ފިލާތިބެ މީހުންގެ އަބުރު ކަތިލުމަކީ ނޫސްވެރިކަމުގެ މިނިވަންކަމެއް ނޫން: ވަޒީރު ސަޢީދު
ނަން ހާމަނުކޮށް، ފިލާތިބެގެން ރައީސުލްޖުމްހޫރިއްޔާއާއި އެމަނިކުފާނުގެ އާއިލާއަށް އަމާޒުކޮށް ބައެއް ނޫސްތަކުން ހިންގާ އަބުރު ކަތިލުމުގެ ޢަމަލުތަކަކީ ނޫސްވެރިކަމުގެ މިނިވަންކަމުގެ ތެރޭގައި ހިމެނޭ ކަމެއް ނޫން ކަމަށް ވިދާޅުވެ އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު އެކަން ވަރަށް ބޮޑަށް ކުށްވެރިކުރައްވައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ވިދާޅުވީ، ކޮންމެ މީހަކަށްވެސް ޚިޔާލުފާޅުކުރުމުގެ ޙައްޤު އޮންނަ ފަދައިން، އަނެކާގެ އިޙްތިރާމާއި އަބުރު ރައްކާތެރިކުރުމުގެ ޙައްޤުވެސް އެމިންވަރަށް އޮންނަންޖެހޭނެ ކަމަށެވެ.
ރާއްޖޭގައި ނޫސްވެރިކަމުގެ މިނިވަންކަން އޮތް މިންވަރާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބުދެއްވަމުން ވަޒީރު ސަޢީދު ވިދާޅުވީ، ރާއްޖޭގައި ނޫސްވެރިކަން ކުރަނީ ވަރަށް ފުޅާ ދާއިރާއެއްގައި މިނިވަންކަމާއެކު ކަމަށާއި، ބޭނުން އެއްޗެއް ލިޔުމުގެ ފުރުޞަތު ނޫސްތަކަށް އެބައޮތް ކަމަށެވެ. ނަމަވެސް، އެ މިނިވަންކަމުގެ ތެރެއިން ޒިންމާދާރުކަން ކުޑަވެ، މީހުންގެ ޒާތީ ދިރިއުޅުމަށާއި އާއިލާތަކަށް އުނިކަން އަންނަ ގޮތަށް މަޢުލޫމާތު ފެތުރުމަކީ ދަށު ދަރަޖައިގެ ކަމެއްގެ ގޮތުގައި ވަޒީރު ސިފަކުރެއްވިއެވެ.
“ރާއްޖޭގެ ނޫސްވެރިން އެމިންގަނޑަށް ވެއްޓެންޖެހޭނެ ކަމަކަށް އަޅުގަނޑު ޤަބޫލެއް ނުކުރަން،” ވަޒީރު ވިދާޅުވިއެވެ. އަދި ދުނިޔޭގެ އެއްވެސް ޤައުމެއްގައި، ފިލާތިބެގެން އަނެކާގެ އަބުރު ކަތިލުމަކީ ޤާނޫނީ ގޮތުންނާއި އަޚްލާޤީ ގޮތުން ޖާގަދެވޭނެ ކަމެއް ނޫންކަންވެސް އެމަނިކުފާނު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، ރާއްޖެއަކީ އިސްލާމީ ސައްތައިން ސައްތަ މުސްލިމް މުޖުތަމަޢަކަށް ވާއިރު، އަޅުގަނޑުމެންގެ ތެރޭގައި އިޙްތިރާމް ދިނުމާއި ހޯދުމުގެ ސިފަ ހުންނަންޖެހޭނެ ކަމަށެވެ. ވަކިން ޚާއްޞަކޮށް، އާއިލާތަކަށް މަގުމައްޗަށް ނުކުމެ އުޅެން ދަތިވާ މިންވަރަށް ނޫސްވެރިކަމުގެ ނަމުގައި ކަންކަން ކުރުމަކީ މުޖުތަމަޢު އޮތް ނުރައްކާތެރި ހާލަތު އަންގައިދޭ ކަމެއް ކަމަށް ވަޒީރު ވިދާޅުވިއެވެ.
ޤައުމެއްގެ ތަރައްޤީގައި ނޫސްވެރިކަމަކީ މުހިންމު ދައުރެއް އަދާކުރާ ކަމެއްކަން ފާހަގަކުރައްވަމުން، އިޤްތިޞާދީ އަދި އިޖްތިމާޢީ ކަންކަމުގައި ބިނާކުރަނިވި ފާޑުކިޔުމަށް ސަރުކާރުން އަބަދުވެސް ޖާގަދޭނެ ކަމުގެ ޔަޤީންކަން ވަޒީރު ސަޢީދު ދެއްވިއެވެ. ނަމަވެސް، ބައެއް އެއްވުންތަކުގައާއި ޕްލެޓްފޯމްތަކުގައި އަޚްލާޤީ މިންގަނޑުތަކުން ބޭރުވެ، ހިންގާ ހަޑިހުތުރު ޢަމަލުތައް ހުއްޓާލަންޖެހޭ ކަމަށްވެސް ވަޒީރު ވިދާޅުވިއެވެ.
