މާފަރު އެއާޕޯޓުގައި މޫސުން ބަލާ އޮބްޒަވޭޓަރީއެއް ގާއިމުކުރުމަށް ސޮއިކޮށްފި
ނޫނު އަތޮޅު މާފަރު އިންޓަނޭޝަނަލް އެއާޕޯޓުގެ ވައިގެ ދަތުރުފަތުރުގެ ރައްކާތެރިކަން އިތުރު ހަރުފަތަކަށް ގެންދިއުމަށްޓަކައި، އެ އެއާޕޯޓުގައި މޫސުން ބަލާ ހާއްސަ އޮބްޒަވޭޓަރީއެއް ގާއިމުކުރުމަށް އައިލެންޑް އޭވިއޭޝަން ސާވިސަސް (އައިއޭއެސް) އާއި މޫސުމާ ބެހޭ ގައުމީ އިދާރާ (މެޓް) އާ ދެމެދު މިއަދު ވަނީ މުހިންމު އެއްބަސްވުމެއްގައި ސޮއިކޮށްފައެވެ.
އައިއޭއެސްގެ މައި އޮފީހުގައި ބޭއްވި މި ރަސްމިއްޔާތުގައި، އެ ކުންފުނީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އިބްރާހިމް އިޔާސެވެ. މެޓް އޮފީހުގެ ފަރާތުން އެއްބަސްވުމުގައި ސޮއިކުރެއްވީ ޑައިރެކްޓަރު ޖެނެރަލް އަބްދުލް ވާހިދެވެ.
މި އާ އޮބްޒަވޭޓަރީ ގާއިމުކުރުމުން، މާފަރު އެއާޕޯޓަށް ޖައްސާ އަދި ފުރާ މަތިންދާބޯޓުތަކަށް ބޭނުންވާ މޫސުމީ އެންމެ ފަހުގެ މައުލޫމާތާއި، މޫސުމަށް އަންނަ ކުއްލި ބަދަލުތަކުގެ އިންޒާރުތައް ވަގުތުން ވަގުތަށް ފޯރުކޮށްދިނުމުގެ ގާބިލުކަން އިތުރުވެގެންދާނެއެވެ.
އައިއޭއެސްގެ އެމްޑީ އިބްރާހިމް އިޔާސް ވިދާޅުވީ، މިއީ އެއާޕޯޓުގެ އޭވިއޭޝަން ސޭފްޓީ ސްޓޭންޑަޑްތައް ހަރުދަނާކުރުމަށް އެޅުނު މުހިންމު ފިޔަވަޅެއް ކަމަށާއި، މީގެ ސަބަބުން ޕައިލެޓުންނަށާއި އެއާ ޓްރެފިކް ކޮންޓްރޯލަރުންނަށް މަސައްކަތް ކުރަން ވަރަށް ބޮޑަށް ފަސޭހަވެގެންދާނެ ކަމަށެވެ.
މެޓް އޮފީހުން ފާހަގަކުރި ގޮތުގައި، މި އޮބްޒަވޭޓަރީގެ ސަބަބުން ރާއްޖޭގެ އުތުރު ސަރަހައްދުގެ ވައިގެ ދަތުރުފަތުރުގެ ރައްކާތެރިކަން އިތުރުވެ، އެއާޕޯޓުތަކުގެ އޮޕަރޭޝަންތައް މިހާރަށްވުރެ ހަރުދަނާވެގެންދާނެއެވެ.
މާފަރުގައި މި ގާއިމުކުރާ މަރުކަޒަކީ ރާއްޖޭގައި ގާއިމުކުރެވޭ މޫސުން ބަލާ ހަވަނަ އޮބްޒަވޭޓަރީއެވެ. މިފަދަ މަރުކަޒެއް އެ ސަރަހައްދުގައި ގާއިމުކުރުމަށް ނިންމާފައިވާކަން މެޓް އޮފީހުން މީގެ އަހަރެއްހާ ދުވަސް ކުރިން އިއުލާންކޮށްފައިވާއިރު، މިއީ ރާއްޖޭގެ އުތުރުގެ ވައިގެ ދަތުރުފަތުރުގެ ނިޒާމަށް ލިބުނު ވަރަށް ބޮޑު ކުރިއެރުމެކެވެ.
