މާލޭގެ ގޯޅިތަކާއި މަގުތައް ގުޅޭ ކަންކަންމަތީގައި އުޅަނދުތައް ޕާކުކުރުމުގެ ސަބަބުން ދަތުރުފަތުރަށް ކުރިމަތިވާ ހުރަސްތައް ނައްތާލުމަށް، އެފަދަ ތަންތަނުގައި ޕާކުކުރުން މަނާކަން އަންގައިދޭ ރީނދޫ ނިޝާންތައް ކުރަހަން މާލެ ސިޓީ ކައުންސިލުން ފަށައިފިއެވެ.
މި އައު ފިޔަވަޅުގެ ދަށުން އެންމެ ފުރަތަމަ އަމަލީ މަސައްކަތް ކުރިއަށް ގެންގޮސްފައިވަނީ މ. ފުލޫނިޔާ މަގާ ގުޅިފައިވާ އެކި ގޯޅިތަކުގެ ކަންމަތިތަކުގައެވެ. އެ ސަރަޙައްދުތަކުގައި ވެހިކަލް ނުބެހެއްޓޭނެކަން ކަށަވަރުކުރުމަށްޓަކައި މަގުގެ އަރިމަތީގައި ރީނދޫ ކުލައިގެ ދެ ރޮނގު ދަމައި ވަނީ ވަކިކޮށްފައެވެ.
މާލެ ސިޓީގެ މޭޔަރު އާދަމް އާޒިމް ވިދާޅުވީ، މަގުތައް ގުޅޭ ކަންމަތީގައި ވެހިކަލްތައް ބަހައްޓައިގެން މަގު ބަންދުވާ ގޮތަށް ޕާކުކުރުމަކީ މުޅި މާލޭގެ ޓްރެފިކަށް އޭގެ ނޭދެވޭ އަސަރު ފޯރައި ތޮއްޖެހުން އިތުރުވާ މައިގަނޑު އެއް ސަބަބު ކަމަށެވެ. އަދި އަލަށް ފާހަގަކުރާ ރީނދޫ ރޮނގުތައް ހުންނަ ސަރަޙައްދުތަކަކީ އެއްވެސް ހާލަތެއްގައި ޕާކުކުރުމުގެ ހުއްދަ އޮންނާނެ ތަންތަން ނޫން ކަމަށްވެސް އޭނާ ހަނދާންކޮށްދެއްވިއެވެ.
ކައުންސިލުން ހާމަކުރި ގޮތުގައި މި މަޝްރޫޢުގެ މައިގަނޑު އަމާޒަކީ ދުއްވާ އެއްޗެއްސަށާއި ހިނގާބިނގާވާ މީހުންނަށް މަގުތަކަކީ އަމާން އަދި ފަސޭހައިން ދަތުރުކުރެވޭނެ ތަންތަނަށް ހެދުމެވެ. މީގެ އިތުރުން މާލޭގެ އެކި ދިމާލުގައި ހުރި މިފަދަ ކާރުބާރު ބޮޑު ކަންމަތިތައް ފާހަގަކޮށް، ކުރިއަށް އޮތް ދުވަސްތަކުގައިވެސް މި މަސައްކަތް ފުޅާ ދާއިރާއެއްގައި ކުރިއަށް ގެންދިއުމަށް ވަނީ ހަމަޖެހިފައެވެ.
ރާއްޖޭގެ އެއްގަމު ދަތުރުފަތުރުގެ ޤަވާއިދުތައް ބުނާގޮތުން މަގުތަކުގެ ކަންމަތިތަކުން ފެށިގެން ވަކި ރާސްތާއެއްގެ ތެރޭގައި ޕާކުކުރުމަކީ އަބަދުވެސް ޤާނޫނީ ގޮތުން މަނާ ކަމެކެވެ. ނަމަވެސް ޕާކިންގ ޖާގައިގެ ދަތިކަމާ ހުރެ ކަންމަތިތަކުގައި އުޅަނދު ގިނަވުމުގެ ސަބަބުން، އަލިފާން ނިއްވާ ލޮރީތަކާއި އެމްބިއުލާންސް ފަދަ ޒަރޫރީ ޚިދުމަތްދޭ ބޮޑެތި އުޅަނދުތަކަށް އަނބުރާލަން އުނދަގޫވެ، ނުރައްކާތެރި ހާދިސާތައް ކުރިމަތިވުން ވަނީ އާންމު ކަމަކަށް ވެފައެވެ.
ކޮމެންޓް (0)
ލޯޑް ކުރަމުން...