގުމަކީ މަނާކަމެއް ކަމަށެވެ.
ދީނީ ހަރުކަށި ފިކުރުތަކާ ދެކޮޅަށް ސަރުކާރުން ފިޔަވަޅު އަޅާނެކަން ހާމަކޮށްފައިވާއިރު ދީނަށް ފުރައްސާރަކުރާ މީހުންނަށް ފިޔަވަޅު ނާޅާކަމަށް ބުނެ ސޯޝަލް މީޑިޔާގައި އަންނަނީ ނުރުހުން ފާޅުކުރަމުންނެވެ.
އެގޮތުން ދާދިފަހުން ރައްޔިތުންގެ މަޖިލީހުން ފާސްކުރި ޓެރަރިޒަމްގެ ޤާނޫނަށް އިސްލާހުގެނައުމުގެ ބިލާއެކު އެއަޑުތަައް ގަދަވެފައިވާއިރު ދާދިފަހުން ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރ އައްޝެއިޚް އިމްރާން އަބްދުﷲ ވިދާޅުވެފައިވަނީ ދީނަށް ފުރައްސާރަކުރާ މީހުންނާ މެދުވެސް ފިޔަވަޅު އަޅުއްވާނެ ކަމަށެވެ.
ކޮމެންޓް (0)
ލޯޑް ކުރަމުން...