“ގޭސްޓެލް”ގައި ބަނގުއާވި ހިމެނޭކަމަށް ކަސްޓަމްސްއިން ވެސް ބުނެފި

ރާއްޖެ އެތެރެކޮށް ވިއްކަމުންދާ ލުއި ބުއިމެއްކަމަށްވާ “ގޭސްޓެލް”ގައި ބަނގުއާވި ހިމެނޭކަމަށް ކަސްޓަމްސްއިންވެސް ބުނެފިއެވެ.

ކަސްޓަމްސްއިން މިކަމާގުޅޭގޮތުން ނޫސްބަޔާނެއް ނެރެފައިވަނީ ކުރީ ހޯމް މިނިސްޓަރ ޢުމަރު ނަޞީރު މިވާހަކަ ޢާއްމުންގެ ސަމާލުކަމަށް ގެންނަވައިފައި ވަނިކޮށެވެ.

ކަސްޓަމްސްއިން ނެރެފައިވާ ނޫސްބަޔާނެއްގައި ބުނެފައިވަނީ ގޭސްޓެލް ނަމަކަށް ކިޔާ ބުއިމުގައި ބަނގުއާވި ހިމެނޭކަމަށް ކަސްޓަމްސްގެ އިންޓެލިޖެންސަށް ޝައްކު ކުރެވިގެން، މިއަހަރުގެ ޖޫންމަހުން ފެށިގެން އެމައްސަލަ ބަލަމުންދާކަމަށެވެ.

މިމައްސަލަ ބަލަމުން ދިޔަ އިރު މިމަހުގެ 17 ވަނަ ދުވަހު ރާއްޖެ އެތެރެ ކުރުމަށްޓަކައި ގެނެވުނު މިފަދަ ބުއިމުގެ ޝިޕްމެންޓެއް ކަސްޓަމްސް އިން ހިފަހައްޓާފައި ވާއިރު، މިބުއިންތަކުގައި ބަނގުއާވި އެކުލެވިގެންވާކަން ލެބޯޓްރީ ތަހުލީލުން ކަސްޓަމްސް އަށް ސާބިތު ކުރެވިފައިވާކަމަށް ކަސްޓަމްސްއިން ބުނެއެވެ.

މި ބުއިން ރާއްޖެ އެތެރެކުރާ ފަރާތްތަކާއި ވާހަކަދައްކައިގެން މިތަކެތި ބާޒާރުން ނެގުމުގެ މަސައްކަތް މިހާރު ކުރަމުންދާކަމަށްވެސް ކަސްޓަމްސްއިން ބުނެއެވެ.

މިމައްސަލާއާ ގުޅިގެން އުފެދިދާނޭ އެންމެހާ ކަންކަން ޙައްލު ކުރުމަށްޓަކައި ދައުލަތުގެ ކަމާބެހޭ އެންމެހާ އިދާރާތަކާއި ގުޅިގެން މަސައްކަތް ކުރަމުންދާކަމަށްވެސް ކަސްޓަމްސްގެ ނޫސްބަޔާނުގައި ބުނެފައިވެއެވެ.