އެމެރިކާއާއި އީރާނާ ދެމެދު ހިނގަމުންދާ ހަނގުރާމަ ދާއިމީކޮށް ހުއްޓާލުމަށް ސުލްޙައިގެ އެއްވެސް މަގެއް ނުފެނި، ދެ ޤައުމުގެ މަޝްރަޙު ނުރައްކާތެރި ފައްތަރަކަށް ވެއްޓިއްޖެއެވެ. މިދިޔަ ޖޫން މަހު އެމެރިކާގެ ރައީސް ޑޮނަލްޑް ޓްރަމްޕް ފަރަންސޭސިވިލާތުގެ ވާސައިލްސްގައި ސޮއިކުރެއްވި ވަގުތީ އެއްބަސްވުމުގައި ކަނޑައެޅި 60 ދުވަހުގެ މުއްދަތު ހަމަވިއިރު، ދެ ފަރާތުގެ ދެބަސްވުންތައް ވަނީ ކުރިއަށްވުރެވެސް ބޮޑަށް ފުޅާވެފައެވެ. ނިއުކްލިއަރ މައްސަލައަށް ހައްލެއް ހޯދުމަށް އަމާޒު ހިފި ނަމަވެސް، އެފަދަ އެއްވެސް މަޝްވަރާއެއް ފެށިފައެއް ނުވެއެވެ.
ދެ ޤައުމުގެ މެދުގައި އުފެދިފައިވާ މައިގަނޑު މައްސަލައަކީ ހޮރުމުޒް ކަނޑުއޮޅި އަލުން ހުޅުވާލުމާއި އެމެރިކާއިން އީރާނުގެ ބަނދަރުތަކަށް އަޅާފައިވާ ބަންދުކުރުމުގެ ފިޔަވަޅުތަކެވެ. ޖޫން މަހުގެ އެއްބަސްވުމުގައި ކަނޑުއޮޅިން ދަތުރުފަތުރު ކުރުމުގައި އީރާނަށް ދައުރެއް ދީފައި އޮތުމުން، އެ ފުރުސަތުގެ ބޭނުން ހިފައި އީރާނުން ދަނީ އެ ކަނޑުއޮޅީގެ ކޮންޓްރޯލް ހޯދުމަށް މަސައްކަތް ކުރަމުންނެވެ. އެގޮތުން އެއްބަސްވުން ހެދިތާ ހަފްތާއެއް ފަހުން، އެމެރިކާ އަސްކަރިއްޔާގެ ބެލުމުގެ ދަށުން އޮމާން އައްސޭރިފަށުން ދަތުރުކުރި އުޅަނދުތަކަށް އީރާނުން ހަމަލާދިނުމާ ގުޅިގެން ވަގުތީ އެއްބަސްވުން ވަނީ ރޫޅިފައެވެ.
އީރާނުގެ ހަމަލާތަކާ ގުޅިގެން އެމެރިކާއިން އީރާނަށް ހަމަލާދިނުމުން، އީރާނުން ވަނީ އެމެރިކާގެ އަސްކަރީ މަރުކަޒުތައް ހުންނަ އުރުދުން، ކުވައިތު އަދި ބަޙްރައިން ފަދަ ޢަރަބި ޤައުމުތަކަށް ރައްދު ހަމަލާތަކެއް ދީފައެވެ. މިއާއެކު އެމެރިކާއިން ވަނީ އީރާނަށް ތެޔޮ ވިއްކުމަށް ދިން ހުއްދަތައް ބާޠިލުކޮށް، އީރާނުގެ ބަނދަރުތައް އަލުން ބަންދުކޮށްފައެވެ. ފަހުން ހަމަލާތައް މަޑުޖެހިފައިވީ ނަމަވެސް، ލުބުނާނުގެ ސިޔާދަތު ރައްކާތެރިކުރުމަށް އެއްބަސްވުމުގައި ވީ ވައުދާ ޚިލާފަށް، އިސްރާއީލު ސިފައިން އަދިވެސް ދަނީ ލުބުނާނުގެ ދެކުނުގެ ބޮޑު ސަރަހައްދެއް ހިސާރުކޮށްގެން ތިބެމުންނެވެ.
ހޮރުމުޒް ކަނޑުއޮޅި ހުޅުވާލުމަށް އީރާނުން މިހާރު ޝަރުތުކުރަނީ އެމެރިކާގެ އަސްކަރިއްޔާ އެ ސަރަހައްދުން ފޭބުމަށާއި، މިދިޔަ ފެބުރުވަރީ 28 ގައި އެމެރިކާއާއި އިސްރާއީލު ގުޅިގެން ފެށި ހަނގުރާމައިގެ ބަދަލު ދިނުމަށެވެ. މީގެއިތުރުން އޮމާނާއެކު ވާހަކަދައްކައިގެން އެ ކަނޑުއޮޅިން ދަތުރުކުރާ އުޅަނދުފަހަރުގެ އަތުން ފީ ނެގުމަށް އީރާނުން ރާވަމުންދާއިރު، އެމެރިކާގެ ރައީސް ޓްރަމްޕް ވަނީ މި ޝަރުތުތަކަށް އިންކާރު ކުރައްވައި، ހަނގުރާމައިގެ ބަދަލު ދޭންޖެހޭނީ އީރާނުން ކަމަށް ވިދާޅުވެފައެވެ.
އީރާނުގެ އިޤްތިޞާދަށް ހަނގުރާމައާއި ދަތިކުރުމުގެ ފިޔަވަޅުތަކުގެ ސަބަބުން ބޮޑެތި ގެއްލުންތަކެއް ލިބި ތަކެތީގެ އަގު އިންތިހާއަށް އުފުލިފައިވާއިރު، މިދިޔަ ޖެނުއަރީ މަހު ހިނގި ފަދަ ސަރުކާރާ ދެކޮޅު މުޒާހަރާތަކެއް އަލުން ފެށިދާނެ ކަމުގެ ބިރު ވަނީ ހީވެފައެވެ. އަނެއްކޮޅުން އެމެރިކާއަށްވެސް ހަނގުރާމަ އިތުރަށް ފުޅާކުރުމަކީ މިސައިލް އައްޑަނަތައް މަދުވުމާއި، ކުރިއަށް އޮތް ކޮންގްރެސް އިންތިޚާބާ ދިމާކޮށް ތެލުގެ އަގު އުފުލި އިޤްތިޞާދަށް ނޭދެވޭ އަސަރުކުރާނެ ކަމެކެވެ.
ޔަމަނުގެ ހޫޘީން ރަތްކަނޑުގައި ސަޢޫދީގެ ތެޔޮ ޓޭންކަރުތަކަށް ހަމަލާދެމުންދާތީ ބައިނަލްއަޤްވާމީ ވިޔަފާރިއަށް ބޮޑެތި ހުރަސްތަކެއް އެޅިފައިވާއިރު، ހޮރުމުޒް ކަނޑުއޮޅިން ކުރާ ދަތުރުފަތުރު ވަނީ ވަރަށް ބޮޑަށް ދަށަށް ގޮސްފައެވެ. ޖޫން މަހުގެ އެއްބަސްވުން އެކުލަވާލުމުގައި އިސް ދައުރެއް އަދާކުރި ޕާކިސްތާނުން ދެ ފަރާތް އަލުން މަޝްވަރާގެ މޭޒަށް ގެނައުމަށް މަސައްކަތް ކުރަމުންދިޔަ ނަމަވެސް، ދެ ޤައުމުންވެސް ދޫދޭން ބޭނުންނުވުމުގެ ސަބަބުން ސުލްޙައިގެ އުއްމީދުތައް ވަނީ ފަނޑުވެފައެވެ.
ކޮމެންޓް (0)
ލޯޑް ކުރަމުން...