ސަރުކާރު މުވައްޒަފުންގެ ރޯދަ އިނާޔަތު މިމަހުގެ 12 ވަނަ ދުވަހު ދޫކުރުމަށް ނިންމައިފި

ސަރުކާރުގެ އޮފީސްތަކުގައި ވަޒީފާ އަދާކުރާ މުވައްޒަފުންނަށް މި އަހަރުގެ ރޯދަ މަހުގެ އިނާޔަތުގެ ގޮތުގައި 3,000 ރުފިޔާ މިމަހުގެ 12 ވަނަ ދުވަހު ދޫކުރުމަށް ފިނޭންސް މިނިސްޓްރީން ނިންމައިފިއެވެ. މިކަން ހާމަކޮށްފައިވަނީ ދައުލަތުގެ އޮފީސްތަކަށް ފޮނުވާފައިވާ ސާކިއުލާގައެވެ.

ވަޒީފާއާ ބެހޭ ގާނޫނުގެ ދަށުން، ވަޒީފާ އަދާކުރާ ކޮންމެ މުސްލިމް މުވައްޒަފަކަށް ރޯދަ މަހުގެ އިނާޔަތުގެ ގޮތުގައި 3,000 ރުފިޔާ ދޭން ޖެހެއެވެ. މިކަމަށް ގާނޫނު ބުނާ އުސޫލުން އަމަލުކުރުމަށް ފިނޭންސް މިނިސްޓްރީން ވަނީ އަންގާފައެވެ.

ފިނޭންސް މިނިސްޓްރީގެ ސާކިއުލާގައި ބުނެފައިވާ ގޮތުގައި، ދައުލަތުގެ މުވައްޒަފުންގެ ތެރެއިން އެއް ވަޒީފާއަށް ވުރެ ގިނަ ވަޒީފާ އަދާކުރާ މުވައްޒަފުންނަށް ރޯދަ މަހުގެ އިނާޔަތް ދޭނީ، އެ މުވައްޒަފެއްގެ އަސާސީ ވަޒީފާ އޮންނަ އޮފީހުންނެވެ. މިގޮތަށް އަމަލުކުރުމުގެ ބޭނުމަކީ އިނާޔަތް ތަކުރާރުވުން ހުއްޓުވުމެވެ.

މީގެ އިތުރުން، ރޯދަމަސް ފެށޭއިރު ޕޭ ލީވް ނުވަތަ ނޯޕޭ ލީވްގައި ތިބޭ މުވައްޒަފުންނަށް ރޯދަ އިނާޔަތް ނުދޭންވެސް ސާކިއުލާގައި ވަނީ އަންގާފައެވެ. ނަމަވެސް އެފަދަ މުވައްޒަފުން ރޯދަ މަހުގެ ތެރޭގައި ވަޒީފާއަށް ނިކުމެއްޖެނަމަ، އެ ނިކުންނަ ދުވަހުން ފެށިގެން ރޯދަ މަހުގެ އިނާޔަތް ހިސާބުކޮށް، ބާކީވާ މުއްދަތަށް އިނާޔަތް ދޭން ޖެހޭނެ ކަމަށް ވަނީ ބުނެފައެވެ.

އިނާޔަތު ފައިސާ ދޫކުރުމުގެ އިންތިޒާމުތައް ހަމަޖެއްސުމަށްޓަކައި، މިމަހުގެ 10 ވަނަ ދުވަހުގެ ކުރިން ޕަބްލިކް އެކައުންޓިން ސިސްޓަމް (ޕީއޭއެސް) އަށް މި މައުލޫމާތު އަޕްލޯޑްކޮށް ޕޯސްޓް ކުރުމަށްވެސް ސަރުކާރު އޮފީސްތަކަށް ފިނޭންސްގެ ސާކިއުލާގައި ވަނީ އަންގާފައެވެ. މިކަމަކީ އިންތިޒާމުތައް ހަމަޖެއްސުމަށް ކޮންމެހެން ކުރަންޖެހޭ ކަމެކެވެ.