މިއަހަރުގެ ރަމަޟާންމަހުވެސް އޮންލައިންކޮށް ފިތުރު ޒަކާތް ބަލައިގަންނާނެ
ކުރިއަށް އޮތް ރަމަޟާން މަހުގެ ފުރަތަމަ ދުވަހުން ފެށިގެން އޮންލައިންކޮށް ފިތުރު ޒަކާތް ބަލައިގަތުމުގެ އިންތިޒާމު މިނިސްޓްރީ އޮފް އިސްލާމިކް އެފެއާޒްއިން ހަމަޖައްސައިފިއެވެ.
ކަލަންޑަރުގައިވާ ގޮތުން މި އަހަރުގެ ރަމަޟާން މަހުގެ ފުރަތަމަ ދުވަހަކީ އަންނަ ހަފުތާގެ ބުދަ ދުވަހެވެ. އިސްލާމިކް މިނިސްޓްރީން ހާމަކޮށްފައިވާ ގޮތުގައި، ރޯދަ މަހުގެ ފުރަތަމަ ދުވަހުން ފެށިގެން އެ މަހުގެ 27 ވަނަ ދުވަހުގެ ހެނދުނު 6:00 އާ ހަމައަށް އޮންލައިންކޮށް ޒަކާތް ދެއްކުމުގެ ފުރުސަތު އާންމުންނަށް ހުޅުވާލެވޭނެއެވެ.
ޒަކާތް ދައްކާ ފަރާތްތަކަށް ލުއިފަސޭހަކޮށްދިނުމުގެ ގޮތުން ގިނަ ވަސީލަތްތަކެއް މެދުވެރިކޮށް ޒަކާތް ބަލައިގަތުމަށް ވަނީ ނިންމާފައެވެ. އެގޮތުން އޮންލައިންކޮށް ޒަކާތް ދެއްކޭނެ ގޮތްތަކަކީ:
- ދިރާގު އެޕް އަދި ދިރާގު ޕޭ
- އުރީދޫ އެމް ފައިސާ
- މޯލްޑިވްސް އިސްލާމިކް ބޭންކް (އެމް.އައި.ބީ) ފައިސާ މޯބައިލް އެޕް
- ބޭންކް އޮފް މޯލްޑިވްސް (ބީ.އެމް.އެލް) އެޕް
- ފަހިޕޭ
- އަވަސް އެޕް
- މިނިސްޓްރީ އޮފް ފިނޭންސްގެ ބަނޑޭރިޕޭ
މީގެ އިތުރުން، އޮންލައިންކޮށް ޒަކާތް ދެއްކުމަށް ދަތިވާ ފަރާތްތަކަށް މިނިސްޓްރީއަށް ގޮސް ޒަކާތް ދެއްކޭނެ އިންތިޒާމުވެސް ވަނީ ހަމަޖައްސާފައެވެ. ރަސްމީ ބަންދު ނޫން ކޮންމެ ދުވަހެއްގެ ހެނދުނު 10:00 އިން މެންދުރު 1:00 އަށް ޒަކާތް ބަލައިގަންނާނެ ކަމަށް މިނިސްޓްރީން ބުނެއެވެ. އަދި ބަންދު ދުވަސްތަކުގައި ޒަކާތް ބަލައިގަންނާނީ މެންދުރު 11:00 އިން 2:00 އަށެވެ.
މި އަހަރު ފިތުރު ޒަކާތުގެ ގޮތުގައި ބަލައިގަންނާނެ ބާވަތްތަކާއި އަގުތަކަކީ:
- އާދައިގެ ހަނޑޫ: 12ރ.
- ތައިލެންޑު ހުދު ހަނޑޫ: 53ރ.
- ރަތް ހަނޑޫ: 96ރ.
- އާދައިގެ ބާސްމަތީ ހަނޑޫ: 77ރ.
- ބާސްމަތީ މޮޅު ހަނޑޫ: 109ރ.
- އެންމެ މޮޅު ބާސްމަތީ ހަނޑޫ: 136ރ.
- އާދައިގެ ފުށް: 10ރ.
- އާޓާ ފުށް: 75ރ.
ފިތުރު ޒަކާތަކީ ކޮންމެ މުސްލިމަކުވެސް ރަމަޟާން މަހު އަދާކުރުން ވާޖިބުވެގެންވާ އަޅުކަމެކެވެ. އިސްލާމިކް މިނިސްޓްރީން ބާރުއަޅަނީ ވީހާވެސް އަވަހަކަށް ޒަކާތުގެ ކަންކަން ފުރިހަމަކުރުމަށެވެ.
