ޓްރަމްޕާއި ސިސީ ޣައްޒާ އާއި ބެހޭގޮތުން މަޝްވަރާކޮށްފި
އެމެރިކާގެ ރައީސް ޑޮނަލްޑް ޓްރަމްޕާއި މިޞްރުގެ ރައީސް އަބްދުލް ފައްތާޙް އައް-ސިސީ ޣައްޒާގެ މައްސަލައާއި ބެހޭގޮތުން ފޯނުން ވާހަކަ ދައްކައި މަޝްވަރާ ކޮށްފިއެވެ.
މި ފޯނު ކޯލަކީ ޓްރަމްޕް ހުށަހެޅި، ޣައްޒާގައި އުޅޭ ފަލަސްތީނުގެ ރައްޔިތުން މިޞްރަށް ބަދަލުކުރުމުގެ ހުށަހެޅުމާ ގުޅިގެން އުފެދިފައިވާ ޖަދަލުތަކުގެ ތެރޭގައި ކުރެވުނު ފުރަތަމަ މުޢާމަލާތެވެ.
މި ފޯނު ކޯލުގައި ދެ ޤައުމުގެ ދެމެދުގައި އޮތް ޑިޕްލޮމެޓިކް ގުޅުން ހަރުދަނާކުރުމާއި، އިޤްތިޞާދީ އެއްބާރުލުން އިތުރުކުރުމާއި، މެދުއިރުމަތީގެ ސަރަޙައްދުގެ ހަމަޖެހުން ކުރިއެރުވުމާ ބެހޭގޮތުން މަޝްވަރާކުރެވުނެވެ. މީގެ އިތުރުން ރައީސް ސިސީ ވަނީ ރައީސް ޓްރަމްޕަށް މިޞްރަށް ޒިޔާރަތްކުރުމުގެ ދަޢުވަތެއް ދެއްވާފައެވެ.
މި މަޝްވަރާތައް ކުރިއަށް ގެންދެވުނީ މިޞްރުގެ އެތެރެއާއި ސަރަޙައްދީ ފެންވަރުގައި ޓްރަމްޕްގެ ހުށަހެޅުމާ ދެކޮޅަށް ފާޑުކިޔުންތައް އިތުރުވަމުންދާ ދަނޑިވަޅެއްގައެވެ.
މިޞްރުގެ ރައްޔިތުންނާއި ހަރަކާތްތެރިން ވަނީ ރަފާ ބޯޑަރު ކްރޮސިންގ ގައި މުޒާހަރާތައް ކޮށް، މި ހުށަހެޅުމަކީ ފަލަސްތީނުގެ ރައްޔިތުންގެ ޙައްޤުތަކަށް އަރައިގަތުމެއް ކަމަށާއި، ސަރަޙައްދުގެ ހަމަޖެހުމަށް ނުރައްކަލެއް ކަމުގައި ބުނެ ކުށްވެރިކޮށްފައެވެ.
މިޞްރާއި އުރުދުން ވަނީ މި ހުށަހެޅުމަށް ހަރުކަށި ގޮތެއްގައި ދެކޮޅު ހަދާ، މިނިވަން ފަލަސްތީނު ދައުލަތެއް ޤާއިމުކުރުމަކީ މި ހަނގުރާމައަށް އޮތް ހަމައެކަނި ޙައްލު ކަމުގައި ބުނެފައެވެ.
ފޯނު ކޯލަށްފަހު ވައިޓް ހައުސްއިން ނެރުނު ބަޔާނެއްގައި ވަނީ ދެ ލީޑަރުން ދެ ޤައުމުގެ ދެމެދުގައިވާ ގުޅުން ވަރުގަދަކުރުމަށާއި ސަރަޙައްދީ ގޮންޖެހުންތަކަށް ކުރިމަތިލުމަށް އެއްބަސްވެފައިވާ ކަމަށް ބަޔާންކޮށްފައެވެ.
ނަމަވެސް، ގާޒާގެ ރައްޔިތުން ބަދަލުކުރުމުގެ ހުށަހެޅުމާ ގުޅިގެން ޢަރަބި ދުނިޔޭގައި ރުޅިގަދަވެ، ފާޑުކިޔާ ފަރާތްތަކުން ބުނަމުންދަނީ އެމެރިކާއިން މަސައްކަތް ކުރަމުންދަނީ ފަލަސްތީނުގެ ދައުލަތެއް އުފެއްދުމުގެ އުންމީދުތައް ނައްތާލުމަށް ކަމަށެވެ.
