ޣައްޒާގައި ހިނގަމުންދާ ހަނގުރާމައާއި، އިންސާނީ އެހީއަށް ހުރަސްއެޅިފައިވުމުގެ ސަބަބުން، ދުވަސްނުފުރާ ވިހާ ކުދިން ބޭތިއްބުމަށް ބޭނުންވާ އިންކިއުބޭޓަރުތައް ނުލިބި، ޣައްޒާގެ ހޮސްޕިޓަލްތަކަށް ބޮޑެތި ގޮންޖެހުންތަކަކާ ވަނީ ކުރިމަތިލާން ޖެހިފައެވެ. ނާޞިރު ހޮސްޕިޓަލުގެ ތުއްތު ކުދިންގެ ބަލިތަކާބެހޭ ޑިޕާޓްމަންޓުގެ ވެރިޔާ ހާތިމް ޡާހިރު ފާހަގަކުރެއްވި ގޮތުގައި، ޚާން ޔޫނިސްގައި ޖާގައާއި ވަސީލަތްތައް މަދުވުމުގެ ސަބަބުން އެއް އިންކިއުބޭޓަރެއްގައި ދެ ކުދިން ބައިތިއްބަން ވަނީ މަޖުބޫރުވެފައެވެ. ގިނަ ކުދިންގެ ބަރުދަން ލުއިވުމުގެ ސަބަބުން އޮކްސިޖަން ދޭންޖެހުނު ނަމަވެސް، ވަސީލަތްތައް މަދުވުމުން އެކަމަށް ވަނީ ބޮޑެތި ހުރަސްތަކެއް ކުރިމަތިވެފައެވެ. އިސްރާއީލުން ފަލަސްތީނަށް ދެމުންދާ ހަމަލާތަކުގެ ސަބަބުން ޣައްޒާގެ ޞިއްޙީ ނިޒާމަށް ބޮޑެތި ގެއްލުންތަކެއް ލިބި، ގިނަ ހޮސްޕިޓަލްތަކެއްގެ ޚިދުމަތް މެދުކެނޑި، ބޭސްފަރުވާއަށް ބޭނުންވާ ތަކެތި އެތެރެކުރުމަށް ވަނީ ދަތިވެފައެވެ.
އދ. ގެ ރިޕޯޓްތައް ބުނާގޮތުން ޣައްޒާގައި ކޮންމެ ތިން މާބަނޑު މީހަކުން އެކަކީ ހައި-ރިސްކް މީހެކެވެ. އަދި އުފަންވާ ކުދިންގެ ތެރެއިން ގާތްގަނޑަކަށް %70 ކުދިންނަކީ ދުވަސްނުފުރާ ވިހާ ނުވަތަ ބަރުދަން ލުއި ކުދިންނެވެ. މީގެ ސަބަބުން އެއް އިންކިއުބޭޓަރެއްގައި ގިނަ ކުދިން ބޭތިއްބުމުން ޖެހޭ ބަލިތަކުގައި ކުދިން މަރުވުމުގެ ފުރުޞަތު ބޮޑުވެއެވެ. 2023 ވަނަ އަހަރުގެ އޮކްޓޫބަރު މަހުން ފެށިގެން ކުރިއަށްދާ މި ހަނގުރާމައިގައި ގިނަ ބަޔަކު ހާލުގައި ޖެހި، ޒަރޫރީ ވަސީލަތްތައް ވަނީ ސުންނާފަތިވެފައެވެ. މީގެ އިތުރުން، މާބަނޑު މީހުންގެ ޞިއްޙީ ހާލަތު ދަށްވެ، ބަނޑަށް ދަރިފުޅު މަރުވުމާއި، އުފަންވާއިރު ނުކުޅެދުންތެރިކަން ހުންނަ ކުދިން އިތުރުވަމުންދާކަން ވަނީ ފާހަގަކުރެވިފައެވެ.
ޣައްޒާގެ ތުއްތު ކުދިންގެ ފަރުވާގެ ނިޒާމު ހަރުދަނާކުރުމަށް ޔުނިސެފުން ދަނީ މަސައްކަތް ކުރަމުންނެވެ. އެގޮތުން މިހާތަނަށް އެކި ހޮސްޕިޓަލްތަކަށް 93 އިންކިއުބޭޓަރު ވަނީ ފޯރުކޮށްދީފައެވެ. ނަމަވެސް، ޚިދުމަތަށް ބޭނުންވާ މިންވަރު އިންތިހާއަށް އިތުރުވުމާއި، ކުރިމަތިވެފައިވާ ބޮޑެތި ގޮންޖެހުންތަކުގެ ސަބަބުން، އެ ސަރަހައްދުގައި ތިބި ނާޒުކު ހާލަތުގެ ތުއްތު ކުދިންގެ ފުރާނަ ސަލާމަތްކުރުމަށް އަދިވެސް ބޮޑެތި ދަތިތަކެއް އެބަހުއްޓެވެ.
ކޮމެންޓް (0)
ލޯޑް ކުރަމުން...