އިތުރު 137 މީހަކު ކޮވިޑަށް ޕޮޒިޓިވް ވެއްޖެ

އިތުރު 137 މީހަކު ރާއްޖެއިން ކޮވިޑް-19 އަށް ޕޮޒިޓިވް ވެއްޖެއެވެ.

އެޗްޕީއޭ އިން ވިދާޅުވީ މިއަދު ރާއްޖެ އިން ކޮވިޑް-19 އަށް ފައްސިވި މީހުންގެ ތެރޭގައި 96 ދިވެހިން ހިމެނޭ ކަމަށެވެ. ދެން މިއަދު ފައްސިވީ ބަންގްލަދޭޝްގެ 25 މީހަކާއި އިންޑިއާގެ ނުވަ މީހަކާއި ސްރީލަންކާގެ ދެމީހަކާއި ނޭޕާލްގެ ދެމީހަކާއި ފިލިޕީންސް މީހަކާއި ރަޝިއާ މީހަކާއި ގާނާ މީހެކެވެ.

ރާއްޖެ އިން ކޮވިޑް-19 އަށް ފައްސިވި މީހުންގެ ޖުމްލަ އަދަދު މިހާރު ވަނީ 7804 އަށް އަރާފައެވެ.

ރާއްޖެ އިން މިއަދު ކޮވިޑް-19 އަށް ފައްސިވި މީހުންގެ އަދަދު ފާއިތުވި ދެދުވަހު ފައްސިވި މީހުންގެ އަދަދަށް ވުރެ ގިނައެވެ. އިއްޔެ ރާއްޖެ އިން ފައްސިވީ 89 މީހުންނެވެ. އޭގެ ކުރީ ދުވަހު ފައްސިވީ 109 މީހުންނެވެ.