ލޯކަލް ގަވަރމަންޓް އޮތޯރިޓީ (އެލްޖީއޭ) ގެ ބޯޑަށް ދެ ބޭފުޅަކު އައްޔަންކުރަން ފެންނަކަމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީއިން އިއްތިފާގުން ފާސްކޮށް، އެ ބޭފުޅުންނަށް މަޖިލީހުގެ ރުހުން ދިނުމުގެ މަގު ތަނަވަސްކޮށްދީފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ފޮނުއްވި ނަންފުޅުތަކުގެ ތެރެއިން ކޮމިޓީން ރުހުން ދީފައިވަނީ މިންތީގެ ހަމަހަމަކަމުގެ ދާއިރާއިން ގދ. ގައްދޫ، ތިބުރޯޒުގެ އައިޝަތު އާރިފާގެ އިތުރުން، ގަވަރނަންސް ނުވަތަ ޕަބްލިކް އެޑްމިނިސްޓްރޭޝަންގެ ދާއިރާއިން ށ. ކަނޑިތީމު، ރަތްވިލާގެ މުޙައްމަދު އާރިފަށެވެ.
މި ދެ ބޭފުޅުންނާ އިންޓަރވިއު ކުރުމަށްފަހު، އެވްރެޖްކޮށް %75 އަށްވުރެ މަތިން މާކްސް ލިބިވަޑައިގެންފައިވާތީ ރުހުން ދޭން ފެންނަކަމަށް ހުށަހެޅުއްވީ ވިލުފުށީ ދާއިރާގެ މެމްބަރު ޙަސަން ވަޙީދެވެ. އަދި އެ ހުށަހެޅުމަށް ނިލަންދޫ ދާއިރާގެ މެމްބަރު ފާތިމަތު ސައުދާ ތާއީދުކުރެއްވިއިރު، ކޮމިޓީން އެގޮތަށް ނިންމެވީ ހާޒިރުވި މެންބަރުންގެ އިއްތިފާގުންނެވެ.
ޖުމްލަ 9 މެންބަރުންގެ މައްޗަށް އެކުލެވޭ އެލްޖީއޭގެ ބޯޑަށް މެންބަރުން އައްޔަންކުރުމަށްޓަކައި ރައީސުލްޖުމްހޫރިއްޔާ ނަންތައް ފޮނުއްވާފައިވަނީ މިމަހުގެ 10 ވަނަ ދުވަހުއެވެ.
ކޮމެންޓް (0)
ލޯޑް ކުރަމުން...