ޖުވާ ކުޅުން ޖިނާއީ ކުށަކަށް ހަދަން ގާނޫނުލްއުގޫބާތަށް އިސްލާހު ހުށަހަޅައިފި
ޖުވާ ކުޅުމާއި ޖުވާ ކުޅޭ ތަނެއް ހިންގުމަކީ ޖިނާއީ ކުށެއްގެ ގޮތުގައި ކަނޑައަޅައި، އެ ކުށަށް އެއް އަހަރާއި ހަތަރު އަހަރާ ދެމެދުގެ ޖަލު އަދަބެއް ދެވޭ ގޮތަށް ގާނޫނުލްއުގޫބާތަށް އިސްލާހު ހުށަހަޅައިފިއެވެ.
ސަރުކާރުގެ ފަރާތުން ހިތަދޫ މެދު ދާއިރާގެ މެންބަރު އަހުމަދު އަޒާން ހުށަހެޅުއްވި މި ބިލުގެ ފުރަތަމަ ކިޔުން އިއްވުމަށް ހަމަޖެހިފައިވަނީ މާދަމާ ބާއްވާ މަޖިލީހުގެ ދައުރުން ބޭރު ޖަލްސާގައެވެ.
މި އިސްލާހުގައިވާ ގޮތުން ޖުވާ ކުޅުން ނުވަތަ ޖުވާ ކުޅޭ ތަނެއް ހިންގުމަކީ ޖިނާއަތުގެ ހަތަރުވަނަ ދަރަޖައިގެ ކުށެކެވެ. މި ކުށުގެ އަސާސީ އަދަބެއްގެ ގޮތުގައި ކަނޑައަޅާފައިވަނީ 1 އަހަރާއި 7 މަހާއި 6 ދުވަހުގެ ޖަލު ހުކުމެކެވެ. ނަމަވެސް ކުށުގެ ބާވަތަށް ބަލައި އަދަބުގެ މުއްދަތު ހަތަރު އަހަރާ ހަމައަށް އިތުރުކުރުމުގެ ފުރުސަތު ފަނޑިޔާރުންނަށް ލިބިގެންވެއެވެ.
މި ބިލު ހުށަހެޅުމުގެ މައިގަނޑު މަގުސަދަކީ ރާއްޖޭގައި ޖުވާ ކުޅުން ހުއްޓުވުމަށް ގާނޫނީ ގޮތުން ހަރުދަނާ ފިޔަވަޅުތަކެއް އެޅުމެވެ. މާދަމާގެ ޖަލްސާގައި މި ބިލުގެ ފުރަތަމަ ކިޔުން އިއްވުމަށްފަހު، ބިލުގެ ބަހުސް މަރުހަލާ ކުރިއަށްދާނެއެވެ. މިއީ އިޖުތިމާއީ މިންގަނޑުތަކާއި އިސްލާމީ އުސޫލުތައް ހިމާޔަތްކުރުމަށް ސަރުކާރުން އަޅާ މުހިންމު ފިޔަވަޅެއްކަމަށް ސަރުކާރުން ބުނެއެވެ.
