އިސްލާމްއާބާދުގައި ބޭއްވުމަށް ހަމަޖެހިފައިވާ މަޝްވަރާތަކާ ގުޅިގެން ދެދުވަސް ސަރުކާރު ބަންދު
އެމެރިކާ އާއި އީރާނާ ދެމެދު އިސްލާމްއާބާދުގައި ބޭއްވުމަށް ހަމަޖެހިފައިވާ މުހިންމު މަޝްވަރާތަކަކާ ދިމާކޮށް، ޕާކިސްތާނުގެ ވެރިރަށް އިސްލާމްއާބާދުގައި މިއަދުން ފެށިގެން ދެ ދުވަހުގެ ސަރުކާރު ބަންދު ދުވަސްތަކެއް ކުއްލި ގޮތަކަށް އިއުލާނުކޮށްފިއެވެ.
އިސްލާމްއާބާދުގެ ޑިސްޓްރިކްޓް އެޑްމިނިސްޓްރޭޝަނުން ރޭ ދަންވަރު ނެރުނު ނޯޓިފިކޭޝަނުގައި މި ބަންދުގެ ސީދާ ސަބަބެއް ބަޔާންކޮށްފައެއް ނުވެއެވެ. ނަމަވެސް، ބައިނަލްއަގުވާމީ ފެންވަރުގެ މުހިންމު ޑިޕްލޮމެޓިކް ހަރަކާތްތަކާ ދިމާކޮށް ސަލާމަތީ ފިޔަވަޅެއްގެ ގޮތުން މިފަދަ ބަންދު ދުވަސްތަކާއި ހުރަސްތައް އެ ގައުމުން އާންމުކޮށް އިއުލާނުކުރެއެވެ.
މެދުއިރުމަތީގެ ހަނގުރާމައާ ގުޅޭގޮތުން އެމެރިކާ އާއި އީރާނުގެ މަންދޫބުންގެ މެދުގައި ބާއްވާ މި ނުރަސްމީ އަދި ނުފޫޒުގަދަ މަޝްވަރާތަކަށް ޕާކިސްތާނުން އަންނަނީ ވަރަށް ބޮޑަށް ތައްޔާރުވަމުންނެވެ. ވައިޓް ހައުސްއިން ހާމަކޮށްފައިވާ ގޮތުގައި، މި ހަފުތާ ބަންދުގައި އިސްލާމްއާބާދުގައި އޮންނަ މި ބައްދަލުވުންތަކުގައި އެމެރިކާގެ ވަފުދުގެ އިސްވެރިއެއްގެ ގޮތުގައި ބައިވެރިވެވަޑައިގަންނަވާނީ ނައިބު ރައީސް ޖޭ.ޑީ. ވެންސް އެވެ.
އިސްލާމްއާބާދުގެ ޑިސްޓްރިކްޓް ކޮމިޝަނަރު ބުދަ ދުވަހު އާންމުކުރި އެންގުމުގައިވާ ގޮތުން، މިއަދާއި މާދަމާ (ބުރާސްފަތި އަދި ހުކުރު) އިއުލާނުކުރި ބަންދަކީ ހަމައެކަނި އިސްލާމްއާބާދު ކެޕިޓަލް ޓެރިޓަރީއަށް ހިނގާނެ ބަންދެކެވެ.
މި ބަންދު ދުވަސްތަކުގައި ވެސް ޒަރޫރީ ޚިދުމަތްތައް ފޯރުކޮށްދޭ އިދާރާތައް ކަމަށްވާ ފުލުހުން، ހޮސްޕިޓަލްތައް އަދި ކަރަންޓާއި ގޭހުގެ ޚިދުމަތްދޭ ތަންތަން ހުޅުވިފައި ހުންނާނެ ކަމަށް އެ ނޯޓިފިކޭޝަނުގައި ބަޔާންކޮށްފައިވެއެވެ.
“ޒަރޫރީ ޚިދުމަތްތައް މެދުނުކެނޑި ކުރިއަށްދާނެ،” ޑެޕިއުޓީ ކޮމިޝަނަރުގެ އޮފީހުން އެކްސް (ކުރިން ޓްވިޓަރ) މެދުވެރިކޮށް ނެރުނު ބަޔާނެއްގައި ބުނެފައިވެއެވެ. އަދި އާންމު ރައްޔިތުން މި ބަދަލުތަކާ އެއްގޮތަށް ކަންކަން ރޭވުމަށް ވެސް އެ ބަޔާނުގައި އިރުޝާދު ދީފައިވެއެވެ.
